হোজাই, ১৭ মাৰ্চ : হোজাইত চাঞ্চল্যকৰ ঘটনা । হোজাই জিলাৰ লংকাৰ দুটাকৈ মন্দিৰত শুকুৰবাৰে নিশা সংঘটিত হয় চুৰিকাণ্ড । লংকা লামডিং পথৰ লংকা টাউনৰ পাঁচ নম্বৰ ওৱাৰ্ডৰ শ্ৰীশ্ৰী বিষ্ণু মন্দিৰৰ তলা ভাঙি চুৰিকাণ্ড সংঘটিত কৰাৰ লগতে কাষতে থকা শিৱ মন্দিৰতো চোৰে চলাই চাফাই অভিযান । ঘটনা অনুসৰি চোৰে মন্দিৰৰ দুৱাৰৰ তলা ভাঙি প্রৱেশ কৰি মন্দিৰ ভিতৰৰ থাপনাত থকা বিষ্ণুৰ পিতলৰ মূৰ্তিৰ লগতে বিভিন্ন সামগ্ৰী, দানপাত্ৰত থকা লক্ষাধিক ধন লৈ উধাও হয় ।  

স্থানীয় ৰাইজে আৰক্ষীক খবৰ দিয়াত লংকা আৰক্ষী ঘটনাস্থলীত উপস্থিত হৈ ঘটনাৰ তদন্ত অব্যাহত ৰাখিছে । উল্লেখ্য যে, দিনক দিনে হোজাই জিলাত বৃদ্ধি পাবলৈ ধৰিছে অপৰাধজনিত ঘটনা । পূৰ্বতেও বিভিন্ন ধৰ্মীয় স্থানত সংঘটিত হৈ আহিছে চুৰিকাণ্ড । যাক লৈ চিন্তিত হৈ পৰিছে সচেতন মহল ।

লগতে পঢ়ক: অভিযুক্তক ৰেহাই দিয়াৰ নামত ১৩ লাখ টকা লৈ গ্ৰেপ্তাৰ পল্টন বজাৰ থানাৰ এ এছ আই