নাৰ্ভাছ হৈ স্বীকাৰোক্তিৰ পৃষ্ঠভূমি আৰম্ভ কৰিছে গৌৰৱ গগৈয়ে : পবিত্ৰ মাৰ্ঘেৰিটা

যোৰহাট: মুখ্যমন্ত্ৰী ড৹ হিমন্ত বিশ্ব শৰ্মাৰ পিচত এইবাৰ গৌৰৱ গগৈক আক্ৰমণৰ লক্ষ্য় কৰি লৈছে কেন্দ্ৰীয় বৈদেশিক পৰিক্ৰমা বিভাগৰ ৰাজ্যিক মন্ত্ৰী পবিত্ৰ মাৰ্ঘেৰিটাই । বিশেষকৈ যোৰহাট লোকসভা সমষ্টিৰ প্ৰসংগ উত্থাপন হ'লেই পবিত্ৰ মাৰ্ঘেৰিটা সৰৱ হৈ পৰে গৌৰৱ গগৈৰ বিৰুদ্ধে । সদ্য় সমাপ্ত পঞ্চায়ত নিৰ্বাচনত এই সমষ্টিটোত বিজেপিয়ে আধিপত্য় বিস্তাৰ কৰাৰ পিচত এই আক্ৰমণ তীব্ৰতৰ হৈ পৰিছে । এইবাৰ পবিত্ৰ মাৰ্ঘেৰিটাই ক'লে গৌৰৱ গগৈৰ পাকিস্তান ভ্ৰমণৰ কথা ।

গৌৰৱ গগৈ পাকিস্তানলৈ যোৱাৰ প্ৰসংগ উল্লেখ কৰি পবিত্ৰ মাৰ্ঘেৰিটাই কয়, "দিকবিদিক হেৰুৱাই যথেষ্ট নাৰ্ভাছ হৈ স্বীকাৰোক্তিৰ এটা পৃষ্ঠভূমি আৰম্ভ কৰিছে । পৰোক্ষভাৱে স্বীকাৰোক্তিৰ ফালে গৈ আছে । এগৰাকী সেনা বিষয়া, কূটনৈতিক আৰু যিকোনো সাংবিধানিক পদত থকা ব্য়ক্তিয়ে পাকিস্তান বা যিকোনো ৰাষ্ট্ৰলৈ যাব পাৰে । তেওঁলোক যোৱাৰ লগত এগৰাকী চুপেচাপে যোৱা মানুহৰ কেনেকৈ তুলনা হ'ব পাৰে । পাকিস্তানলৈ পৰ্যটক যায় । ১৪০ কোটি মানুহৰ ভিতৰত ১৪-১৫ হাজাৰ মানুহ যায় । কেতিয়াবা খেলুৱৈ যোৱা দেখিছো, মন্ত্ৰী যোৱা দেখিছো ।"

পবিত্ৰ মাৰ্ঘেৰিটাই পুনৰ কয়, "ভাৰতৰ পৰাও পাকিস্তানৰ ভূমিত থকা শিখ ধৰ্মাৱলম্বী লোকসকলৰ উপাসনাস্থলী গুৰুদ্বাৰলৈ অনুমতি লৈ যায় । এয়া দিন পোহৰত তেওঁলোক যায় । তেওঁলোকে গৌৰৱেৰে ফেচবুকত ফটো দিয়ে । বিগত দুটা দশকত কোন কোন গৈছে সেইবোৰ জানিব বিচৰা নাই । সেয়া সম্পূৰ্ণ নীতিগতভাৱে গৈছে । আমাৰ কথা হ'ল আপুনি গৈছিল নে সেইটো কৈ দিলে হ'ল । বিগত সময়ত সাংবাদিকে মাত্ৰ বুমটো মুখত সুমুৱাই দিবলৈ বাকী । সমগ্ৰ অসমবাসীয়ে সুধিছে । কংগ্ৰেছৰ মানুহে আজি সুধিছে । কংগ্ৰেছৰ মানুহেই আজি বেয়া পাইছে ।"

আজি যোৰহাটত অনুষ্ঠিত বিজেপিৰ বৰ্ধিত সাংগঠনিক সভাত অংশগ্ৰহণ কৰিবলৈ আহি ৰাজ্যিক মন্ত্ৰী পবিত্ৰ মাৰ্ঘেৰিটাই কয়, "মই এতিয়া মাজুলী পৰা আহি যোৰহাটত উপস্থিত আছো; কিন্তু এইসময়ত যোৰহাট লোকসভা সমষ্টিৰ সাংসদজন দিল্লীত ব্যস্ত হৈ আছে । কাৰণ দলৰ নেতৃত্বয়ে মোক যোৰহাটবাসী ৰাইজৰ লগত থাকিবলৈ কৈছে । পঞ্চায়ত নিৰ্বাচনত মই প্ৰায় ৮০খনৰো অধিক সভাত অংশগ্ৰহণ কৰিছো । মই সদায় ৰাইজৰ লগত আছো । পঞ্চায়ত নিৰ্বাচনত জিকিলো বুলি ২৬ৰ বিধানসভাত জিকিম বুলি দম্ভ নামাৰো, সেয়া ভোটাৰ ৰাইজে নিৰ্ণয় কৰিব ।"