গুৱাহাটী : গুৱাহাটী মহানগৰীৰ বেলতলাত অঘটন । বেলতলা বজাৰৰ গাৰ্ড ৱাল খহি পৰি এগৰাকী মহিলাৰ মৃত্যু হোৱাৰ লগতে গুৰুতৰভাৱে আঘাতপ্ৰাপ্ত হয় কেইবাগৰাকীও লোক । মৃত মহিলাগৰাকী সোণাপুৰৰ অঞ্জু ৰংপি বুলি জানিব পৰা গৈছে । আনহাতে, আন তিনিগৰাকী লোক আহত হয় ।
বেলতলা বজাৰৰ মাজত সংঘটিত হয় এই ঘটনা । প্ৰত্যক্ষদৰ্শীয়ে জনোৱা অনুসৰি, বৃহস্পতিবাৰে দিনৰ প্ৰায় ২.৩০ বজাত হঠাৎ পিছফালে থকা ৩০ মিটাৰৰ এখন গাৰ্ড ৱাল বজাৰৰ ব্যসায়ীসকলৰ গাত খহি পৰে । লগে লগে বজাৰখনত হুৱাদুৱা লাগি পৰে । পিছত স্থানীয় ক্ৰেতা-বিক্ৰেতাসকলে ভাগি যোৱা গাৰ্ড ৱালখন দাঙি তাৰ তলত আবদ্ধ হৈ থকা আহত লোকসকলক উদ্ধাৰ কৰি ওচৰতে থকা এজাইল হাস্পতালত ভৰ্তি কৰায় ।
ইয়াৰে ভিতৰত দুগৰাকী মহিলাক সংকটজনক অৱস্থাত গুৱাহাটী চিকিৎসা মহাবিদ্যালয়ত ভৰ্তি কৰোৱা হয় যদিও অঞ্জু ৰংপি নামৰ মহিলগৰাকীৰ মৃত্যু হয় । এই ঘটনাৰ পিছতে স্থানীয় ৰাইজে জি এম চিৰ ওপৰত ক্ষোভিত হৈ পৰে ।
আনহাতে, দুৰ্ঘটনাটোৰ পিছতে ঘটনাস্থলীত উপস্থিত হৈ অসম প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰে ঘটনাৰ বুজ লোৱাৰ লগতে নিহত আৰু আহতসকলৰ দায়িত্ব চৰকাৰক গ্ৰহণ কৰিবলৈ দাবী জনায় । লগতে তেওঁ কয় যে চৰকাৰ, জি এম চিয়ে এই বজাৰখনৰ পৰা কমিছন ঠিকেই ল'ব জানে, কিন্তু বজাৰখনত থাকিবলগীয়া সকলো সা-সুবিধাৰ কথাত গুৰুত্ব নিদিয়ে ।
আজিৰ এই ঘটনা কিহৰ বাবে হ'ব পালে বুলিও তেওঁ প্ৰশ্ন উত্থাপন কৰে । বিভাগীয় কৰ্তৃপক্ষই যদি এইবোৰ দিশ চোৱাচিতা কৰিলেহেঁতেন তেন্তে এনে ধৰণৰ ঘটনা নঘটিলহেঁতেন বুলিও তেওঁ মন্তব্য কৰে । ইয়াৰ উপৰি বজাৰখনত ক্ৰেতা-বিক্ৰেতাসকলৰ সুবিধাৰ বাবে এটা প্ৰস্ৰাৱগাৰৰ ব্যৱস্থা নাই বুলিও অভিযোগ কৰে ।
কংগ্ৰেছ নেত্ৰী মীৰা বৰঠাকুৰে কয়, "বেলতলা বজাৰ এখন বৃহৎ বজাৰ । সপ্তাহত দুদিনকৈ বহে । আৰু ইয়াৰ পৰা বৈধ আৰু অবৈধভাৱে দুটা কালেকচন হয় । আমাৰ হাতত হিচাপ থাকে । কাৰণ মই এই গোটেই বেলতলা বজাৰত আহি মানুহৰ সুখে-দুখে, চি এম আহিব বুলি ক'লে যেতিয়া বন্ধ দিয়ে তেতিয়াও মানুহৰ সুখৰ-দুখৰ খবৰ ল'বলৈ ইয়াত আহো । বেলতলা বজাৰত আজি বহু দিনৰ পৰা বজাৰ কমিটীয়ে এই গাৰ্ড ৱাল প্ৰটেকচনৰ কথা কৈ আছে । কালেকচনটো ঠিকে কৰিছে কিন্তু প্ৰটেকচনটো এওঁলোকে দিব পৰা নাই । দুটা কালেকচন হয় । এটা ৰেজিষ্টাৰ্ড কালেকচন হয় ফৰ জি এম চি । আনহাতে, গুণ্ডা টেক্সৰ নিচিনা আন এটা আনৰেজিষ্টাৰ্ড কালেকচন হয় ।"
তেওঁ লগতে কয়, "আজি জি এম চিৰ যিজন মেয়ৰ তাৎক্ষণিকভাৱে ইয়াত উপস্থিত হ'ব লাগিছিল । কাৰণ কালেচনৰ ভাগ তেওঁলোকলৈও যায় বুলি আমি শুনো । সঁচা-মিছা মই নাজানো । আমাৰ হাতত খবৰ আছে । গতিকে মই এটা কথা ক'ব বিচাৰিছো, সব কা সাথ, সবকা বিকাশৰ কথা সবে কয় । কিন্তু বিকাশৰ তলত যে ফোঁপোলা, এই যেনেকে গাৰ্ড ৱালৰ তলত যে কোনোধৰণৰ ব্যৱস্থা নাই, তেনেদৰে গোটেই বিজেপি চৰকাৰৰ দিনৰ বিকাশটো হৈছে তলত ফোঁপোলা, ওপৰত ৰং-চং দিয়া ।"
উল্লেখ্য যে, প্রত্যেক সপ্তাহৰ বৃহস্পতিবাৰ আৰু দেওবাৰে অনুষ্ঠিত হয় বেলতলা বজাৰ । দুয়োটা বাৰতে বিভিন্ন সামগ্ৰী লৈ বিভিন্ন স্থানৰ পৰা বেলতলা বজাৰলৈ আহে ব্যৱসায়ীসকল । ইয়াৰে ভিতৰত বহুসংখ্যক মহিলা ব্যৱসায়ীও আছে ।
