বাইহাটা চাৰিআলি: ৰাজ্যৰ ক্ৰীড়াপ্ৰেমীৰ বাবে ভাল খবৰ ।এতিয়া এখন নহয়, একেলগে দুখনকৈ একাডেমীৰ কাম চলি আছে কামৰূপ জিলাৰ উত্তৰ গুৱাহাটীত । উত্তৰ গুৱাহাটীৰ ঐতিহ্যমণ্ডিত শ্ৰীশ্ৰী দীৰ্ঘেশ্বৰী দেৱালয়ৰ নিচেই কাষৰ উত্তৰ ফুলুং ডেকাবাৰী গাঁৱত নিৰ্মাণ কৰি থকা হৈছে এই একাডেমী দুখন । একাডেমী দুখনৰ এখন হ'ব ফুটবল একাডেমী আৰু আনখন ক্ৰিকেট একাডেমী ।  

উত্তৰ গুৱাহাটী ৰাজহ চক্ৰৰ প্ৰায় ৪০ বিঘা চৰকাৰী মাটিত নিৰ্মাণ কৰা হৈছে একাডেমী দুখন । খেলুৱৈসকলৰ বাবে সকলোধৰণৰ সা-সুবিধা উপলব্ধ হ'ব এই দুখন একাডেমীত । ইয়াৰ লগতে ল'ৰা আৰু ছোৱালীৰ বাবে থাকিব উন্নত মানৰ সুকীয়া হোষ্টেলৰ ব্যৱস্থা । সংলগ্ন থাকিব ছুইমিং পুল । ইতিমধ্যেই সম্পূৰ্ণ হৈ উঠিছে পেভেলিয়ন । অসম ক্ৰিকেট সন্থাৰ দ্বাৰা ক্ৰিকেট একাডেমীখন আৰু গুৱাহাটী টাউন ক্লাবৰ দ্বাৰা ফুটবল একাডেমীখন পৰিচালিত হ'ব । চলিত বছৰৰ শেষত নতুবা নতুন বছৰত শুভাৰম্ভ হ'ব একাডেমী দুখন ।

লগতে পঢ়ক:বেডমিণ্টন খেলুৱৈ ৰায়হান জামান আৰু হৰ্ষিত গগৈক সম্বৰ্ধনা