গোৱালপাৰা: ৰাভা হাছং স্বায়ত্তশাসিত পৰিষদৰ ২০টা পৰিষদীয় সমষ্টিৰ বাবে অনুষ্ঠিত নিৰ্বাচনৰ ভোটগ্ৰহণ আজি পুৱা আৰম্ভ হৈছে । গোৱালপাৰা জিলাৰ অন্তৰ্গত ৰাভা হাছং এলেকাত আজি পুৱাৰে পৰা আৰম্ভ হৈছে ভোটগ্ৰহণ । পুৱা ৭ বজাৰ পৰা বিয়লি ৩ বজালৈ অনুষ্ঠিত হ'ব ভোটগ্ৰহণ । পুৱাৰে পৰা প্ৰতিটো ভোটগ্ৰহণ কেন্দ্ৰত দেখিবলৈ পোৱা গৈছে ভিৰ । নিজৰ নিজৰ ভোটাধিকাৰ সাব্যস্ত কৰিবলৈ ওলাই আহিছে ৰাভা হাছং এলেকাৰ ভোটাৰসকলে ।
উল্লেখ যে নামনি অসমৰ দুখনকৈ জিলা অন্তৰ্ভুক্ত হৈছে ৰাভা হাছং এলেকাত । ইয়াৰে কামৰূপ জিলাৰ ১৬ টা পৰিষদীয় সমষ্টি আৰু গোৱালপাৰা জিলাৰ ২০ টা পৰিষদীয় সমষ্টিসহ মুঠ ৩৬ টা সমষ্টিত অনুষ্ঠিত হৈছে ভোটগ্ৰহণ প্ৰক্ৰিয়া । ইয়াৰে কামৰূপ জিলাৰ ১৬ টা সমষ্টিৰ দুটাকৈ পৰিষদীয় সমষ্টিত দুগৰাকী প্ৰাৰ্থী বিনা প্ৰতিদ্বন্দিতাৰে নিৰ্বাচিত হৈছে ।
জিলাখনৰ ২৩ নং খালিহাকোঠ সমষ্টিত ৰাভা হাছং যৌথ সংগ্ৰাম সমিতিৰ প্ৰাৰ্থী নগৰমল স্বৰ্গীয়াৰী আৰু ২৫ নং হাহিম সমষ্টিত যৌথ সংগ্ৰাম সমিতিৰ প্ৰাৰ্থী সোনাৰাম ৰাভা বিনা প্ৰতিদ্বন্দিতাৰে নিৰ্বাচিত হৈছে ৷ যাৰবাবে কামৰূপ জিলাৰ ১৪ টা পৰিষদীয় সমষ্টিৰ মুঠ ২০৯ টা ভোট গ্ৰহণ কেন্দ্ৰত ভোটগ্ৰহণ আৰম্ভ হৈছে ।
ইফালে গোৱালপাৰা জিলাৰ এটা সমষ্টিৰ পৰা এন ডি এ ৰ প্ৰাৰ্থী বিনা প্ৰতিদ্বন্দিতাৰে জয়লাভ কৰিছে । ২০ নং জয়ৰামকুচি সমষ্টিৰ বিজেপি প্ৰাৰ্থী প্ৰেমাজুলি ৰাভা বিনাপ্ৰতিদ্বন্দ্বীতাৰে জয়ী হৈছে ৷ ফলত জিলাখনৰ মুঠ ১৯ টা সমষ্টিত আজি অনুষ্ঠিত হৈছে নিৰ্বাচন ।
গোৱালপাৰাৰ ১৯ টা সমষ্টিৰ ৩৬২ টা ভোটগ্ৰহণ কেন্দ্ৰত বুধবাৰে পুৱাৰে পৰা আৰম্ভ হৈছে ভোটগ্ৰহণ প্ৰক্ৰিয়া । কামৰূপ আৰু গোৱালপাৰা জিলাৰ মুঠ ৯৬ গৰাকী প্ৰাৰ্থীৰ ভাগ্য আজি বেলট বাকচত আবদ্ধ হ'ব । ইয়াৰে কামৰূপৰ ৪৪ গৰাকী আৰু গোৱালপাৰাৰ ৫২ গৰাকী প্ৰাৰ্থী অৱতীৰ্ণ হৈছে । কামৰূপৰ ১৪ টা পৰিষদীয় সমষ্টিৰ ভোটাৰৰ সংখ্যা হৈছে ১,৬৮,৬৬৮ গৰাকী । আনহাতে, গোৱালপাৰাত ভোটাৰৰ সংখ্য়া ২,৫৪,৬৪৪ গৰাকী ।
