হায়দৰাবাদ: আন্তঃৰাষ্ট্ৰীয় মহাকাশ কেন্দ্ৰত প্ৰায় 9 মাহ কটোৱাৰ পিছত এতিয়া নাছাৰ মহাকাশচাৰী সুনীতা উইলিয়ামছ আৰু বুচ উইলম’ৰে পৃথিৱীলৈ উভতি অহাৰ বাবে যাত্ৰা আৰম্ভ কৰিছে । মহাকাশত আবদ্ধ হৈ থকাৰ সময়ত সুনীতাৰ স্বাস্থ্যক লৈ প্ৰধানমন্ত্ৰী নৰেন্দ্ৰ মোদী চিন্তিত হৈ পৰিছিল বুলি আজি X যোগে জনাই কেন্দ্ৰীয় মন্ত্ৰী জিতেন্দ্ৰ সিঙে ৷ এই সন্দৰ্ভত প্ৰধানমন্ত্ৰী নৰেন্দ্ৰ মোদীয়ে 1 মাৰ্চত সুনীতা উইলিয়ামছলৈ এখন পত্ৰ লিখিছিল । এই পত্ৰত তেওঁ সুনীতাৰ সুৰক্ষাৰ প্ৰতি উদ্বেগ প্ৰকাশ কৰিছিল বুলি আজি অৱগত কৰে মন্ত্ৰী সিঙে ।
জিতেন্দ্ৰ সিঙে কয় যে এই হৃদয়স্পৰ্শী চিঠিখন মহাকাশচাৰী মাইক মাছিমিনোৰ জৰিয়তে সুনীতা উইলিয়ামছলৈ প্ৰেৰণ কৰা হৈছে । কিছুদিন পূৰ্বে প্ৰধানমন্ত্ৰী মোদীয়ে মাছিমিনোক এক অনুষ্ঠানত সাক্ষাৎ কৰিছিল । সেই সময়ত মোদীয়ে তেওঁৰ লগতে ভাৰতীয়ক প্ৰতিনিধিত্ব কৰি এই চিঠিখন সুনীতা উইলিয়ামছক দিবলৈ অনুৰোধ কৰিছিল । প্ৰধানমন্ত্ৰীয়ে তেওঁক নিৰাপদে উভতি অহাৰ বাবে কামনা কৰিছিল । সুনীতা উইলিয়ামছেও আৱেগিক হৈ প্ৰধানমন্ত্ৰী মোদী আৰু ভাৰতৰ প্ৰতি কৃতজ্ঞতা প্ৰকাশ কৰে ।
As the whole world waits, with abated breath, for the safe return of Sunita Williams, this is how PM Sh @narendramodi expressed his concern for this daughter of India.
— Dr Jitendra Singh (@DrJitendraSingh) March 18, 2025
“Even though you are thousands of miles away, you remain close to our hearts,” says PM Sh Narendra Modi’s… pic.twitter.com/MpsEyxAOU9
প্ৰধানমন্ত্ৰী মোদীয়ে তেওঁৰ পত্ৰত উল্লেখ কৰিছিল যে 140 কোটি ভাৰতীয়ই নিজৰ সাফল্যৰ বাবে সদায় গৌৰৱ অনুভৱ কৰে । সকলোৱে নিৰাপদে সুনীতা উইলিয়ামছক ঘৰলৈ উভতি অহাৰ বাবে অপেক্ষা কৰি আছে বুলি উল্লেখ কৰি প্ৰধানমন্ত্ৰী মোদীয়ে পত্ৰখনত লিখিছে, "ভাৰতৰ নাগৰিকৰ হৈ আপোনালোকলৈ মোৰ শুভেচ্ছা জ্ঞাপন কৰিছো । আজি এটা অনুষ্ঠানত মই বিখ্যাত মহাকাশচাৰী মাইক মাছিমিনোক লগ পালো । আমাৰ কথা-বতৰাৰ সময়ত আপোনাৰ প্ৰসংগ ওলাল আৰু আমি আপোনাৰ লগতে আপোনাৰ কামৰ বিষয়ে আলোচনা কৰিলো । এই বৈঠকৰ পিছতে মই আপোনালৈ এখন চিঠি লিখিলো ।"
তেওঁ আৰু পত্ৰখনত কয় যে তেওঁ আমেৰিকা ভ্ৰমণৰ সময়ত উইলিয়ামছৰ স্বাস্থ্যৰ বিষয়ে খবৰ লৈছিল । মোদীয়ে চিঠিখনত উল্লেখ কৰি কয়, "যেতিয়া মই ৰাষ্ট্ৰপতি ট্ৰাম্প আৰু প্ৰাক্তন ৰাষ্ট্ৰপতি বাইডেনক আমেৰিকা ভ্ৰমণৰ সময়ত লগ পাইছিলো, তেতিয়া মই আপোনাৰ স্বাস্থ্যৰ বিষয়ে শুধিছিলো । 140 কোটি ভাৰতীয়ই আপোনাৰ এই কৃতিত্বৰ বাবে সদায় অতি গৌৰৱ অনুভৱ কৰি আহিছে । শেহতীয়া পৰিঘটনাই পুনৰবাৰ আপোনাৰ প্ৰেৰণাদায়ক দৃঢ়তা আৰু অধ্যৱসায়ক প্ৰদৰ্শন কৰিছে ।"
প্ৰধানমন্ত্ৰী মোদীয়ে কয়, "আপুনি হাজাৰ হাজাৰ মাইল দূৰত থাকিলেও আপুনি সদায় আমাৰ হৃদয়ত আছে । ভাৰতৰ জনসাধাৰণে আপোনাৰ সুস্বাস্থ্য আৰু আপোনাৰ অভিযানত সফলতাৰ বাবে প্ৰাৰ্থনা কৰিছে । দীপক ভাইৰ শুভকামনা সদায়ে আপোনাৰ লগত আছে ৷ 2016 চনত আমাৰ আমেৰিকা ভ্ৰমণৰ সময়ত আপোনাক লগ পোৱাৰ কথা মোৰ মনত আছে ।"
প্ৰধানমন্ত্ৰী মোদীয়ে কয়, "আপোনাৰ উভতি অহাৰ পিছত আমি আপোনাক ভাৰতলৈ আদৰণি জনোৱাৰ বাবে আগ্ৰহী । ভাৰতৰ এগৰাকী উজ্জ্বল যুৱতীক আতিথ্য দিয়াটো ভাৰতৰ বাবে এক বৃহৎ আনন্দৰ বিষয় হ’ব । আপোনাৰ আৰু বুচ উইলম'ৰৰ নিৰাপদে উভতি অহাৰ কামনা কৰিলোঁ ।"
সুনীতা উইলিয়ামছ আৰু উইলম’ৰৰ লগতে আন দুজন মহাকাশচাৰীৰ সৈতে আন্তঃৰাষ্ট্ৰীয় মহাকাশ কেন্দ্ৰৰ পৰা উভতি আহিছে নাছাৰ বয়িং ষ্টাৰলাইনাৰ মহাকাশযান । কাইলৈ পুৱাই চাৰিওগৰাকীয়ে পৃথিৱীত অৱতৰণ কৰাৰ সম্ভাৱনা আছে । উইলিয়ামছ আৰু উইলম’ৰৰ সৈতে স্পেচএক্স ক্ৰু 9 ৰ মহাকাশচাৰী নিক হেগ আৰু ৰাছিয়াৰ মহাকাশচাৰী আলেকজেণ্ডাৰ গ’ৰবুনভও আছে ।
উইলিয়ামছ আৰু উইলমৰে 2024 চনৰ 5 জুনত বয়িং ষ্টাৰলাইনাৰত উঠি ISS লৈ যাত্ৰা কৰিছিল । মহাকাশযানখনে কাৰিকৰী সমস্যাৰ সন্মুখীন হৈছিল যাৰ বাবে তেওঁলোকে আই এছ এছত থাকিবলৈ বাধ্য হৈছিল । 2024 চনৰ ছেপ্টেম্বৰ মাহত নাছাই ষ্টাৰলাইনাৰক মানৱবিহীন অৱস্থাত পৃথিৱীলৈ ঘূৰাই আনে যাতে আন মহাকাশযানৰ বাবে ডকিং ষ্টেচনটো মুক্ত হয় ।
এতিয়া 9 মাহৰ পাছত উইলিয়ামছ আৰু উইলম’ৰে ইলন মাস্কৰ স্পেচএক্সৰ কেপচুলত পৃথিৱীলৈ উভতি আহিব ।
লগতে পঢ়ক
