বৰপেটা, ২৫ জুন : ২৬ জুনত আন্তৰ্জাতিক নিচাযুক্ত দ্ৰব্য আৰু অবৈধ সৰবৰাহ বিৰোধী দিৱস পালন কৰা হ'ব । এই দিৱসৰ লগত সংগতি ৰাখি সোমবাৰে বৰপেটা জিলা কাৰাগাৰত কয়দীসকলৰ মাজত এক সজাগতা কাৰ্যসূচী ৰূপায়ণ কৰা হয় । নিচামুক্ত ভাৰত গঢ়াৰ লক্ষ্যৰে নাৰ্ক’টিকছ কণ্ট্ৰ'ল ব্যুৰ'ৰ উদ্যোগত এই কাৰ্যসূচী ৰূপায়ণ কৰা হয় । ইয়াৰ জৰিয়তে কাৰাগাৰৰ প্ৰায় ৩০০ কয়দীৰ মাজত ড্ৰাগছৰ বিৰুদ্ধে জনমত গঢ়াৰ প্ৰয়াস কৰা হয় ।

কাৰাবন্দীৰ সন্মুখত নিচাযুক্ত দ্ৰব্য বা ড্ৰাগছৰ ভয়াৱহতা, ইয়াৰ বিৰুদ্ধে থকা আইন, আইনত থকা শাস্তি আদিৰ বিষয়েও নাৰ্ক’টিকছ কণ্ট্ৰ'ল ব্যুৰ' আৰু বৰপেটা জিলা কাৰাগাৰৰ বিষয়াসকলে প্ৰকাশ কৰে । এই সজাগতামূলক কাৰ্যসূচীৰ সন্দৰ্ভত জিলা কাৰাগাৰৰ কাৰাধ্যক্ষ নিলোৎপল কাকতিয়ে কয় যে, ইয়াৰ জৰিয়তে কাৰাবন্দীসকল যথেষ্ট উপকৃত হ'ব ।

এই কাৰ্যসূচীত নাৰ্ক’টিকছ কণ্ট্ৰ'ল ব্যুৰ'ৰ গুৱাহাটীস্থ কাৰ্যালয়ৰ চোৰাংচোৱা বিষয়া প্ৰেম নাৰায়ণ ঝা আৰু কনিষ্ঠ চোৰাংচোৱা বিষয়া ৰোহিত কুমাৰ যাইমেনকে ধৰি কেইবাগৰাকীও বিষয়া-কৰ্মচাৰী উপস্থিত থাকে । এই কাৰ্যসূচীৰ লগত সংগতি ৰাখি কাৰাগাৰ কৰ্তৃপক্ষই বিভিন্নজনক গছপুলিও বিতৰণ কৰে ।

লগতে পঢ়ক :সৰ্থেবাৰীত বৃহৎ পৰিমাণৰ গাঞ্জাসহ আটক সৰবৰাহকাৰী - Ganja Seized In Sarthebari লগতে পঢ়ক:কাছাৰত ৫ কোটি টকাৰ হেৰ'ইনসহ গ্ৰেপ্তাৰ সৰবৰাহকাৰী