কিতাপ আৰু পাঠকৰ সম্পৰ্ক সুদৃঢ় কৰাৰ উদ্দেশ্যৰে নগাঁৱত বিশ্ব গ্ৰন্থ দিৱস উদযাপন - World Book Day 2024

নগাঁও,২৩ এপ্ৰিল: আজি বিশ্ব গ্ৰন্থ দিৱস । 'উৎস মাতৃভাষা'ৰ উদ্যোগত অসমীয়া গ্ৰন্থ আৰু পাঠকৰ সম্পৰ্ক শক্তিশালী কৰাৰ উদ্দেশ্যে মঙলবাৰে নগাঁও চহৰৰ শ্বহীদ ভৱনত দিনজোৰা কাৰ্যসূচীৰে বিশ্ব গ্ৰন্থ দিৱস পালন পালন কৰা হয় ৷ অনুষ্ঠানত মহাবিদ্যালয়-বিশ্ববিদ্যালয়ৰ বাৰ্ষিক আলোচনী আৰু ক্ষুদ্ৰ আলোচনীৰ প্ৰদৰ্শনী, টেবুল গ্ৰন্থমেলাৰ উদ্বোধন কৰে নগাঁও ছোৱালী কলেজৰ অধ্যক্ষ ড৹ কুলেন চন্দ্ৰ দাসে ।

নগাঁৱত উৎস মাতৃভাষাৰ উদ্যোগত বিশ্ব গ্ৰন্থ দিৱস

নিজৰ ভাষণত কুলেন দাসে কয় যে 'উৎস মাতৃভাষা'ই অনুষ্ঠিত কৰা বিশ্ব গ্ৰন্থ দিৱসৰ মূল উদ্দেশ্য হৈছে কিতাপ আৰু পাঠকৰ সম্পৰ্ক সুদৃঢ় কৰা । ১৯৯৫ চনৰ পৰা গোটেই বিশ্বজুৰি পালন কৰি অহা এই দিৱসটো কিন্তু অসমত পালন কৰাৰ খবৰ বৰকৈ পোৱা নাযায় । সেই অৰ্থত গ্ৰন্থ লটাৰীৰ লগতে, গ্ৰন্থ সমালোচনা আৰু কলেজৰ আলোচনী প্ৰতিযোগিতা অনুষ্ঠিত কৰা 'উৎস মাতৃভাষা'ৰ এই অনুষ্ঠান হৈছে এক অনন্য অনুষ্ঠান ।

অসমীয়া ভাষাৰ কিতাপৰ পাঠক নাই বুলি অহৰহ সমালোচনা হৈ থকাৰ সময়ত গ্ৰন্থ দিৱস উপলক্ষে অনুষ্ঠিত কৰা বিভিন্ন প্ৰতিযোগিতাৰ প্ৰতিযোগীসকলে উদ্যোক্তাৰ আশা বঢ়াই তুলিছে বুলি ভাষণত উল্লেখ কৰে । নৱম দশম শ্ৰেণীৰ ছাত্ৰ-ছাত্ৰীয়ে সুন্দৰকৈ একো একোখন উপন্যাসৰ সমালোচনা আগবঢ়োৱাটো অত্যন্ত ইতিবাচক খবৰ বুলি তেওঁ উল্লেখ কৰে ।

ইপিনে পুৱা ১০-৩০ বজাৰ অসমত প্ৰথমবাৰৰ বাবে অনুষ্ঠিত গ্ৰন্থ কুইজৰ উদ্বোধনী ভাষণ ৰাখে অসমৰ বিশিষ্ট লেখক ৰবেন্দ্ৰ কুমাৰ দাস আৰু কুইজ পৰিচালক চন্দ্ৰজিৎ দাসে ৷ নয়নমণি হীৰাৰ তত্বাৱধানত প্ৰয়াত অণিমা শৰ্মা বৰুৱা সোঁৱৰণী গ্ৰন্থ কুইজত অসমৰ মহাবিদ্যালয়-বিশ্ববিদ্যালয়,বিদ্যালয়ৰ প্ৰায় শতাধিক ছাত্ৰ-ছাত্ৰীয়ে অংশগ্ৰহণ কৰে ৷ বিজয়ীসকলক নগদ ধন, গ্ৰন্থৰ টোপোলা, ট্ৰফী, মানপত্ৰ বিতৰণ কৰা হয় ৷ লগতে গ্ৰন্থ লটাৰী বিজয়ী ৪৫ জনক গ্ৰন্থৰ টোপোলা আগবঢ়োৱা হয় ৷

অসম ভিত্তিত গ্ৰন্থ সমালোচনাত ক্ৰমে তেজপুৰৰ কিশোৰ দাস, নৰ্থ লক্ষিমপুৰৰ আকাংক্ষা তামুলী আৰু ঢকুৱাখানাৰ অংশুমান কোচে প্ৰথম, দ্বিতীয় আৰু তৃতীয় বঁটা লাভ কৰে ৷ প্ৰয়াত মোহন চন্দ্ৰ বৰা সোঁৱৰণী মহাবিদ্যালয়-বিশ্ববিদ্যালয় বাৰ্ষিক আলোচনী প্ৰতিযোগিতাত নৰ্থ লখিমপুৰ কলেজে প্ৰথম,নগাঁও ছোৱালী কলেজে দ্বিতীয় আৰু দুলীয়াজান মহাবিদ্যালয় আৰু কটন বিশ্ববিদ্যালয়ে যুটীয়াভাৱে তৃতীয় স্থান আৰু নলবাৰী কলেজে শ্ৰেষ্ঠ বেটুপাতৰ সন্মান লাভ কৰে ৷

বিয়লি বিৰিঞ্চি কুমাৰ বৰুৱা মহাবিদ্যালয়ৰ উপাধ্যক্ষ কমল শইকীয়াৰ সঞ্চালনাত অনুষ্ঠিত আলোচনা চক্ৰত ড৹ পৰমানন্দ মজুমদাৰ, ড৹ দেৱব্ৰত শৰ্মা, জ্যোতি খাটনিয়াৰে গ্ৰন্থ আৰু পাঠকৰ সম্পৰ্ক, বৌদ্ধিক উৎকৰ্ষ সাধনত ক্ষুদ্ৰ আলোচনীৰ ভূমিকা, অধ্যয়ন আৰু সঁহাৰি, দৰ্শক আৰু পঢ়ুৱৈ শীৰ্ষক বক্তৃতাৰে নগঁঞা সুধী সমাজক আপ্লুত কৰে ৷ অনুষ্ঠানত বিশ্ব গ্ৰন্থ দিৱসৰ আয়োজক সমিতিৰ কৌশিক নন্দন বৰুৱা, নয়নমণি হীৰা, মাহফুজা, স্মৃতা হীৰা, প্ৰাণোৎজ্বল বৰা, মৃন্ময় শইকীয়া, প্ৰণৱ শৰ্মা, স্নেহা বসুমতাৰী, সংগীতা শইকীয়াই কৃতজ্ঞতা জ্ঞাপন কৰে ৷

লগতে পঢ়ক: বিশ্ব গ্ৰন্থ আৰু কপিৰাইট দিৱস - World Book And Copyright Day