বিভিন্ন আঁচনিয়েও কিয় ৰোধ কৰিব পৰা নাই ড্ৰ'প আউট: উদ্বিগ্ন অসম চৰকাৰে অধ্যয়নৰ বাবে গঠন কৰিলে টীম
ড্ৰপ আউটে চিন্তাত পেলাইছে অসম চৰকাৰক । বহুমুখী আঁচনিয়েও ৰোধ কৰিব পৰা নাই ড্ৰপ-আউট ।
Published : July 1, 2025 at 6:51 PM IST
গুৱাহাটী: অসম চৰকাৰে বিভিন্ন অভিলাষী আঁচনি ৰূপায়ণ কৰাৰ পাছতো ৰাজ্যখনত আধাতে বিদ্যালয় ত্যাগ কৰা তথা ড্ৰপ-আউটৰ সংখ্যা হ্ৰাস পোৱা নাই । এই প্ৰক্ৰিয়া পূৰ্বৰ দৰেই অব্যাহত আছে । ৰাজ্য চৰকাৰে স্ত্রী শিক্ষাৰ ওপৰত গুৰুত্ব আৰোপ কৰাৰ লগতে অৰ্থনৈতিক বাধা দূৰ কৰাৰ বাবে 'নিযুত মইনা' আঁচনিকে ধৰি শিক্ষাৰ্থীসকলৰ সুবিধাৰ প্ৰতি লক্ষ্য ৰাখি বিভিন্ন আঁচনি ৰূপায়ণ কৰিছে । যাতে কোনেও বিদ্যালয়লৈ যোৱাৰ ক্ষেত্রত কোনো ধৰণৰ বাধাৰ সন্মুখীন নহয় ।
কিন্তু চৰকাৰে বহুকেইখন গুৰুত্বপূৰ্ণ আঁচনি ৰূপায়ণ কৰাৰ পাছতো এই ড্ৰপ-আউটৰ হাৰ হ্ৰাস কৰিবলৈ সক্ষম হোৱা নাই । যাক লৈ উদ্বিগ্নতা প্ৰকাশ কৰিছে ৰাজ্য চৰকাৰে । বিশেষকৈ অষ্টম শ্ৰেণীৰ পৰা দশম শ্ৰেণীলৈ উদ্বেগজনকভাৱে বৃদ্ধি পোৱা ড্ৰপ-আউটৰ প্ৰতি লক্ষ্য ৰাখি চৰকাৰে 'নিযুত মইনা' আঁচনি আৰম্ভ কৰিছিল । যাতে শিক্ষাৰ্থীসকলৰ শৈক্ষিক দিশত কোনো ধৰণৰ অৰ্থনৈতিক আৰু সামাজিক বাধা নাথাকে ।
শেহতীয়াকৈ ৰাজ্য চৰকাৰৰ বিদ্যালয় শিক্ষা বিভাগে ড্ৰপ-আউটৰ কাৰণ সন্দৰ্ভত বিশদ অধ্যয়ন কৰাৰ বাবে এটা টীম গঠন কৰি দিছে । ড্ৰপ-আউটৰ সকলো দিশৰ ওপৰত দলটোৱে এটা বিশদ অধ্যয়ন কৰিব । দলটোৱে ড্ৰপ-আউট হোৱাৰ সম্ভাৱনা থকা পৰ্যায়সমূহ চিনাক্ত কৰাৰ লগতৰ শ্ৰেণীৰ দ্বাৰা বিভাজিত তথ্য, লিংগ, ভূগোল আৰু আৰ্থ-সামাজিক অৱস্থা আদি দিশসমূহ অধ্যয়ন কৰি ইয়াৰ আঁৰৰ মূল কাৰণসমূহৰ মূল্যায়ন কৰিব ।
বিস্তৃত অধ্যয়নৰ ভিত্তিত দলটোৱে এখন মূল্যায়ন প্ৰতিবেদন দাখিল কৰিব । লক্ষণীয় বিষয় যে মুখ্যমন্ত্রী হিমন্ত বিশ্ব শৰ্মাৰ নিৰ্দেশনাত অধ্যয়ন কৰাৰ বাবে এই দলটো গঠন কৰা হৈছে । এই দলটোৰ প্ৰতিবেদনৰ ভিত্তিত অসম চৰকাৰে পৰৱৰ্তী পদক্ষেপ গ্ৰহণ কৰিব । দলটোৱে অধ্যয়ন চলাই ১৫ আগষ্টৰ ভিতৰত প্ৰতিবেদন দাখিল কৰিব লাগিব । বিদ্যালয় শিক্ষা বিভাগে গঠন কৰা দলটোত অধ্যক্ষ হিচাপে আছে বিদ্যালয় শিক্ষা বিভাগৰ অতিৰিক্ত সচিব কৃষ্ণা বৰুৱা । আন সদস্যসকল হৈছে ক্ৰমে খনীন্দ্ৰ দাস, টিটু গগৈ, দীপিকা চৌধুৰী, পিয়ানু বৰুৱা, অপৰাজিতা চৌধুৰী আৰু ইন্দ্ৰনাথ চেটাৰ্জী ।
চৰকাৰী বিদ্যালয়ত হ্ৰাস পাইছে শিক্ষাৰ্থীৰ সংখ্যা :
অসমত বিদ্যালয়ৰ পৰা হঠাৎ অন্তৰ্ধান হৈছে ৬ লাখ ২৯৭ গৰাকী শিক্ষার্থী । ২০২৩ বৰ্ষত ‘ইউনিফাইড ডিষ্ট্রিক্ট ইনফর্মেশ্যন ছিষ্টেম ফর্ম এডুকেশ্যন প্লাছ'(ইউডাইছ) পৰ্টেলত অসমৰ প্ৰায় ৩২ লাখ শিক্ষাৰ্থীৰ নাম পঞ্জীয়ন হৈছিল । কিন্তু ২০২৪ বৰ্ষত নাম পঞ্জীয়ন কৰাৰ সময়ত ৬,০০,২৯৭ গৰাকী শিক্ষাৰ্থীৰ নাম নোহোৱা হয় । উক্ত শিক্ষার্থীসকলে আধাতে বিদ্যালয় শিক্ষা এৰিছে নে তেওঁলোকৰ নাম ভুৱাকৈ পঞ্জীয়ন কৰা হৈছিল সেয়া এক ডাঙৰ প্ৰশ্ন ।
কিয়নো সমগ্র শিক্ষা বিভাগে প্ৰতিগৰাকী শিক্ষাৰ্থীৰ নামত মধ্যাহ্ন ভোজনৰ পৰা আৰম্ভ কৰি ইউনিফৰ্মলৈকে সকলোতে ধন প্ৰদান কৰি আহিছে । আনহাতে আধাতে শিক্ষার্থীসকলে বিদ্যালয় এৰি গ'লেও সেয়া ৰাজ্যখনৰ বাবে অত্যন্ত উদ্বেগজনক কথা হ'ব । ইফালে এই সন্দৰ্ভত সমগ্ৰ শিক্ষা, অসমৰ মিছন সঞ্চালকে এডিচি, বিদ্যালয় পৰিদৰ্শক, এছ এছ এৰ জিলা মিছন সমন্বয়ক আৰু ডি ই ই অ'ৰ পৰা হিচাপহীন এই ছাত্র-ছাত্ৰীৰ তালিকা বিচাৰিছে ।
আনকি প্ৰতিগৰাকী ছাত্ৰ-ছাত্ৰীৰ নাম কিয় পঞ্জীয়ন নহ'ল তাৰো কাৰণ জানিব বিচাৰিছে । লক্ষণীয় বিষয় যে ইউডাইছৰ তথ্য অনুসৰি ২০২২-২৩ চনৰ ভিতৰত ৰাজ্যখনৰ নিম্ন প্রাথমিক বিদ্যালয়ত গড় বাৰ্ষিক ড্রপ-আউটৰ অৰ্থাৎ আধাতে বিদ্যালয় এৰা শিক্ষাৰ্থীৰ হাৰ আছিল ৮.৪৯ শতাংশ ।
আনহাতে ২০২১-২২ চনত আছিল ৬.০২ শতাংশ, ২০১৯-২০ চনত আছিল ৪.৩ শতাংশ আৰু ২০১৮-১৯ চনত আছিল ৩.১ শতাংশ । ক্ৰমাৎ আধাতে বিদ্যালয় এৰা শিক্ষাৰ্থীৰ হাৰ বৃদ্ধি পাব ধৰিছে । একেদৰে উচ্চ প্রাথমিক পৰ্যায়ত ২০২২-২৩ চনত ড্রপ-আউটৰ হাৰ আছিল ১০.৩৩ শতাংশ আৰু ২০২১-২২ চনত ৮.৮১ শতাংশ ।
ড্ৰ'প আউটৰ বিপৰীতে জ্যোতিকেন্দ্ৰৰ গুৰুত্ব :
অসমত আধাতে বিদ্যালয় ত্যাগ কৰা শিক্ষাৰ্থীৰ সংখ্যা বৃদ্ধি পোৱা বিষয়টোৱে সচেতন মহলক চিন্তিত কৰি তুলিছে । এইখিনিতে উল্লেখ কৰিব পাৰি যে আধাতে বিদ্যালয় ত্যাগ কৰা নাইবা বিদ্যালয়লৈ নোযোৱা তথা বিভিন্ন কামত জড়িত হৈ থকা শিশুসকলক শিক্ষা প্ৰদান কৰাৰ বাবে অসমত ২০০৩ চনত জ্যোতিকেন্দ্ৰ স্থাপন কৰা হৈছিল । ২০০০ চনত ইউনিচেফে ১০০ টা কেন্দ্ৰৰ যোগেদি এই শিক্ষাদানৰ প্ৰক্ৰিয়া আৰম্ভ কৰিছিল ।
২০০৩ চনত সৰ্বশিক্ষা অভিযানৰ যোগেদি জ্যোতিকেন্দ্ৰসমূহ পৰিচালিত হয় । জ্যোতিকেন্দ্ৰসমূহত ঠিকাভিত্তিত শিক্ষামিত্র নিযুক্তি দিয়া হয় । প্ৰথম অৱস্থাত এই কেন্দ্ৰসমূহ সুন্দৰভাৱে পৰিচালিত হৈছিল যদিও পৰবৰ্তী সময়ত চৰকাৰী সদিচ্ছাৰ অভাৱত এই প্ৰক্ৰিয়াটোত নানান সমস্যাই দেখা দিয়ে ।
এই সন্দৰ্ভত সদৌ অসম জ্যোতিকেন্দ্ৰৰ শিক্ষাকৰ্মী সন্থাৰ সভানেত্রী মুনমুন চেতিয়াই কয় যে বৰ্তমান সময়ত অসমত ৬২৫ টা জ্যোতিকেন্দ্ৰ আছে আৰু ইয়াত নিয়োজিত হৈ আছে প্ৰায় ৬২৫ গৰাকী শিক্ষাকৰ্মী । এই শিক্ষাকৰ্মীসকলে মাহেকত দৰমহা হিচাপে লাভ কৰে মাত্র ৬,৫০০ টকা । তাকো নিয়মীয়া নহয় । তেওঁ জনোৱা মতে এতিয়ালৈকে ডেৰ লাখৰো অধিক শিশুক তেওঁলোকে শিক্ষা প্ৰদান কৰি শিক্ষাৰ মূলসূঁতিলৈ আনিবলৈ সক্ষম হৈছে ।
বিভিন্ন কাৰণত আধাতে বিদ্যালয় ত্যাগ কৰা নাইবা বিদ্যালয়লৈ নোযোৱা শিশুসকলক শিক্ষাদানৰ যোগেদি শিক্ষাৰ মূলধাৰালৈ অনাটো এটা নিয়মীয়া প্ৰক্ৰিয়া । কিন্তু এই প্ৰক্ৰিয়াটোক আগুৱাই নিয়াৰ বাবে চৰকাৰে সদিচ্ছা প্ৰকাশ নকৰাৰ বাবেই ড্ৰপ-আউটৰ সংখ্যা ক্ৰমাৎ বৃদ্ধি পোৱা বুলি তেওঁ জানিবলৈ দিয়ে ।
