টিংখাঙত ষষ্ঠ বার্ষিক ধাম খৱা সবাহৰ লাইখুঁটা স্থাপন

মৰাণ, ২৬ ফেব্ৰুৱাৰীঃ ভূমিপুত্ৰ সোণোৱাল কছাৰী সকলৰ পৌৰাণিক কথিত ভাষাটো উদ্ধাৰ, প্ৰসাৰ আৰু প্ৰচাৰৰ বাবে জনগোষ্ঠীটোৰ লোকসকলক একত্ৰিত কৰাৰ অৰ্থে গঠিত সোণোৱাল ভাষাত কথা-বতৰা প্রতিষ্ঠানৰ কেন্দ্ৰীয় সমিতিৰ উদ্যোগত ষষ্ঠ বার্ষিক ধাম খৱা সবাহৰ আয়োজন কৰা হৈছে । অহা ৯ মার্চৰ পৰা দুদিনীয়া বৰ্ণাঢ্য কাৰ্যসূচীৰে আয়োজন কৰা এই ষষ্ঠ বার্ষিক ধাম খৱা সবাহৰ আজি লাইখুঁটা স্থাপন কৰা হয় ।

সোণোৱাল ভাষাত কথা-বতৰা প্রতিষ্ঠানৰ কেন্দ্ৰীয় সমিতিৰ উদ্যোগত ডিব্ৰুগড় জিলাৰ টিংখাঙৰ ঔফুলীয়া আঞ্চলিক সমিতিৰ সহযোগত ঔফুলীয়া কল্যাণ সংঘৰ প্ৰাঙ্গণত ষষ্ঠ বার্ষিক ধাম খৱা সবাহখনি অহা ৯ আৰু ১০ মার্চত অনুষ্ঠিত হ'ব । সোমবাৰে সোণোৱাল কছাৰী পৰম্পৰাগত ৰীতি-নীতিৰে অনুষ্ঠানটোৰ লাইখুঁটা স্থাপন কৰা হয় । উক্ত অনুষ্ঠানত সোণোৱাল ভাষাত কথা-বতৰা প্রতিষ্ঠানৰ কেন্দ্ৰীয় সমিতিৰ প্ৰতিষ্ঠাপক সভাপতি ৰাজু সোণোৱাল দেউৰী, ধেমাজি নৰ্থবেংক কলেজৰ অৱসৰপ্ৰাপ্ত উপাধ্যক্ষ ড৹ লৱৰাম সোণোৱাল, মৰাণ মহাবিদ্যালয়ৰ সহকাৰী অধ্যাপক ড৹ তুলসী সোণোৱাল, সোণোৱাল ভাষাত কথা-বতৰা প্রতিষ্ঠানৰ কেন্দ্ৰীয় সমিতিৰ বিষয়ববীয়া সকল উপস্থিত থাকে ।  

উল্লেখ্য যে ষষ্ঠ বার্ষিক ধাম খৱা সবাহখনিত সোণোৱাল কছাৰী জনগোষ্ঠীটোৰ লোকসংস্কৃতিৰ সাধক,সাহিত্যিক পেঞ্চনাৰ লীলাকান্ত হাজৰিকাক জীৱনজোৰা সাধনা বঁটা প্ৰদান কৰিব বুলি উদ্যোক্তাসকলে সদৰী কৰিছে ।

লগতে পঢ়ক:প্ৰজ্ঞাৰ উদ্যোগত ব্ৰহ্মপুত্ৰৰ বুকুত মঞ্চস্থ ঐতিহসিক নাট বীৰ চিলাৰায়