মৰাণ, 17 মাৰ্চ: লোকসভা নিৰ্বাচনৰ প্ৰাকক্ষণত তীব্ৰ সংঘাত পৰিলক্ষিত হৈছে অসম জাতীয় পৰিষদৰ ভিতৰচ’ৰাত । দলটোৰ উপ-সভাপতি দুলু আহমেদে বৰপেটা লোকসভা সমষ্টিত নিজ ইচ্ছা অনুসৰি নিৰ্বাচন খেলিবলৈ মনস্থ কৰাৰ পাচতে এই সংঘাত দেখিবলৈ পোৱা গৈছে ৷ শনিবাৰে দুলু আহমেদে দলটোৰ সভাপতি লুৰীণজ্যোতি গগৈ সন্দৰ্ভত আগবঢ়াইছিল বহু বিতৰ্কিত মন্তব্য । যিয়ে ৰাজ্যৰ ৰাজনীতিত ব্যাপক চৰ্চা লাভ কৰা পৰিলক্ষিত হৈছে । 

দুলু আহমেদৰ বিতৰ্কিত মন্তব্যৰ পাচতেই ডিব্ৰুগড়ৰ খোৱাং বাঁহনি পথাৰত এক অনুষ্ঠানত অংশগ্ৰহণ কৰি প্ৰতিক্ৰিয়া প্ৰকাশ কৰে ডিব্ৰুগড় লোকসভা সমষ্টিৰ প্ৰাৰ্থী লুৰীণজ্যোতি গগৈয়ে । দুলু আহমেদৰ নাম নোলোৱাকৈ লুৰীণজ্যোতি গগৈয়ে কয়, "মই নিজেই নিজক জানো । নিজৰ ওপৰত সম্পূৰ্ণ বিশ্বাস আছে । অসমৰ জনগণৰ ওপৰত বিশ্বাস ৰাখিছো । কোনো ব্যক্তি‌ বিশেষৰ সমালোচনাৰ মই উত্তৰ দিব বিচৰা নাই । অসমৰ ৰাইজৰ আগত পৰীক্ষা দিবলৈ বাকী নাই । মই কি কৰিছো জনতাই বিচাৰ কৰিব, সময়ৰ ওপৰত এৰিছো । জনগণে প্ৰশ্ন কৰিলে উত্তৰ দিম । জনগণৰ ওচৰত মই দায়বদ্ধ ।" 

দুলু আহমেদৰ বিতৰ্কিত মন্তব্য আৰু কাম-কাজক লৈ দলে ব্যৱস্থা গ্ৰহণ কৰিব বুলি সংবাদ মাধ্যমৰ আগত উল্লেখ কৰে অজাপৰ সভাপতিগৰাকীয়ে ।

লগতে পঢ়ক: অসম জাতীয় পৰিষদৰ সভাপতি লুৰীণজ্যোতি গগৈক ভাবুকি উপ-সভাপতি দুলু আহমেদৰ