2030 চনৰ ভিতৰত বাহনৰ বৈদ্যুতিকীকৰণৰ ক্ষেত্ৰত নিৰ্ধাৰিত লক্ষ্যত উপনীত হ’ব পাৰিবনে ভাৰত ?
এছ অ’ ইৰ প্ৰতিবেদন অনুসৰি, অধিক খৰচ আৰু স্থানীয় উৎপাদনৰ প্ৰয়োজনীয়তাৰ বাবে 2030 চনৰ ভিতৰত বাহনৰ বৈদ্যুতিকীকৰণৰ বাবে নিৰ্ধাৰিত লক্ষ্যত উপনীত হ’ব নোৱাৰিব ভাৰত ।
Published : March 2, 2025 at 5:01 PM IST
হায়দৰাবাদ: ভাৰতত বৈদ্যুতিক বাহন (ইভি)ৰ গুৰুত্ব বৃদ্ধি পাইছে, বিত্তীয় বৰ্ষ 21ৰ পৰা 24 বিত্তীয় বৰ্ষৰ ভিতৰত বাৰ্ষিক প্ৰায় 200 বেছিছ পইণ্ট (বিপিএছ) হাৰত বৃদ্ধি পাইছে । কিন্তু দেশখনৰ অভিলাষী ইভি 30@30 লক্ষ্য — 2030 চনৰ ভিতৰত 30 শতাংশ ইভি ব্যৱহাৰৰ নিৰ্ধাৰিত লক্ষ্যত উপনীত হ’বলৈ ই যথেষ্ট নহ’বও পাৰে ।
চেণ্টাৰ ফৰ ছাইন্স এণ্ড এনভাইৰ’নমেণ্ট (চিএছই) আৰু ডাউন টু আৰ্থ আলোচনীয়ে এইবাৰৰ অনিল আগৰৱাল ডাইলগত প্ৰকাশ কৰা 2025 চনৰ ভাৰতীয় ষ্টেট অৱ ইণ্টাৰনমেণ্টৰ প্ৰতিবেদনত কোৱা হৈছে যে 2030 চনৰ ভিতৰত দেশখনে বাহন বৈদ্যুতিকীকৰণৰ লক্ষ্য পূৰণ কৰাটো অসম্ভৱ ।
এইটোৰ পূৰ্বৰ FICCI-Yes Bank ৰ প্ৰতিবেদনৰ সৈতে মিল আছে, য’ত দাবী কৰা হৈছিল যে ভাৰতত EV30@30 লক্ষ্যত উপনীত হ’বলৈ গ্ৰহণৰ হাৰ প্ৰায় দুগুণ (380 bps)ৰ প্ৰয়োজন ।
ভাৰতত বৈদ্যুতিক বাহন ব্যৱহাৰ: বৰ্তমানৰ অৱস্থা আৰু প্ৰকল্পিত হাৰ
2030 চনৰ ভিতৰত বাহনসমূহক বিদ্যুৎ সংযোগ কৰাৰ ভাৰতৰ লক্ষ্য হৈছে বিশ্বব্যাপী EV30@30 অভিযানৰ প্ৰতি দেশৰ সমৰ্থন । 2030 চনৰ ভিতৰত এই অভিযানৰ লক্ষ্য হৈছে:
- নতুনকৈ পঞ্জীয়ন কৰা ব্যক্তিগত গাড়ীৰ 30 শতাংশ
- নতুন বাছৰ 40 শতাংশ
- 70 শতাংশ বাণিজ্যিক গাড়ী
- দুচকীয়া আৰু তিনিচকীয়া বাহনৰ 80 শতাংশ
চি এছ ইৰ গৱেষণা আৰু ওকালতিৰ কাৰ্যবাহী সঞ্চালিকা অনুমিতা ৰয়চৌধুৰীয়ে কয়, “ভাৰতত 2024 চনত ভাৰতৰ মুঠ ইভিৰ প্ৰৱেশ মাত্ৰ 6.5 শতাংশ বুলি কোৱা হৈছে । আন্তঃৰাষ্ট্ৰীয় শক্তি সংস্থাৰ মতে, নীতিসমূহৰ বৰ্তমানৰ দিশ অনুসৰি 2035 চনৰ ভিতৰত মাত্ৰ 25 শতাংশ বৈদ্যুতিকীকৰণ হ’ব ।”
তেওঁ লগতে কয়, “যদিও ৰাষ্ট্ৰীয় আৰু ৰাজ্যিক পৰ্যায়ত বৈদ্যুতিক বাহনৰ প্ৰচাৰৰ বাবে কেইবাটাও নীতিগত কৌশল প্ৰণয়ন কৰা হৈছে, বজাৰখন চলাবলৈ নিয়ন্ত্ৰণ ব্যৱস্থা দুৰ্বল হৈয়ে আছে ।”
বৈদ্যুতিক বাহন গ্ৰহণ: প্ৰত্যাহ্বান আৰু সম্ভাৱ্য সমাধান
ৰায়চৌধুৰীয়ে কয় যে বেটাৰীৰ চাহিদাই ইভি বজাৰৰ দিশ প্ৰতিফলিত কৰে । তেওঁ কয় যে বৈদ্যুতিক বাহনৰ বৃদ্ধি মূলতঃ দুচকীয়া আৰু তিনিচকীয়া বাহনৰ দৰে সৰু বাহনৰ দ্বাৰা পৰিচালিত হয়, যিয়ে সামগ্ৰিকভাৱে বেটাৰীৰ চাহিদাত বিশেষ অৰিহণা যোগোৱা নাই ।
তেওঁ কয়, "বেটাৰী উন্নয়নৰ চাহিদাৰ ডাঙৰ অংশ চাৰিচকীয়া বাহনৰ পৰা আহিব লাগে ।"
তেওঁ কয় যে ভাৰতত বৈদ্যুতিক বাহনৰ বিক্ৰী বৃদ্ধিৰ ক্ষেত্ৰত বাধাৰ সৃষ্টি হৈছে যে আভ্যন্তৰীণ দহন ইঞ্জিন থকা বাহনৰ তুলনাত বৈদ্যুতিক বাহনৰ ক্ৰয় ব্যয় বহু বেছি । বৈদ্যুতিক বাহনৰ স্থানীয়কৰণ গুৰুত্বপূৰ্ণ যাতে পৰিসৰৰ অৰ্থনীতি লাভ কৰিব পাৰি আৰু খৰচ হ্ৰাস কৰিব পাৰি । বৈদ্যুতিক বাহনক সমৰ্থন কৰা কাৰ্যসূচীসমূহে যদি স্থানীয় উৎপাদনক সমৰ্থন নকৰে তেন্তে সফল নহ’ব ।
ভাৰতীয় ইভি খণ্ডৰ মূল্যায়নত 2025 চনৰ এছ অ’ ই প্ৰতিবেদনত ভাৰতত উৎপাদন ভিত্তিৰ অনুপস্থিতিৰ ওপৰত আলোকপাত কৰা হৈছে, যিয়ে অন্যথা ইভিৰ উপাদানসমূহ স্থানীয়কৰণত সহায় কৰিব । প্ৰতিবেদনত কোৱা হৈছে যে "থলুৱা গৱেষণা আৰু উন্নয়ন সামৰ্থৰ অগ্ৰগতিৰ লগে লগে স্থানীয়কৰণেহে শক্তি লাভ কৰিব ।"
ৰায়চৌধুৰীয়ে শূন্য নিৰ্গমন বাহন (ZEV)ৰ আদেশৰ প্ৰয়োজনীয়তাৰ ওপৰত আলোকপাত কৰে । তেওঁ কয়, “গ্ৰাহকৰ চাহিদা বৃদ্ধিৰ বাবে এফ এ এম ই আঁচনিৰ দৰে চাহিদা প্ৰৰোচনাৰ উপৰিও নিৰ্মাতাসকলক বজাৰত তেওঁলোকৰ মুঠ বিক্ৰীৰ অংশ হিচাপে নূন্যতম নিৰ্দিষ্ট সংখ্যক জে ই ভি বিক্ৰী কৰাৰ লক্ষ্যও দিব লাগে ।”
লগতে পঢ়ক
