মাজুলী : সামৰণি পৰিল মাজুলীৰ গৌৰৱ ৰাস মহোৎসৱৰ । এমাহজোৰা উখল মাখল পৰিৱেশৰ পাছত দেওবাৰৰ পৰা নিস্তব্ধ হ’ল মাজুলীৰ আকাশ-বতাহ । ৰাসৰ সামৰণিৰ লগে লগে নিজ নিজ স্থানলৈ উভতিছে মাজুলীলৈ অহা দেশী-বিদেশী পৰ্যটকসকল ।

ৰাসৰ সময়ছোৱাত দ্বিতীয় বৃন্দাবনলৈ পৰ্যৱেশিত হয় সত্ৰনগৰী মাজুলী । এই সময়ছোৱাত বাঁহীৰ সুৰ, খোল-তালৰ মাতে মুখৰিত হৈ পৰে মাজুলীৰ চৌপাশ । দক্ষিণ পাট সত্ৰ, উত্তৰ কমলাবাৰী সত্ৰ, চামগুৰি সত্ৰকে আদি কৰি সত্ৰ আৰু ৰংগমঞ্চসমূহত আয়োজন কৰা ৰাসে জিলিকাই তোলে মাজুলীক । এইবাৰ মাজুলীৰ ১২ খনকৈ সত্ৰৰ লগতে অৰ্ধ শতাধিক ৰংগমঞ্চত অনুষ্ঠিত হয় ৰাস মহোৎসৱ ।

লক্ষণীয় যে, মাজুলীৰ ৰাস অনন্য আৰু অদ্বিতীয় । ৰাস মহোৎসৱ মাজুলীবাসীৰ স্বাভিমান । দৰ্শনাৰ্থীৰ অকুণ্ঠ সঁহাৰিৰ মাজত কালি মাজুলীৰ ৰাসে পাৰ কৰিলে তৃতীয় ৰজনী ৷ ৰাস মহোৎসৱৰ সামৰণি পৰাৰ লগে লগে মাজুলীত এতিয়া নিস্তব্ধ পৰিৱেশ । ৪১ বছৰীয়া হোৱা গায়নগাঁও নৱ জ্যোতি কৃষ্টি সংঘৰ ৰাসৰ তৃতীয় তথা অন্তিম নিশা জনপ্রিয় অভিনেতা মুকুতা ডেকাই কৰিলে অভিনয় । নন্দালয়ৰ এটি খুহুঁতীয়া চৰিত্ৰত অভিনয় কৰি মুকুতা ডেকাই উপস্থিত দৰ্শকক দিয়ে হাঁহিৰ খোৰাক । মুকুতা ডেকাৰ অভিনয় চাবলৈ গায়নগাঁও নৱ জ্যোতি কৃষ্টি সংঘৰ ৰংগমঞ্চত দেখা গ’ল ৰাইজৰ যথেষ্ট ভিৰ ৷

লগতে পঢ়ক : পবিত্ৰ লক্ষ্মী পূৰ্ণিমাৰ দিনাই মাজুলীত আৰম্ভ হ’ল ৰাসৰ নাট মেলা পৰ্ব