মিঞা স্বায়ত্ত শাসনৰ লগতে মিঞালেণ্ডৰ দাবী জনাম; উৰিয়ামঘাটত উচ্ছেদিতৰ হুংকাৰ
"১৯৩২ৰ পৰা আন্দোলন কৰি ৩৫ লাখ বড়ো মানুহে যদি বড়োলেণ্ড দাবী কৰিব পাৰে, তেন্তে ১ কোটি ৪০ লাখ মিঞা মানুহে মিঞালেণ্ডো দাবী কৰিব পাৰে ।"
Published : July 30, 2025 at 12:03 AM IST
সৰুপথাৰ : নামনি অসমত উচ্ছেদৰ সময়ত দেখা গৈছিল প্ৰশাসনৰ লোকৰ সৈতে সংঘাত । আৰক্ষীৰ লোক আঘাতপ্ৰাপ্ত হৈছিল গোৱালপাৰাৰ পাইকানত । তাৰ বিপৰীতে গোলাঘাটৰ উৰিয়ামঘাটত বিপৰীত ছবি । কিয়নো উৰিয়ামঘাটৰ ৰেংমা সংৰক্ষিত বনাঞ্চলৰ বেদখলকাৰীয়ে প্ৰশাসনৰ সৈতে সংঘাত কৰা নাই । তেওঁলোকে হুংকাৰ জনাইছে, দাবী জনাইছে । প্ৰতিটো মুহুৰ্ততেই তেওঁলোকে চৰকাৰৰ লগতে অসমৰ মুখ্যমন্ত্ৰী ড° হিমন্ত বিশ্ব শৰ্মাৰ প্ৰতি সৰৱ ।
আজি উৰিয়ামঘাটৰ ৰেংমা সংৰক্ষিত বনাঞ্চলত চলিছিল অসমৰ বৃহৎ উচ্ছেদ অভিযান । তেনে সময়তেই বেদখলকাৰীসকলৰ যুৱক এজনে হুংকাৰ প্ৰদান কৰিছে । তেওঁলোকে মিঞা লেণ্ডৰ দাবী জনাইছে । মিঞা শাসিত পৰিষদৰো দাবী তুলিব তেওঁলোকে ।
মিঞালেণ্ডৰ দাবী তুলি বেদখলকাৰী যুৱকজনে কয়, "চৰকাৰে আমাৰ দাবী মানি ল'ব লাগিব । শান্তিপূৰ্ণভাৱে চৰকাৰে আমাক পুনৰ সংস্থাপন দিব লাগিব । অন্যথা মিঞা স্বায়ত্ত শাসনৰ দাবী জনাম আৰু মিঞালেণ্ড বুলিও দাবী কৰিম আমি ।"
তেওঁ পুনৰ কয়, "১৯৩২ ৰ পৰা আন্দোলন কৰি ৩৫ লাখ বড়ো মানুহে যদি বড়োলেণ্ড দাবী কৰিব পাৰে, তেন্তে ১ কোটি ৪০ লাখ মিঞা মানুহে মিঞালেণ্ডো দাবী কৰিব পাৰে । যদি চৰকাৰে আমাক পুনৰ সংস্থাপন নিদিয়ে তেনেহ'লে চৰকাৰে বৃহৎ গণ আন্দোলনৰ সন্মুখীন হ'ব লাগিব । আমি মিঞা ছাত্ৰ পৰিষদে গোটেই অসমৰ লগতে দিল্লী, ভাৰতবৰ্ষ কঁপাই তুলিম ।"
তেওঁ পুনৰ কয়, "অসমৰ আমছুকে ধৰি যিমান সংগঠন আছে সকলোৱে মিলি হিমন্ত বিশ্ব শৰ্মাক চিটৰ পৰা চোঁচৰাই নমাম । চৰকাৰ ৰাইজে কল্যানৰ বাবেহে গঠন কৰিছে । সীমান্তৰ আমাৰ পঞ্চায়তৰ ৩৬ খন গাঁৱৰ দুখন গাঁও বনাঞ্চল, বাকীকেইখন গাওঁ কি হ'ল ?
লাচিত সেনাই ৰাস্তাত গাড়ী ৰখাই লুণ্ঠন কৰে :
যুৱকজনে কয়, "নগাঁও ফালে গ'লে লাচিত সেনাই দিগদাৰ দিয়ে । লাচিত সেনাই ৰাস্তাৰ গাড়ী ৰখাই টকা-পইচা লৈছে, মাইকীবোৰক মাৰ-ধৰ কৰিছে । লাচিত সেনাৰ চৰিত্ৰ তেনেকোৱা নহয়টো ।"
