হায়দৰাবাদ: বিতৰ্কই আৱৰি ধৰা উচ্ছেদ কাৰ্যৰ পিছতেই গুৱাহাটীৰ সমীপৱৰ্তী সোণাপুৰৰ কচুতলীত প্ৰথমবাৰৰ বাবে অনুষ্ঠিত হয় লক্ষ্মী পূজা । বিশ্ব হিন্দু পৰিষদ আৰু বজৰং দলৰ উদ্যোগত স্থানীয় দল-সংগঠন আৰু ৰাইজৰ সহযোগত সুকলমে সম্পন্ন হৈছিল লক্ষ্মী পূজাভাগ । ইয়াৰ পিছতেই আয়োজন চলিছিল কালী পূজা উদযাপনৰ । উলহ-মালহেৰে কালী পূজা উদযাপনৰ বাবে প্ৰস্তুতি চলাইছিল স্থানীয় হিন্দু ধৰ্মাৱলম্বী লোকসকলে ।  

কিন্তু কালী পূজালৈ মাজত মাত্ৰ এটা দিন থকা অৱস্থাত ঘটিল এক অঘটন । কালী পূজাৰ তোৰণ, মণ্ডপ আদিত দুস্কৃতিকাৰীয়ে চলালে তাণ্ডৱ । যাৰ বিৰুদ্ধে উদ্যোক্তাসকলে দাখিল কৰিছে এখন এজাহাৰ । এজাহাৰত উত্থাপন কৰা অভিযোগ অনুসৰি ৰাষ্ট্ৰীয় পথ আৰু কচুতলী সংযোগী পথত বিশ্ব হিন্দু পৰিষদৰ তৰফৰ পৰা স্থাপন কৰা তোৰণ তথা ধৰ্মধ্বজাসমূহ দুস্কৃতিকাৰীয়ে দলিয়াই পেলায় । কোনো দুষ্ট চক্ৰই ধৰ্মীয় বিষবাস্প বিয়পোৱাৰ বাবে এনে কাৰ্য সংঘটিত কৰাৰ অভিযোগ উত্থাপন কৰে উদ্যোক্তাসকলে । 

লগতে পঢ়ক: প্ৰথমবাৰৰ বাবে অনুষ্ঠিত কৰিবলৈ লোৱা লক্ষ্মী পূজাক লৈ উখল-মাখল কচুতলী