হস্ততাঁত শিল্প পৰ্যটন গাঁৱৰ শিপিনীৰ দুৰৱস্থা; লাভ কৰা নাই এড়ী কাপোৰৰ উচিত বজাৰ-মূল্য
ভাৰত চৰকাৰৰ বস্ত্ৰ মন্ত্ৰণালয়ৰ দ্বাৰা স্বীকৃতিপ্ৰাপ্ত এখন হস্ততাঁত শিল্প পৰ্যটন গাঁৱৰ শিপিনীৰ দুৰৱস্থা ! উপযুক্ত বজাৰ-দামৰ অভাৱত বাকচতে পৰি ৰৈছে লাখ টকাৰ এড়ী কাপোৰ ।
Published : June 18, 2025 at 2:12 PM IST
গোলাঘাট : ভাৰত চৰকাৰৰ বস্ত্ৰ মন্ত্ৰণালয়ৰ দ্বাৰা স্বীকৃতিপ্ৰাপ্ত এখন গাঁও । এই গাঁওখন হৈছে কাজিৰঙা ম'হপৰা হস্ততাঁত শিল্প পৰ্যটন গাঁও । কিন্তু এতিয়া এই হস্ততাঁত শিল্প পৰ্যটন গাঁৱৰ শিপিনীসকল সংকটত পৰিছে ।
এইগৰাকী হৈছে আদৰ্শ শিপিনী অঞ্জলি গগৈ । অঞ্জলি গগৈয়ে কাজিৰঙালৈ অহা দেশী-বিদেশী পৰ্যটকক বিভিন্ন সময়ত যোগান ধৰি আহিছে নিজে বোৱা কাপোৰ । কিন্তু উপযুক্ত বজাৰ দাম নোপোৱাৰ বাবে বাকচতে পৰি ৰৈছে লাখ লাখ টকাৰ নিজহাতে সূতা কাটি বোৱা এড়ী কাপোৰ ।
এড়ী কাপোৰৰ মোল নুবুজা লোকে দিব নিবিচাৰে প্ৰকৃত মূল্য । ফলত গাঁঠিৰ ধন ভাঙি নিজহাতে সূতা কাটি বোৱা এড়ী কাপোৰৰ প্ৰকৃত মূল্যৰ পৰা বঞ্চিত হৈছে বুলি জনাইছে শিপিনী অঞ্জলি গগৈয়ে ।
কাজিৰঙাৰ আদৰ্শ শিপিনী অঞ্জলি গগৈয়ে ২০ বছৰে এড়ীপলু পালন কৰি, নিজহাতে সূতা কাটি বৈ আহিছে এড়ী কাপোৰৰ উপৰিও গামোচা, চাদৰ-মেখেলা, টঙালি আদি অসমীয়া সাজপাৰ ।
আনহাতে, কাজিৰঙা ম'হপৰা হস্ততাঁত শিল্প পৰ্যটন গাঁৱৰ শিপিনী অঞ্জলি গগৈয়ে বহু কাকুতি-মিনতি কৰিও আজিলৈকে নাপালে সহজে পলু সূতা কাটিব পৰা এটা যন্ত্ৰ ! নাপালে নিজহাতেৰে সূতা কাটি বোৱা কাপোৰ বিক্ৰীৰ বাবে উপযুক্ত বজাৰ ! পোৱা নাই নিজে বোৱা অসমীয়াৰ স্বাভিমান এড়ী কাপোৰৰ উচিত মূল্য । ফলত এড়ী সূতা কটা এটা আধুনিক যন্ত্ৰৰ বাবে তেওঁ চৰকাৰলৈ অনুৰোধ জনাইছে ।
এই সম্পৰ্কে শিপিনী অঞ্জলি গগৈয়ে কয়, "বৰ্তমান বজাৰ নাই, য'ত মই এই কাপোৰ বিক্ৰী কৰিব পাৰো । মই বেছিভাগ এড়ী শ্বল, কাপোৰ, গামোচা, চাদৰ, মেখেলা আদি ঘৰতে এড়ী পালন কৰি নিজে সূতা কাটি নিজে তৈয়াৰ কৰাৰ লগতে লগতে এড়ী পলু বিক্ৰী কৰো । ইয়াৰ পৰা মই যথেষ্ট উপকৃত হৈছো । চৰকাৰক আধুনিক যন্ত্ৰৰ বাবে আবেদন কৰিছিলো । কিন্তু আজিলৈকে লাভ কৰা নাই । প্ৰতিবাৰেই কেৱল মাত্ৰ আশ্বাস দিয়ে, কিন্তু এতিয়ালৈকে দিয়া নাই ।"
