গ্ৰীষ্মকালীন বন্ধৰ সময়ত কি কৰিব লাগিব ছাত্ৰ-ছাত্ৰীয়ে

গুৱাহাটী : আজি পহিলা জুলাই । আজিৰ পৰা ৰাজ্যত আৰম্ভ হৈছে এমহীয়া গ্ৰীষ্মকালীন বন্ধ । এই গ্ৰীষ্মকালীন বন্ধৰ সময়ত ছাত্ৰ-ছাত্ৰীয়ে কি কৰিব লাগিব তাক লৈ নিৰ্দেশনা জাৰি কৰিছে শিক্ষা বিভাগে । কামৰূপ মহানগৰ জিলাৰ জিলা মিছন সমন্বয়ক দিপিকা চৌধুৰীয়ে কামৰূপ মহানগৰৰ চৰকাৰী, অপ্ৰাদেশিকৃত, বেচৰকাৰী সকলো বিদ্যালয়লৈ এই নিৰ্দেশনা জাৰি কৰিছে ।

প্ৰথমৰ পৰা দশম শ্ৰেণীৰ ছাত্ৰ-ছাত্ৰীৰ সামগ্ৰিক বিকাশৰ স্বাৰ্থত তলত দিয়া কাৰ্যসমূহ গৃহকাৰ্য হিচাপে প্ৰদান কৰিবলৈ নিৰ্দেশ জাৰি কৰা হৈছে ।

গ্ৰীষ্মকালীন বন্ধৰ সময়ত কি কৰিব লাগিব ছাত্ৰ-ছাত্ৰীয়ে (ETV Bharat Assam)

গ্ৰীষ্মৰ বন্ধৰ সময়ত ছাত্ৰ-ছাত্ৰীসকলে কৰিবলগীয়া কাৰ্যসূচী

• প্ৰথম শ্ৰেণীৰ পৰা দশম শ্ৰেণীৰ ছাত্ৰ-ছাত্ৰীসকলে গৰমৰ বন্ধত পিতৃৰ পৰা আৰম্ভ কৰি চাৰি পুৰুষৰ বংশবৃক্ষ অংকন কৰিব লাগিব
• প্ৰথম শ্ৰেণীৰ পৰা পঞ্চম শ্ৰেণীৰ ছাত্ৰ-ছাত্ৰীসকলে দৈনন্দিন জীৱনত সৎ আচৰণ আৰু শিষ্টাচাৰৰ বিষয়ে ১০-১৫ শাৰীৰ ভিতৰত লিখিব লাগিব

ষষ্ঠ শ্ৰেণীৰ পৰা দশম শ্ৰেণীৰ ছাত্ৰ-ছাত্ৰীয়ে কি কৰিব লাগিব

• ষষ্ঠ শ্ৰেণীৰ পৰা দশম শ্ৰেণীৰ ছাত্ৰ-ছাত্ৰীয়ে ককাক-আইতাকৰ জীৱন পৰিক্ৰমা লিখিব লাগিব
• পৰিয়ালৰ যিকোনো এজন সদস্যৰ সৈতে সাক্ষাৎকাৰ কৰা, প্ৰশ্নাৱলী প্রস্তুত কৰা আৰু তেওঁলোকৰ উত্তৰসমূহ এখন পাতত লিপিবদ্ধ কৰিব লাগিব
• বিভিন্ন বাতৰিৰ কাকত আৰু আলোচনামূলক আলোচনাৰ পৰা দিন ভিত্তিক বাতৰি বুলেটিন প্ৰস্তুত কৰা আৰু তাৰ সৈতে ফটো আৰু বাতৰি কাটি সংলগ্ন কৰা
• মাতৃ-পিতৃক গৃহকৰ্যত সহায় কৰাৰ বিষয়ে তালিকা প্ৰস্তুত কৰিব লাগিব আৰু তেওঁলোকৰ পৰা কি শিকিলে সেয়া ১৫০-২০০ শব্দৰ ভিতৰত লিখিব লাগিব
• মাতৃ বা পৰিয়ালৰ আন সদস্যৰ পৰা ৰন্ধন প্ৰণালী আভাস লৈ নিজৰ এখন ব্যঞ্জন পুথি প্ৰস্তুত কৰিব লাগিব

উল্লেখ্য যে এই গৃহকাৰ্যসমূহ স্কুল খোলাৰ পিছত ছাত্ৰ-ছাত্ৰীসকলে বিদ্যালয়ত জমা দিব লাগিব ।