আমেৰিকা-চীনৰ শুল্ক যুদ্ধ: চেন্নাই বিমানবন্দৰৰ পৰা প্ৰেৰণ কৰা হ’ল 600 টন আইফোন
আমেৰিকাৰ টেক জায়ান্ট এপলে জৰুৰীভাৱে ভাৰতৰ চেন্নাই বিমানবন্দৰৰ পৰা আমেৰিকালৈ প্ৰায় 600 টন আইফোন বিমানেৰে লৈ গৈছে । আঁৰৰ কাৰণ কি ?
Published : April 12, 2025 at 5:05 PM IST
হায়দৰাবাদ: প্ৰযুক্তি জগতত আলোড়ন সৃষ্টি কৰিছে এটা শেহতীয়া খবৰে । আমেৰিকাৰ ৰাষ্ট্ৰপতি ড’নাল্ড ট্ৰাম্পে আৰোপ কৰা গধুৰ শুল্কৰ পৰা হাত সাৰিবলৈ এপলে ভাৰতৰ পৰা 600 টন আইফোন প্ৰেৰণ কৰিছে । খবৰ অনুসৰি এই আইফোনসমূহ বিশেষ এয়াৰ কাৰ্গো বিমানৰ জৰিয়তে আমেৰিকালৈ প্ৰেৰণ কৰা হৈছে ।
চীনত নিৰ্মিত সামগ্ৰীৰ ওপৰত আমদানি শুল্ক পৰিহাৰ কৰিবলৈ এপলে ভাৰতৰ পৰা প্ৰায় 600 টন আইফোন আমেৰিকালৈ বিমানেৰে লৈ যোৱা হৈছে বুলি ৰয়টাৰে প্ৰকাশ কৰিছে । চীনৰ ওপৰত নিৰ্ভৰশীলতা হ্ৰাস কৰাৰ লগতে আমেৰিকাৰ ৰাষ্ট্ৰপতি ড’নাল্ড ট্ৰাম্পে ঘোষণা কৰা শুল্ক বৃদ্ধি প্ৰতিহত কৰিবলৈ ভাৰতত উৎপাদন বৃদ্ধি কৰাৰ সময়তে এই পদক্ষেপ গ্ৰহণ কৰা হৈছে । টেক জায়ান্ট কোম্পানীটোৱে ছখন কাৰ্গো বিমান ব্যৱহাৰ কৰি ভাৰতৰ পৰা প্ৰায় 15 লাখ আইফোন বিমানেৰে লৈ গৈছে ।
তামিলনাডু ৰাজ্যৰ চেন্নাই বিমানবন্দৰৰ পৰা এই আইফোনসমূহ আমেৰিকালৈ লৈ যোৱা হৈছে । এপলে ইয়াত ইয়াৰ নিৰ্মাণ অংশীদাৰ ফক্সকন আৰু টাটাৰ সৈতে আইফোন নিৰ্মাণ কৰে । এই তথ্য ৰয়টাৰে লাভ কৰাৰ বিপৰীতে এই সন্দৰ্ভত এপল বা ভাৰতৰ অসামৰিক বিমান পৰিবহণ মন্ত্ৰণালয়ৰ পৰা কোনো তথ্য লাভ কৰা হোৱা নাই ।
কিয় এয়া কৰা হ’ল ?
ট্ৰাম্পে আমদানি শুল্ক ঘোষণা কৰাৰ পূৰ্বে খৰচৰ পৰা হাত সাৰিবলৈ এপলে এই বৃহৎ চালান কৰিছে । ইফালে আমেৰিকাই চীনৰ সামগ্ৰীৰ আমদানি শুল্ক 125% লৈ বৃদ্ধি কৰিছে । ইফালে আমেৰিকাই ভাৰতৰ ওপৰত 26% শুল্ক আৰোপ কৰিছে যদিও আমেৰিকাই 90 দিনৰ বাবে স্থগিতাদেশ ৰাখিছে ।
এই প্ৰক্ৰিয়া ক্ষীপ্ৰ কৰিবলৈ এপলে ভাৰতীয় বিমানবন্দৰ কৰ্তৃপক্ষক অনুৰোধ জনাইছিল যে চেন্নাই বিমানবন্দৰত শুল্ক (পৰিদৰ্শন প্ৰক্ৰিয়া)ৰ বাবে লোৱা সময় 30 ঘণ্টাৰ পৰা মাত্ৰ 6 ঘণ্টালৈ হ্ৰাস কৰা হওক । এই অনন্য ব্যৱস্থাটোক ‘গ্ৰীণ কৰিডৰ’ বুলি অভিহিত কৰা হৈছে, আনহাতে চীনতো একেধৰণৰ প্ৰক্ৰিয়া দেখা গৈছে ।
ট্ৰাম্পৰ শুল্ক আৰু ইয়াৰ প্ৰভাৱ
চীনৰ পৰা আমদানি কৰা সামগ্ৰীৰ ওপৰত শুল্ক 54%ৰ পৰা 125%লৈ বৃদ্ধি কৰিলে ট্ৰাম্প প্ৰশাসনে । ইয়াৰ প্ৰত্যক্ষ প্ৰভাৱ পৰিছিল চীনত বৃহৎ যোগান শৃংখল থকা এপলৰ দৰে কোম্পানীৰ ওপৰত । শুল্ক বৃদ্ধিৰ ফলত আইফোন 16 প্ৰ’ মেক্সৰ দৰে হাই-এণ্ড ডিভাইচৰ মূল্য 1599 ডলাৰৰ পৰা 2300 ডলাৰলৈ বৃদ্ধি পালেহেঁতেন । গতিকে এপলে ভাৰতক বিকল্প হিচাপে বাছি লৈ দ্ৰুতগতিত ৰপ্তানি কৰিবলৈ আৰম্ভ কৰিলে । ভাৰতৰ পৰা আমদানি কৰা সামগ্ৰীৰ ওপৰত মাত্ৰ 26% শুল্ক, যিটো চীনতকৈ বহু কম । এই কাৰণেই এপলে ভাৰতৰ পৰা পোনপটীয়া চালান পছন্দ কৰিছে ।
ভাৰত এপলৰ নতুন উৎপাদন কেন্দ্ৰ হ’ব নেকি ?
এপলৰ যোগান শৃংখলত ভাৰতৰ অংশীদাৰিত্ব অহৰহ বৃদ্ধি পাইছে । কাউণ্টাৰপইণ্ট ৰিচাৰ্চৰ তথ্য অনুসৰি আমেৰিকালৈ মুঠ আইফোন আমদানিৰ এক পঞ্চমাংশ ভাৰতৰ পৰা আমদানি কৰা হয় । এপলৰ মূল অংশীদাৰ ফক্সকন আৰু টাটাই এতিয়া ভাৰতত একেলগে কাম কৰি আছে । একেলগে তেওঁলোকৰ তিনিটা কাৰখানা আছে আৰু দুটা নতুন কাৰখানা নিৰ্মাণৰ কাম চলি আছে । এপলে ভাৰত চৰকাৰৰ পৰা সম্পূৰ্ণ সমৰ্থন লাভ কৰিছে ৷
লগতে পঢ়ক
