গুৱাহাটী, ২২ ছেপ্টেম্বৰ: গুৱাহাটী মহানগৰীৰ পাণবজাৰ অঞ্চলত ডকাইতিৰ লগত জড়িত থকা সন্দেহত আৰক্ষীয়ে এজনক গ্ৰেপ্তাৰ কৰিছে । পাণবজাৰ আৰক্ষীয়ে ফটাশিলৰ পৰা গ্ৰেপ্তাৰ কৰে ৰাজু বড়ো নামৰ এজনক । ৰাজু বড়োৰ পৰা উদ্ধাৰ এটা পিষ্টল । উদ্ধাৰ হোৱা পিষ্টলটো আৰক্ষীৰ বেৰেকৰ পৰা চুৰি কৰা বুলি সন্দেহ কৰা হৈছে ।

উল্লেখ্য যে, শুকুৰবাৰে পুৱা এখন ই-ৰিক্সা চালকৰ পৰা দুই দুৰ্বৃত্তই পিষ্টল দেখুৱাই লুটি নিছিল নগদ ধন আৰু ম'বাইল । মহম্মদ আয়জুল নামৰ ই-ৰিক্সা চালকজনে এই সন্দৰ্ভত কয়, ‘‘পুৱা ই-ৰিক্সা লৈ ওলাই আহিছিলো । এ টি ৰোডৰ বিশ্বৰত্ন হোটেলৰ সমীপত পুৱা প্ৰায় ৪.৫০ বজাত দুজন যুৱক ৰিক্সাত উঠিছিল আৰু গুৱাহাটী ষ্টেচনলৈ যাম বুলি কৈছিল । গুৱাহাটী ষ্টেচনলৈ গৈ থকা অৱস্থাত ষ্টেচন পোৱাৰ আগতে পাণবজাৰ অঞ্চলত ৰিক্সাখন ৰখাবলৈ দিয়ে যুৱক দুজনে ৷ ৰিক্সাখন ৰখোৱাৰ লগে লগে দুই দুৰ্বৃত্তই দুয়োফালৰ পৰা দুটা পিষ্টল দেখুৱাই ম'বাইল আৰু নগদ ধন লুটি ই-ৰিক্সাখন লৈ যাব খুজিছিল । কিন্তু ৰিক্সাখন লৈ মই আগবাঢ়ি গৈ চিঞৰ-বাখৰ কৰাত স্থানীয় লোক গোট খোৱাৰ বাবে শূন্যলৈ গুলী ফুটাই ঘটনাস্থলীৰ পৰা পলায়ন কৰে দুই দুৰ্বৃত্তই ।’’

লগতে পঢ়ক: এইবাৰ পিষ্টলধাৰী দুৰ্বৃত্তৰ লক্ষ্য ই-ৰিক্সা চালক, গুৱাহাটীত পুৱাই চাঞ্চল্য - Robbery in Guwahati