ধেমাজি : আজি চহা অসমীয়াই পালন কৰিছে গৰু বিহু ৷ চ’ত আৰু ব’হাগৰ সংক্ৰান্তি দিনা পালন কৰা এই গৰু বিহু উপলক্ষে ৰাজ্যজুৰি দেখিবলৈ পোৱা গৈছে পাৰভঙা উচাহ ৷ গৰু বিহু দিনা পৰম্পৰা খাদ্য হিচাপে বিশেষকৈ উজনী অসমত আমৰলি পৰুৱা টোপ খোৱা হয় । সেয়ে উৰুকাৰ বজাৰত ব্যৱসায়ীয়ে চৰা দামত বিক্ৰী কৰে এই আমৰলি পৰুৱা টোপ ৷
আনহাতে, গৰু বিহুৰ দিনা গ্ৰামাঞ্চলৰ বহুতে আমৰলি পৰুৱাৰ বাহৰ সন্ধানত পুৱাই ওলাই যায় ৷ যিহতু আমৰলি পৰুৱাই বাহ বান্ধে ওখ গছৰ ডালত ৷ সেয়ে ইয়াক সংগ্ৰহ কৰাটোও অত্যন্ত কষ্টকৰ কাম ৷ আমৰলি পৰুৱাৰ কামোৰত যথেষ্ট যন্ত্ৰণাভোগ হ’বলগীয়া পৰিস্থিতিৰ সন্মুখীন হ’বলগীয়া হয় ৷
তৎসত্বেও প্ৰতিজন অসমীয়াই আজি আমৰলি পৰুৱাৰ টোপ সংগ্ৰহ কৰে ৷ লোকবিশ্বাস অনুসৰি, আজি দিনটোত আমৰলি পৰুৱা টোপ খালে বছৰটোলৈ নিৰোগী হৈ থাকে ৷ উচ্চ প্ৰটিনযুক্ত উৎকৃষ্ট খাদ্য হিচাপে বিবেচিত এই আমৰলি টোপে সু-স্বাস্থ্য অটুট ৰখাত সহায় কৰে ৷
একেদৰে আজি দিনটোত লোক বিশ্বাস অনুসৰি প্ৰতিজন অসমীয়াৰ ঘৰৰ দুৱাৰ মুখত টিকনি বৰুৱা নামৰ এবিধ লতাজাতীয় কাঁইটীয়া শাকো আঁৰি দিয়া নিয়ম আছে ৷ তদুপৰি আজি দিনটোতে এশ এবিধ শাকেৰে ব্যঞ্জন ৰন্ধা উপৰিও আগদিনা ৰান্ধি থোৱা ঠাণ্ডা ভাতত পানী ঢালি খোৱা নিয়ম আছে ।
এই পৰম্পৰা সম্পৰ্কত ধেমাজিৰ তুলসীবাৰী গাঁৱৰ লোকঔষধি চিকিৎসক দেৱকান্ত কোচে কয়, “আজি গৰু বিহু ৷ জনগোষ্ঠীৰ মাজত পৰম্পৰা চলি আহিছে যে আমৰলি পৰুৱা টোপ পাৰি খায় ৷ ইয়াৰ কথাটো হ’ল যে আমাৰ শৰীৰ বহু বিষাক্ত পদাৰ্থ (Toxin) আছে ৷ বিভিন্ন ধৰণৰ খাদ্য খাওঁতে এই দূষিত পদাৰ্থবোৰ শৰীৰত জমা হ’ব পাৰে । আমৰলি টোপত এবিধ এচিড থাকে ৷ সেয়ে আমৰলি পৰুৱা টোপ খালে শৰীৰত জমান হোৱা এচিডবোৰ নাশ হয় ৷ সেই এচিডৰ কাৰণে এবছৰলৈ শৰীৰটো ৰোগ মুক্ত হৈ থাকে ৷ এই কথাটো জনবিশ্বাস মতে চলি আহিছে আৰু ই বৈজ্ঞানিকভাৱেও সত্য ৷’’
‘‘দ্বিতীয় কথাটো হ’ল আজিৰ দিনটোতে বন শাক বা বন দৰৱ ১০১ বা ১০৮টা খোৱা হয় ৷ আমি জানো যে দ্ৰব্য গুণ বুলিলে প্ৰতিটো বন ঔষধিতে ৰাসায়নিক ক্ৰিয়া থাকে । যিটো দেহৰ বাবে প্ৰয়োজন ৷ এই সকলোবোৰ মিলাই চবজি হিচাপে খালে দেহৰ ৰোগ প্ৰতেৰোধ ক্ষমতা বৃদ্ধি পায় ৷’’
- গৰু বিহু দিনা টিকনি বৰুৱা কিয় দুৱাৰমুখত লগোৱা হয় ?
গৰু বিহুৰ সৈতে জড়িত থকা বিভিন্ন লোকবিশ্বাস আৰু পৰম্পৰাসমূহৰ ভিতৰত টিকনি বৰুৱা দুৱাৰমুখত লগোৱাটো হৈছে অন্যতম ৷ হাবি বা বাৰীৰ চুকত প্ৰাকৃতিভাৱে উপলব্ধ হোৱা এই টিকনি বৰুৱা নামৰ এবিধ কাঁইটীয়া লতা জাতীয় গছ সংগ্ৰহ কৰি ঘৰৰ দুৱাৰ মুখত লগোৱা হয় ৷
এই পৰম্পৰা সন্দৰ্ভত দেৱকান্ত কোচে কয়, “টিকনি বৰুৱাৰ আছে যথেষ্ট ঔষধি গুণ ৷ লোকবিশ্বাস মতে গৰু বিহু দিনা ঘৰৰ দুৱাৰ মুখত টিকনি বৰুৱা এডাল লগালে বছৰটোৰ বাবে অপায়-অমংগল দূৰ হয় আৰু বিভিন্ন অপশক্তি বা নিগেটিভ শক্তিয়ে ঘৰখনক ক্ষতি কৰিব নোৱাৰে ৷ তাৰ বাবে এই পৰম্পৰা চলি আহিছে ৷’’
মুঠৰ ওপৰত ব’হাগ বিহু তথা গৰু বিহু দিনাৰ সৈতে সম্পৰ্ক আছে কেতবোৰ পৰম্পৰা আৰু লোকবিশ্বাস । যিহতু এতিয়াৰে পৰা বতৰ সলনি হৈ গ্ৰীষ্ম আৰম্ভ হ’ব, সেয়ে স্বাস্থ্য প্ৰতি সজাগ সচেতন আৰু প্ৰকৃতিৰ প্ৰতিকূল বতৰৰ সৈতে সহাৱস্থান কৰা উদ্দেশ্যতে লুকাই আছে এই পৰম্পৰা আৰু লোকবিশ্বাস ।
