বকো,১৯ এপ্ৰিল: শুকুৰবাৰে অসমৰ লগতে চুবুৰীয়া ৰাজ্য মেঘালয়তো অনুষ্ঠিত হয় লোকসভা নিৰ্বাচনৰ প্ৰথম পৰ্যায়ৰ ভোটগ্ৰহণ । তুৰা লোকসভা সমষ্টিৰ বাবে ভোটদান কৰে মেঘালয়ৰ প্ৰাক্তন মুখ্যমন্ত্ৰী মুকুল চাংমাই । ছাউথ ৱেষ্ট গাৰো হিলছ জিলা সদৰ আমপাটিত ভোটাধিকাৰ সাব্যস্ত কৰে তৃণমূল কংগ্ৰেছৰ নেতাগৰাকীয়ে । আনহাতে, তৃণমূল কংগ্ৰেছৰ প্ৰাৰ্থী জেনিথ এম চাংমায়ো ভোটদান কৰে । সাংবাদিকৰ সৈতে হোৱা সাক্ষাৎকাৰত তেওঁ কয় যে তুৰা লোকসভা সমষ্টিত প্ৰতিষ্ঠান বিৰোধী ঢৌ বলিছে, ৰাইজে পৰিৱৰ্তন বিচাৰিছে ।  

ৰাজ্য চৰকাৰৰ কু-শাসন, নিবনুৱা সমস্যা, অনুন্নত বাট-পথৰ সমস্যাত জৰ্জৰিত হৈ আছে । ৬৪ নং ৰাষ্ট্ৰীয় ঘাইপথৰে বাংলাদেশলৈ চোৰাং সামগ্ৰীৰ সৰবৰাহৰ গুৰুতৰ অভিযোগ উত্থাপন কৰি তেওঁ কয় যে শাসকীয় দলৰ অকৰ্মন্যতাৰ বাবে এনে ঘটনা ঘটিছে । তুৰা লোকসভা সমষ্টিত এন পি পিৰ প্ৰাৰ্থীৰ সৈতে কংগ্ৰেছ আৰু তৃণমূল কংগ্ৰেছৰ তিনিকোণীয়া যুঁজ হ'ব বুলি মন্তব্য কৰি টি এম চি দলে শেষ হাঁহি মাৰিব বুলি তেওঁ আশা ব্যক্ত কৰে । উল্লেখযোগ্য যে, বিয়লি ৩ বজালৈ ৬৩.০৪% ভোটদান সম্পন্ন হোৱা বুলি জানিব পৰা গৈছে । 

লগতে পঢ়ক: আৰম্ভ ভোটযুদ্ধ : কোন কোন বিধায়কে সাব্যস্ত কৰিলে ভোটাধিকাৰ ? - Lok Sabha Election 2024