নোহোৱা হ’ল ঘোঁৰাগাড়ী; গৰাকীবিহীন ঘোঁৰাই অনাই-বনাই চৰিছে জোনাইৰ চিমেন চাপৰিত
গৰাকীবিহীন ঘোঁৰাৰ ত্ৰাস জোনাইৰ চিমেন চাপৰিত । চেৰেন সোণোৱাল গাঁৱত ৰাইজে বন বিভাগক গতালে পাঁচটা ঘোঁৰা ।
Published : June 18, 2025 at 12:55 PM IST
জোনাই : আধুনিকতাৰ প্ৰভাৱত সমাজৰ পৰা অতীত হৈ পৰিল এসময়ৰ বহুল ব্যৱহৃত ঘোঁৰাগাড়ী ৷ কেইবছৰ মান আগলৈকে যাতায়তৰ লগতে স্থানীয় লোকসকলৰ ব্যৱসায়-বাণিজ্যৰ বাবে ঘোঁৰাগাড়ী আছিল যোগাযোগৰ মাধ্যম ৷ যান-বাহনৰ ব্য়াপক প্ৰচলনৰ লগে লগে এসময়ত ঘৰ শুৱনি কৰা আপোন ঘোঁৰা এতিয়া এলাগী হৈ পৰিল ৷
এসময়ত এঠাইৰ পৰা আন ঠাইলৈ বিভিন্ন সামগ্ৰী কঢ়িয়াবলৈ আনকি পথাৰৰ পৰা ধানৰ ডাঙৰী কঢ়িয়াবলৈয়ো গৰু গাড়ীৰ সমান্তৰালকৈ ঘোঁৰাই টনা গাড়ী ব্যৱহাৰ কৰা হৈছিল; কিন্তু ইন্ধন চালিত বাহনৰ বহুল ব্যৱহাৰৰ লগে লগে ক্ৰমাৎ অতীত হৈ পৰিল ঘোঁৰাগাড়ী ৷ এই গাড়ীৰ ব্যৱহাৰ নোহোৱা হৈ পৰাত একাংশ ঘোঁৰাৰ গৰাকীয়ে পোহপাল তথা যত্ন ল’ব নোৱৰাৰ বাবে পোহনীয়া ঘোঁৰা বাটে-পথে এৰি দিবলৈ ধৰিলে ৷ ফলত গৰাকীবিহীন ঘোঁৰাসমূহে য’তে যেনেকৈ পাৰে তাতেই আশ্ৰয় ল’বলৈ ধৰিলে ৷
এই গৰাকীবিহীন ঘোঁৰাসমূহে বিভিন্ন বনাঞ্চলত আশ্ৰয় লোৱাৰ সমান্তৰালভাৱে কিছু সংখ্যকে জনাঞ্চলতো আশ্ৰয় লোৱা পৰিলক্ষিত হৈছে ৷ কিন্তু জনাঞ্চলত আশ্ৰয় লোৱা এই ঘোঁৰাসমূহে শেহতীয়াকৈ অঞ্চলসমূহত ৰাইজৰ খেতি-বাতি নষ্ট কৰি এক আতংকময় পৰিৱেশৰ সৃষ্টি কৰিছে । ইয়াৰ মাজতেই জোনাই সমজিলাৰ চিমেন চাপৰি আৰক্ষী থানাৰ অন্তৰ্গত চিমেন চাপৰি চেৰেন সোণোৱাল গাঁৱত গৰাকীবিহীন পোৱালিসহ পাঁচটা ঘোঁৰা উদ্ধাৰ কৰে স্থানীয় ৰাইজে ।
এই সন্দৰ্ভত স্থানীয় ৰাইজে কয়, "গৰাকীবিহীন এই ঘোঁৰাকেইটাই বিগত ৪-৫ বছৰ ধৰি চিমেন চাপৰি চেৰেন সোণোৱাল, মাণিকপুৰ, মাছখোৱা, হাংমা চাপৰি, হছঙকে ধৰি কেইবাখনো গাঁৱৰ ৰাইজৰ খেতি-বাতি, কঠিয়া, ধান নষ্ট কৰি এক প্ৰকাৰ ত্ৰাসৰ সৃষ্টি কৰি আহিছে ৷ দিনক দিনে ঘোঁৰাকেইটাই খেতি-বাতি বেছিকৈ নষ্ট কৰাত সোমবাৰে ৪-৫ খন গাঁৱৰ স্থানীয় ৰাইজৰ সহযোগত পোৱালিসহ পাঁচটা ঘোঁৰা জব্দ কৰে ।"
ইয়াৰ পিছতে স্থানীয় ৰাইজে চিমেন চাপৰি থানাৰ আৰক্ষীক খবৰ দিয়ে । আৰক্ষীৰ খবৰৰ ভিত্তিত জোনাই আঞ্চলিক বন বিভাগৰ বিষয়া দেৱব্ৰত গগৈয়ে উপস্থিত হৈ চমজি লৈ ঘোঁৰাকেইটা জোনাই কবু চাপৰিত মেলি দিয়া ব্যৱস্থা কৰা হ'ব বুলি কয় ।
আঞ্চলিক বন বিভাগৰ বিষয়াগৰাকীয়ে কয়, "এই গাঁওখনৰ এজন লোকে মোক খবৰ দিয়ে যে ৰাইজে পাঁচটা ঘোঁৰা জব্দ কৰিছে । এতিয়া ঘোঁৰাকেইটাৰ সুৰক্ষাৰ বাবে চিন্তা কৰা হৈছে । কবু চাপৰিত ঘোঁৰাৰ আবাসস্থল আছে । এই ঘোঁৰাকেইটাক তালৈ নিয়াৰ কথা ভাবিছো ।"
