বৰপেটা, ২৯ মাৰ্চ: ধুবুৰী লোকসভা সমষ্টিৰ ৰাজনৈতিক দলসমূহে নিৰ্বাচনী প্ৰচাৰক লৈ তৎপৰ হৈছে । আজি চেঙা সমষ্টিত এখন প্ৰচাৰ সভাত ধুবুৰী লোকসভা সমষ্টিৰ মিত্ৰজোঁট সমৰ্থিত অগপ প্ৰাৰ্থী জাভেদ ইছলামে এ আই ইউ ডি এফৰ বিৰুদ্ধে সৰৱ হৈ পৰে । এ আই ইউ ডি এফৰ প্ৰাৰ্থী বদৰুদ্দিন আজমলক সমালোচনা কৰি জাভেদ ইছলামে কয়,"বদৰুদ্দিন আজমলে সমষ্টিবাসীৰ বাবে একো কৰা নাই । তেওঁ যি কৰিছে সেয়া হোজাইতহে কৰিছে, ধুবুৰীত নহয় ।"

মিত্ৰজোঁট সমৰ্থিত অগপ প্ৰাৰ্থী জাভেদ ইছলামে কয় যে ধুবুৰী লোকসভা সমষ্টিৰ ভোটাৰ এইবাৰ চৰকাৰৰ পক্ষত আছে । এ আই ইউ ডি এফ আৰু কংগ্ৰেছ দুয়োটা দলে সমষ্টিটোৰ বাহিৰৰ নেতাক প্ৰাৰ্থিত্ব দিছে । ভোটাৰ ৰাইজে এইবাৰ স্থানীয় প্ৰাৰ্থীক বিজয়ী কৰোৱাটো নিশ্চিত বুলি দাবী কৰে অগপৰ প্ৰাৰ্থী জাভেদ ইছলামে । তেওঁৰ কোনো প্ৰতিদ্বন্দ্বী নাই বুলি মন্তব্য কৰে জাভেদ ইছলামে । সভাত কংগ্ৰেছৰ বিৰুদ্ধে সৰৱ হৈ তেওঁ কয়, "সুদূৰ নগাঁৱৰ পৰা আনি ধুবুৰীত প্ৰাৰ্থী দিছে কংগ্ৰেছে ।"

লগতে পঢ়ক:লোকসভা নিৰ্বাচনত কোন সমষ্টিত কিদৰে প্ৰভাৱ পেলাব সংখ্যালঘু ভোটাৰে - Lok Sabha Election 2024