ভাৰতত মুকলি টেছলাৰ প্ৰথমটো শ্ব’ৰুম; ভাৰা প্ৰতিমাহে 35 লাখ টকা
টেছলাই মুম্বাইৰ বান্দ্ৰা কুৰ্লা কমপ্লেক্সত মেকাৰ মেক্সিটিত প্ৰথমটো শ্ব’ৰুম মুকলি কৰিবলৈ ওলাইছে, যিটো প্ৰায় 3 হাজাৰ বৰ্গফুট এলেকাজুৰি বিস্তৃত হ’ব ।
Published : March 2, 2025 at 5:06 PM IST
হায়দৰাবাদ: ইলন মাস্কৰ ইলেক্ট্ৰিক বাহন কোম্পানী টেছলাই মুম্বাইৰ আড়ম্বৰপূৰ্ণ বান্দ্ৰা কুৰ্লা কমপ্লেক্সত ভাৰতত প্ৰথমটো শ্ব’ৰুম মুকলি কৰাৰ চুক্তি চূড়ান্ত কৰিছে । টাইমছ অৱ ইণ্ডিয়াত প্ৰকাশিত এক বাতৰি অনুসৰি বি কে চিৰ এটা বাণিজ্যিক টাৱাৰৰ তলৰ মহলাত টেছলাৰ শ্ব’ৰুমে 4 হাজাৰ বৰ্গফুট মাটিত শ্ব’ৰুম মুকলি কৰিব বুলি জানিব পৰা গৈছে । ইলন মাস্কৰ কোম্পানীয়ে এই বাণিজ্যিক স্থানৰ বাবে সৰ্বাধিক ভাড়া 900 টকা/বৰ্গফুট বা প্ৰতিমাহে প্ৰায় 35 লাখ টকা আগবঢ়াইছে ।
ভাৰতত টেছলাৰ শ্ব'ৰুম
টেছলাই বি কে চিত পাঁচ বছৰৰ বাবে লীজ চূড়ান্ত কৰিছে আৰু কোম্পানীটোৱে দিল্লীৰ এৰ’চিটিত দ্বিতীয়টো শ্ব’ৰুম মুকলি কৰাৰ কাম কৰি থকা বুলি জানিব পৰা গৈছে । মন কৰিবলগীয়া যে আমেৰিকা ভ্ৰমণৰ সময়ত মাস্কে প্ৰধানমন্ত্ৰী নৰেন্দ্ৰ মোদীক সাক্ষাৎ কৰাৰ মাত্ৰ দুসপ্তাহৰ পাছতেই এয়া কাৰ্যকৰী হোৱা পৰিলক্ষিত হৈছে । ইয়াৰ কিছু সময়ৰ পিছতে টেছলাই ভাৰতৰ 13 টা পদৰ চাকৰিৰ তালিকাও প্ৰকাশ কৰে ।
ভাৰতত টেছলাৰ মূল্য
চি এন বি চি-টিভি18 ৰ পূৰ্বৰ এক প্ৰতিবেদন অনুসৰি টেছলাই প্ৰথম অৱস্থাত বাৰ্লিনৰ পৰা গাড়ী আমদানি কৰি ভাৰতত বিক্ৰী কৰাৰ কথা চিন্তা কৰিছে । টেছলাৰ প্ৰাৰম্ভিক পৰিকল্পনা হৈছে ভাৰতলৈ 25 হাজাৰ ডলাৰৰ কম মূল্যত বৈদ্যুতিক বাহন অনা ।
মন কৰিবলগীয়া যে, আমেৰিকাত টেছলা গাড়ীৰ মূল্য কাৰখানা পৰ্যায়ত 35 হাজাৰ ডলাৰ (প্ৰায় 30.4 লাখ টকা)ৰ পৰা আৰম্ভ হয় । টেছলা মডেল 3 হৈছে কোম্পানীটোৰ আমেৰিকাৰ আটাইতকৈ সস্তা গাড়ী ।
মাস্কে এতিয়াও ভাৰতত উৎপাদনৰ প্ৰতিশ্ৰুতি দিয়া নাই যদিও টেছলাই ভাৰতৰ পৰা 1 বিলিয়ন ডলাৰৰ ওপৰৰ উপাদান ক্ৰয় কৰিব বুলি কোৱা হৈছে আৰু অনাগত মাহত এই সংখ্যা যথেষ্ট বৃদ্ধি পোৱাৰ সম্ভাৱনা আছে ।
লগতে পঢ়ক
