ডিব্ৰুগড়, 30 মাৰ্চ: লোকসভা নিৰ্বাচনৰ দিন চমু চাপি অহাৰ লগে লগে ডিব্ৰুগড় লোকসভা সমষ্টিত আন আন ৰাজনৈতিক দলৰ লগতে আম আদমি পাৰ্টীয়েও তীব্ৰতৰ কৰি তুলিছে প্ৰচাৰ অভিযান ৷ শনিবাৰে সন্ধিয়া আম আদমি পাৰ্টীৰ প্ৰাৰ্থী মনোজ ধানোৱাৰে মৰাণৰ খাগৰিজানত এক নিৰ্বাচনী প্ৰচাৰ সভাত অংশ লৈ বিজেপি নেতৃত্বাধীন চৰকাৰৰ দুৰ্নীতি-ভ্ৰষ্টাচাৰৰ বিৰুদ্ধে ৰাইজক ভোটদান কৰিবলৈ আহ্বান জনায় ৷  

ভাষণ প্ৰসংগত মনোজ ধানোৱাৰে বৰ্তমানৰ বিজেপি চৰকাৰখনৰ দুৰ্নীতি-ভ্ৰষ্টাচাৰৰ বিৰুদ্ধে মাত মতাৰ বাবেই দিল্লীৰ মুখ্যমন্ত্ৰীক জে’লত ভৰাই ৰখাৰ অভিযোগ কৰে ৷ ডিব্ৰুগড়ত আপৰ প্ৰাৰ্থীগৰাকীৰ পিচত মানুহ লগাই হাৰাশাস্তি কৰাৰ গুৰুতৰ অভিযোগ উত্থাপন কৰিছে মনোজ ধানোৱাৰে ৷ গণতন্ত্ৰত এনে আচৰণ ভাল নহয় বুলি উল্লেখ কৰি ডিব্ৰুগড় লোকসভা সমষ্টিৰ অন্তৰ্গত গ্ৰামাঞ্চল আৰু বাগিচা অঞ্চলত সাধাৰণ ৰাইজৰ অভূতপূৰ্ব সঁহাৰি লাভ কৰা বুলি দাবী কৰে ধানোৱাৰে ৷

উল্লেখযোগ্য যে কেইটামান দিনৰ পূৰ্বে ডিব্ৰুগড়ৰ আপৰ প্ৰাৰ্থী মনোজ ধানোৱাৰৰ গাড়ীৰ পৰা ধন জব্দ কৰিছিল আৰক্ষীয়ে । ধন জব্দ কৰি ২ ঘন্টা পথৰ ওপৰতেই ৰখাই হাৰাশাস্তি কৰাৰ অভিযোগ উত্থাপন কৰিছিল মনোজ ধানোৱাৰে ।

লগতে পঢ়ক: গৌৰৱ গগৈ-লুৰীণজ্যোতি গগৈক হৰুওৱাৰ কাম কৰি আছে অখিল গগৈয়ে : জয়ন্ত মল্লবৰুৱা