গুৱাহাটী : মুখ্যমন্ত্ৰী হিমন্ত বিশ্ব শৰ্মা নেতৃত্বাধীন বিজেপি চৰকাৰে অসমত সৰ্বাংগীন উন্নয়ন হোৱা বুলি ঢাক-ঢোল বজাই থকাৰ সময়তে ৰাজধানী চহৰ গুৱাহাটী মহানগৰীৰ মাজমজিয়াত থকা এখন প্ৰাথমিক বিদ্যালয়ৰ কণ কণ ছাত্ৰ-ছাত্ৰীয়ে গেলা-পচা আৱৰ্জনা মিশ্ৰিত পানীৰ মাজত আবদ্ধ হৈয়ে শিক্ষা গ্ৰহণ কৰি আছে ।
এইক্ষেত্ৰত যেন এখন চৰকাৰী প্ৰাথমিক বিদ্যালয়ৰ দুৰ্দশাৰ প্ৰতি মুখ্যমন্ত্ৰী, শিক্ষা মন্ত্ৰীৰ চকু দিবলৈ সময় নাই । দিছপুৰৰ পৰা মাত্ৰ ৪ কিলোমিটাৰ নিলগত থকা সিজুবাৰী প্ৰাথমিক বিদ্যালয়ৰ কণ কণ ছাত্ৰ-ছাত্ৰীসকলে পানীৰ মাজত আবদ্ধ হৈয়ে ছয় বছৰে যন্ত্ৰণাদায়ক শৈক্ষিক জীৱন অতিবাহিত কৰি আহিছে ।
এজাক বৰষুণ আহিলেই প্লাবিত হৈ পৰে বিদ্যালয়খন । একাঁঠু পৰ্যন্ত পানী হয় বিদ্যালয়খনত । এদিন দুদিন নহয়, দহ দিনলৈ এই পানী আবদ্ধ হৈ থাকে বিদ্যালয়খনত । যাৰ ফলত গেলা পানীৰ মাজতে বিদ্যালয়খনৰ শিশুসকলে শিক্ষাগ্ৰহণ কৰিবলগীয়া পৰিস্থিতিৰ সৃষ্টি হৈ আহিছে ।
১৯৪৬ চনতে এই বিদ্যালয়খন স্থাপন কৰা হৈছিল । সেই সময়ত সমগ্ৰ হাতীগাঁও অঞ্চলত এইখনেই একমাত্ৰ প্ৰাথমিক বিদ্যালয় আছিল । কিন্তু আজি আঠ দশক ধৰি জ্ঞানৰ পোহৰ বিলাই থকা বিদ্যালয়খনৰ এই দুৰৱস্থা ।
এই সন্দৰ্ভত বিদ্যালয়খনৰ প্ৰধান শিক্ষক নুৰ হুছেইনে কয়, "যোৱা ছবছৰে বিদ্যালয়খনে এই নৰক যন্ত্ৰণা সহ্য কৰি আছে ।"
তেওঁ জনায়, "বিদ্যালয়খনত প্ৰাক-প্ৰাথমিকৰ পৰা পঞ্চম শ্ৰেণীলৈকে ৬০০ গৰাকী ছাত্ৰ-ছাত্ৰী আছে । ১৬ গৰাকী শিক্ষক-শিক্ষয়িত্ৰী আছে । বিদ্যালয়খনত সাধাৰণ পৰিয়ালৰ ছাত্ৰ-ছাত্ৰীসকলে অধ্যয়ন কৰে ।"
বিদ্যালয়খনৰ প্ৰধান শিক্ষকগৰাকীয়ে লগতে কয়, "এজাক বৰষুণ আহিলেই প্লাবিত হৈ পৰে বিদ্যালয়খন । একাঁঠু পৰ্যন্ত পানী হয় বিদ্যালয়খনত । ১০ দিনলৈ এই পানী আবদ্ধ হৈ থাকে । গেলা পানীৰ মাজতে বিদ্যালয়খনৰ শিশুসকলে শিক্ষাগ্ৰহণ কৰিবলগীয়া পৰিস্থিতিৰ সৃষ্টি হৈ আহিছে । বেছি পানী হ'লে স্কুল বন্ধ দিবলগীয়া পৰিস্থিতিৰ সৃষ্টি হয় ।"
আনহাতে, বিদ্যালয়ৰ আন্তঃগাঁথনিৰ কথা উল্লেখ কৰি প্ৰধান শিক্ষকগৰাকীয়ে কয়, "কাষতে এটা আৰ চি চি বিল্ডিঙত শ্ৰেণীকোঠা নিৰ্মাণ কৰি থকা হৈছে । কিন্তু টকাৰ অভাৱত নিৰ্মাণ সম্পূৰ্ণ হোৱা নাই । পানী হ'লে তাত থকা অৰ্ধনিৰ্মিত শ্ৰেণীকোঠাবোৰত ছাত্ৰ-ছাত্ৰীসকলক কষ্টকৈ শিক্ষাদান কৰা হয় ।"
দুখ প্ৰকাশ কৰি তেওঁ কয়, "দুখৰ কথা বিদ্যালয়খনত আন্তঃগাঁথনিৰ অভাৱ । পৰ্যাপ্ত ডেস্ক-বেঞ্চ নাই । খোৱাপানীৰ ব্যৱস্থা নাই । বজাৰৰ পানী কিনিব লাগে ।"
মুঠতে এশ এবুৰি সমস্যাৰে জৰ্জৰিত বিদ্যালয়খনৰ সমস্যা সমাধানৰ বাবে শিক্ষা বিভাগক বহুবাৰ আবেদন কৰা হৈছে যদিও কোনো ফল ধৰা নাই বুলি প্ৰধান শিক্ষকগৰাকীয়ে আক্ষেপ কৰে ।
ইফালে বিদ্যালয়খনৰ যন্ত্ৰণাৰ কাহিনী বৰ্ণনা কৰি বিদ্যালয়খনৰ শিক্ষয়িত্ৰীসকলে জনায় যে কৃত্ৰিম বানৰ বাবে শ্ৰেণীকোঠা, প্ৰস্ৰাৱগাৰ আৰু শৌচাগাৰবোৰত একাঁঠু পৰ্যন্ত পানী হয় । ১০ দিনলৈ পানী থাকে । বৰষুণ আহি থাকিলে বেছি দিনলৈ এই সমস্যা থাকে । এনে অৱস্থাত শিক্ষয়িত্ৰী আৰু ছাত্ৰ-ছাত্ৰীসকলে কেনেকৈ শৌচ-প্ৰস্ৰাৱ কৰে সেয়া বাখ্যা কৰিব নোৱাৰি ।
কিন্তু এই যন্ত্ৰণাৰ মাজতো যাতে এই কণ কণ গৰীৱ পৰিয়ালৰ ছাত্ৰ-ছাত্ৰীসকল ভাল শিক্ষাৰ পৰা বঞ্চিত নহয় তাৰবাবে কৰ্তব্য পালন কৰি থকা হৈছে ।
এতিয়া শিক্ষা বিভাগে নিজ কৰ্তব্য পালন কৰি এই বিদ্যালয়ৰ ছাত্ৰ-ছাত্ৰীৰ মংগলৰ প্ৰতি চকু দিলে ভাল আছিল বুলি শিক্ষয়িত্ৰীসকলে দোহাৰে ।
