গুৱাহাটী: উৎকট গৰমে দহিছে ৰাজ্য । এই উৎকট গৰমৰ পৰা পৰিত্ৰাণ পাবলৈ বিভিন্নজনে ভিন্ন পন্থা অৱলম্বন কৰিছে; কিন্তু কোনোবাই পক্ষীকুলৰ কথা চিন্তা কৰিছেনে ?
এটুপি পানীৰ বাবে পক্ষী, জীৱ-জন্তুবোৰে ইফালৰ পৰা সিফাললৈ ঘূৰি ফুৰিব লাগে । যান্ত্ৰিকতাৰ মহানগৰীত এটুপি পানী পাবলৈ নাই ।
এনে পৰিস্থিতিত পক্ষীবোৰৰ তৃষ্ণা নিবাৰণৰ বাবে ব্যতিক্ৰমী পদক্ষেপ গ্ৰহণ কৰিছে কটন বিশ্ববিদ্যালয় আৰু গুৱাহাটী বিশ্ববিদ্যালয়ৰ ছাত্ৰ-ছাত্ৰীয়ে । প্ৰখৰ গৰমত পক্ষীকুলৰ সকাহ হোৱাকৈ পিয়াহৰ পানীৰ ব্যৱস্থা কৰিছে কটন বিশ্ববিদ্যালয় আৰু গুৱাহাটী বিশ্ববিদ্যালয় চৌহদত ।
কটন বিশ্ববিদ্যালয়ৰ চৌহদত পানীৰ পাত্ৰ স্থাপন :
উৎকট গৰমৰ বাবে কটন বিশ্ববিদ্যালয়ৰ একাংশ ছাত্ৰ-ছাত্ৰীয়ে পক্ষীকুলৰ বাবে বিশ্ববিদ্যালয় চৌহদত পানীৰ পাত্ৰ স্থাপন কৰিছে । বিশ্ববিদ্যালয়খনৰ চৌহদত থকা গছবোৰত মাটিৰ পাত্ৰত পানীৰ ব্যৱস্থা কৰা হৈছে ।
পানীৰ পাত্ৰ স্থাপন কৰাত উদ্যোগ লোৱা একাংশ ছাত্ৰই কয়, "উৎকট গৰমৰ পৰা পৰিত্ৰাণ পাবলৈ আমি পানী খাওঁ; কিন্তু চৰাই চিৰিকটিয়ে পানী ক'ত পাব ? মানুহৰ যিদৰে পিয়াহ লাগে,গৰম উঠে ঠিক একেদৰে পক্ষীৰো পিয়াহ লাগে । এই কথা চিন্তা কৰিয়ে ২০ টা মাটিৰ পাত্ৰত পানীৰ ব্যৱস্থা কৰা হৈছে । এই পাত্ৰবোৰ আমি স্থাপন কৰিছো পৰিচালনাত সকলো কটনীয়ানৰ সহায় সহযোগিতা বিচাৰিছো । এই পানীৰ পাত্ৰবোৰ খালী হোৱা দেখিলে ছাত্ৰ-ছাত্ৰীসকলে যাতে তাত পানী দিয়ে ।"
গুৱাহাটী বিশ্ববিদ্যালয়ৰ চৌহদত ৪০ টা পানীৰ পাত্ৰ স্থাপন :
গুৱাহাটী বিশ্ববিদ্যালয় আছু গোট আৰু বিশ্ববিদ্যালয় আইন মহাবিদ্যালয় আছু গোটৰ উদ্যোগতো বৃহস্পতিবাৰে বিশ্ববিদ্যালয়খনৰ চৌহদত পক্ষীকুলৰ বাবে প্ৰায় ৪০ টা পানীৰ পাত্ৰ স্থাপন কৰা হৈছে । প্ৰথমবাৰৰ বাবে গুৱাহাটী বিশ্ববিদ্যালয়ৰ চৌহদত এনে পদক্ষেপ গ্ৰহণ কৰা হৈছে ।
বিশ্ববিদ্যালয়খনৰ আছু গোটৰ সদস্য উদয়ন নাথ আৰু হীৰক হুজুৰীয়ে কয়,"গুৱাহাটী বিশ্ববিদ্যালয়ৰ চৌহদত যথেষ্ট সংখ্যক চৰাই চিৰিকটি আছে । এই উৎকট গৰমত চৰাইবোৰে পিয়াহৰ পানীটুপীৰ বাবে হাহাকাৰ কৰা পৰিলক্ষিত হয় । সেই কথা উপলব্ধি কৰি আৰু গোটৰ ফালৰ পৰা পক্ষীকুলৰ বাবে বিশ্ববিদ্যালয়ৰ চৌহদত থকা গছবোৰত মাটিৰ পাত্ৰ বান্ধি সেই
পাত্ৰবোৰত পানী দিয়াৰ ব্যৱস্থা কৰা হৈছে । গুৱাহাটী বিশ্ববিদ্যালয়ৰ চৌহদত প্ৰথমবাৰৰ বাবে এনে পদক্ষেপ গ্ৰহণ কৰা হৈছে । এই পাত্ৰবোৰ চোৱা-চিতাৰ দায়িত্ব বিশ্ববিদ্যালয়ৰ আছু গোটৰ সদস্যসকলে কৰিব ।"
