গুৱাহাটী: অসমত ৰাষ্ট্ৰীয় ঘাইপথসমূহৰ দুৰৱস্থাই যাতায়াত ব্যৱস্থাটোক যথেষ্ট কষ্টকৰ কৰি তুলিছে । কেন্দ্ৰ আৰু ৰাজ্যত বিজেপিৰ চৰকাৰ থকাৰ পাছতো অসমৰ ৰাইজৰ যাতায়াতৰ বাবে অন্যতম প্রয়োজনীয় ৰাষ্ট্ৰীয় ঘাইপথসমূহ সূচল কৰি তুলিব পৰা নাই ।
বিভিন্ন দল-সংগঠন আৰু ৰাইজৰ প্ৰতিবাদৰ পাছতো এই সমস্যাৰ সমাধান হোৱা নাই । ইফালে ৰাষ্ট্ৰীয় ঘাইপথ মন্ত্রণালয়ে অধিক দুৰৱস্থাত থকা পূব অসমৰ অৰ্ধনিৰ্মিত পথৰ বাবে ৰাজ্য চৰকাৰকে জগৰীয়া কৰিছে ।
এই সন্দৰ্ভত ৰাষ্ট্ৰীয় ঘাইপথ প্ৰাধিকৰণৰ গুৱাহাটীস্থ কাৰ্যালয়ৰ এগৰাকী প্ৰকল্প বিষয়াই জনাই যে সময় মতে ভূমি অধিগ্রহণত বিলম্ব হোৱাৰ উপৰি নিম্নমানৰ নিৰ্মাণকাৰ্য, ঠিকা আবণ্টনত খেলি-মেলি আদিৰ বাবেও নির্মাণকার্য অস্বাভাবিকভাৱে পলম হয় । লক্ষণীয় বিষয় যে অসমত অর্ধনিৰ্মিত ৰাষ্ট্ৰীয় ঘাইপথ সাধাৰণ জনতাৰ বাবে যাতায়াতৰ ক্ষেত্ৰত যমৰ যন্ত্ৰণাত পৰিণত হৈছে ।
একে সময়তে এনে পথবোৰ মৃত্যুদূত সদৃশো হৈ পৰিছে । খলা-বমা, মাজে মাজে প্রকাণ্ড একোটা গাঁতত পৰিণত হোৱা ৰাষ্ট্ৰীয় ঘাইপথত সমানে দুর্ঘটনা সংঘটিত হৈ আহিছে । বছৰ বছৰ ধৰি পথবোৰ অৰ্ধনিৰ্মিত হৈ পৰি আছে ।
প্ৰকল্প বিষয়াগৰাকীয়ে জনোৱা মতে, শেহতীয়াকৈ ৰাষ্ট্ৰীয় ঘাইপথ আন্তঃগাঁথনি উন্নয়ন নিগম লিমিটেডে কৰা পৰ্যালোচনাত পোহৰলৈ আহিছে যে অসমৰ ১৬টা ৰাষ্ট্ৰীয় ঘাইপথ প্ৰকল্পৰ নিৰ্মাণ কাৰ্যৰ গতি অতি লেহেমীয়া । ইয়াৰ বিৰুদ্ধে ৰাজ্যখনৰ সচেতন সমাজ আৰু সংগঠনে সময়ে সময়ে সঘন প্রতিবাদ জনাই আহিছে । আনকি বহু সময়ত ৰাইজৰ ক্ষোভৰ বাবে অসম চৰকাৰে বিষয়টো কেন্দ্ৰীয় চৰকাৰক অৱগত কৰি সমস্যাটোৰ ক্ষিপ্ৰ সমাধানৰ দাবী জনাই আহিছে যদিও কাৰ্যতঃ কোনো সুফল পৰিলক্ষিত হোৱা নাই ।
ঘাইপথ প্ৰাধিকৰণৰ তথ্য অনুসৰি প্ৰকল্প বিষয়াগৰাকীয়ে কয়, "পূব অসমতে ৰাষ্ট্ৰীয় ঘাইপথৰ দুৰৱস্থা অধিক বৃদ্ধি হৈছে । বিশেষকৈ অর্ধনির্মিত পথে যাতায়াত ব্যৱস্থা অধিক জটিল কৰি তুলিছে । অথচ এনে পথৰ নিৰ্মাণ কেতিয়াবাই সম্পূৰ্ণ হ'ব লাগিছিল ।"
"যোৰহাটৰ পৰা ডিব্ৰুগড়লৈ নির্মীয়মাণ চাৰিলেনযুক্ত ৰাষ্ট্ৰীয় পথৰে যাতায়াত অদ্যাপি অত্যন্ত প্ৰত্যাহ্বানমূলক হৈ আছে । এই পথছোৱাৰ নিৰ্মাণকাৰ্য সম্পূৰ্ণ কৰাৰ লক্ষ্য ইতিপূর্বে প্রায় ছয়বাৰ ধাৰ্য কৰা হৈছিল ।" বিষয়াগৰাকীয়ে কয় ।
তেওঁ আৰু কয়, "শেহতীয়াকৈ অহা অক্টোবৰ কাম সম্পূৰ্ণ কৰাৰ নতুন লক্ষ্য ধাৰ্য কৰা হৈছে । পথছোৱাৰ নিৰ্মাণ অভাৱনীয়ভাৱে পলম হোৱাত ৰাষ্ট্ৰীয় ঘাইপথ মন্ত্রণালয়ে অসম চৰকাৰকে জগৰীয়া কৰিছে । কাৰণ ভূমি অধিগ্রহণকে ধৰি ৰাজ্য চৰকাৰৰ আওতাত যিবোৰ বিষয় পৰে, তাৰে কোনোটোৱেই সময়মতে হৈ উঠা নাই । তদুপৰি ঠিকাদাৰৰ নিম্নমানৰ কাম, ঠিকা আবণ্টনত হোৱা খেলি-মেলি আদিৰ পৰিণতিতো নির্মাণকার্য পলম হৈছে ।"
নির্মাণকার্য লেহেমীয়া হোৱা আন কেইটামান প্রকল্প হৈছে - ডিমৌ-মৰাণ বাইপাছ, ২৯ নম্বৰ ৰাষ্ট্ৰীয় পথ চাৰিলেনযুক্ত কৰা, মাঞ্জা বাইপাছ, মৰাণ বাইপাছৰ পৰা বগীবিললৈ পথ নিৰ্মাণ, জামুগুৰিৰ পৰা বিশ্বনাথ চাৰিআলিলৈ বাইপাছ নিৰ্মাণ আৰু জাতিংগাৰ পৰা হাৰাংগা গাঁৱলৈ পথ নির্মাণ ।
বৰ্তমান অসমত ৩,৯০০.৪৪ কিলোমিটাৰ ৰাষ্ট্ৰীয় ঘাইপথ আছে । ইয়াৰে ৩০ শতাংশৰো অধিক পথ যাতায়াত অনুপযোগী হৈ পৰিছে তথা ভাঙিবলৈ ধৰিছে । ভাঙিবলৈ ধৰা অংশবোৰৰ মেৰামতিৰ বিশেষ উদ্যোগ ঘাইপথ প্ৰাধিকৰণে লোৱা নাই । ফলত ভঙা অংশবোৰ অধিক ভয়ংকৰ হৈ পৰিছে । ইপিনে ৰাজ্যত এপ্ৰিলৰ পৰা আৰম্ভ হৈছে বৰষুণৰ বতৰ ।
এনে সময়ত পথৰ ভালদৰে মেৰামতি কৰাটোও সম্ভৱ নহয় । তদুপৰি বৰষুণে ভঙা অংশবোৰৰ অধিক ক্ষতি কৰে । তেনেস্থলত যাতায়াত ব্যৱস্থা কিমান কষ্টকৰ হ'ব পাৰে সেয়া সহজতে অনুমেয় ।
লক্ষণীয় বিষয় যে অসমত বৰ্তমান ৬৬টা ৰাষ্ট্ৰীয় ঘাইপথ প্ৰকল্প নিৰ্মাণৰত অৱস্থাত আছে । ইয়াৰ দৈৰ্ঘ হ'ল ১,১৯৩ কিলোমিটাৰ । আনহাতে পথৰ মেৰামতি তথা উন্নতিৰ বাবে ৰাষ্ট্ৰীয় ঘাইপথ প্ৰাধিকৰণে বিগত বিত্তীয় বৰ্ষত ৫,২৩৯ কোটি টকা আবণ্টন দিছিল যদিও এই ধন সম্পূর্ণকৈ মোকলাই দিয়া নাই ।
- পথৰ দুৰৱস্থাৰ বাবে বৃদ্ধি পাইছে পথ দুৰ্ঘটনা :
পথ দুৰ্ঘটনা ৰোধ কৰাৰ বাবে চৰকাৰে বিভিন্ন পদক্ষেপ গ্ৰহণ কৰাৰ পাছতো ৰাজ্যখনত পথ দুৰ্ঘটনাৰ সংখ্যা ক্ৰমাৎ বৃদ্ধি পাইছে । শেহতীয়াকৈ মুখ্যমন্ত্রী ড° হিমন্ত বিশ্ব শৰ্মাৰ সংশ্লিষ্ট বিভাগৰ বিষয়াৰে হোৱা পর্যালোচনা বৈঠকত গৃহ বিভাগে দিয়া তথ্য মতে, ২০২৩ চনৰ জানুৱাৰীৰ পৰা নৱেম্বৰলৈ ৰাজ্যখনত মুঠ ৬,৬৯৮টা পথ দুৰ্ঘটনা সংঘটিত হৈছিল ।
ইয়াৰ বিপৰীতে ২০২৪ বৰ্ষৰ জানুৱাৰীৰ পৰা নৱেম্বৰলৈ ১১,৫৫৮ টা পথ দুর্ঘটনা সংঘটিত হয় । সেই হিচাপত ২০২৩ বৰ্ষৰ তুলনাত ২০২৪ বৰ্ষত দুৰ্ঘটনাৰ হাৰ ৭০ শতাংশৰো অধিক বৃদ্ধি পায় ।
ক) তালিকা আকাৰত তলত উল্লেখ কৰা হ'ল-
| চন | মাহ | দুৰ্ঘটনাৰ সংখ্যা |
| ২০২৩ | জানুৱাৰীৰ পৰা নৱেম্বৰলৈ | ৬,৬৯৮ টা |
| ২০২৪ | জানুৱাৰীৰ পৰা নৱেম্বৰলৈ | ১১,৫৫৮ টা |
অৱশ্যে ২০২৩ বৰ্ষৰ তুলনাত ২০২৪ বৰ্ষত মৃত্যুৰ সংখ্যা হ্রাস পায় । কিন্তু আহতৰ সংখ্যা বৃদ্ধি পায় । পর্যালোচনা বৈঠকত সংশ্লিষ্ট বিষয়াসকলে মুখ্যমন্ত্ৰীৰ আগত সদৰী কৰা তথ্য অনুসৰি ৰাজ্যত ৰাস্তা-ঘাটৰ উন্নয়ন হোৱাৰ পাছতো দুৰ্ঘটনাৰ সংখ্যা বৃদ্ধি পাইছে ।
বিশেষকৈ নতুনকৈ নির্মিত ৰাষ্ট্ৰীয় ঘাইপথত পথ দুৰ্ঘটনা সংখ্যা বৃদ্ধি পাইছে । বিশেষকৈ পুৰণি বছৰক বিদায় দি নতুন বছৰক আদৰা, পূজা আদিৰ সময়ত ৰাজ্যৰ পথ দুৰ্ঘটনা সংখ্যা বৃদ্ধি পোৱা বুলি পর্যালোচনা বৈঠকত উন্মোচিত হয় । যাৰ পৰিপ্ৰেক্ষিতত মুখ্যমন্ত্ৰীয়ে দুর্ঘটনা প্ৰতিৰোধ কৰিবলৈ আৰক্ষী, পৰিবহণ, আবকাৰী আদি কেইবাটাও বিভাগক কেতবোৰ নির্দেশনা প্রদান কৰিছিল ।
লক্ষণীয় বিষয় যে নিশা সুৰাপান কৰি বাহন চলোৱা ঘটনা গুৱাহাটী মহানগৰীত বৃদ্ধি পোৱাৰ সমান্তৰাকৈ পথ দুৰ্ঘটনাৰ সংখ্যাও বৃদ্ধি পাইছে । পর্যালোচনা বৈঠকখনত গৃহ বিভাগে দাঙি ধৰা তথ্য অনুসৰি ২০২৪ বৰ্ষৰ জানুৱাৰীত ৮১৯টা পথ দুৰ্ঘটনাত ২২৬ জনৰ মৃত্যু হোৱাৰ লগতে ৯৯৭ জন লোক আহত হৈছিল ।
একেদৰে ফেব্ৰুৱাৰীত ৮২২টা পথ দুৰ্ঘটনাত ২২০ জনৰ মৃত্যু আৰু ১,০৪১ জন আহত হৈছিল । মাৰ্চ মাহত ৯১৪টা পথ দুৰ্ঘটনাত ২১৬ জনৰ মৃত্যু আৰু ১,২১৭ জন আহত হৈছিল । এপ্ৰিল মাহত ৮৪০টা পথ দুৰ্ঘটনাত ২০৫ জনৰ মৃত্যু আৰু ১,১৪৩ জন আহত হৈছিল । মে' মাহত ৮০১টা পথ দুৰ্ঘটনাত ১৮৯ জনৰ মৃত্যু হৈছিল আৰু ১,২৫৮ জন আহত হৈছিল ।
সেইদৰে জুন মাহত ১,২৩৪ টা পথ দুৰ্ঘটনাত ১৯২ জনৰ মৃত্যু আৰু ১,৭০৪ জন আহত হৈছিল । জুলাই মাহত ১,৩১৪ টা পথ দুৰ্ঘটনাত ২১৫ জনৰ মৃত্যু আৰু ১,৭০৭ জন আহত হৈছিল । আগষ্ট মাহত ১,২৭৩ টা পথ দুৰ্ঘটনাত ২৩৯ জনৰ মৃত্যু হোৱাৰ বিপৰীতে ১,৭১৮ জন আহত হৈছিল ।
ছেপ্টেম্বৰ মাহত ১,২৪৯ টা পথ দুৰ্ঘটনাত ২৪৪ জনৰ মৃত্যু হোৱাৰ বিপৰীতে ১,৭৩১ জন আহত হৈছিল । অক্টোবৰ মাহত ১,২১৫ টা পথ দুৰ্ঘটনাত ৩২২ জনৰ মৃত্যু হৈছিল আৰু আহত হৈছিল ১,৭২৫ জন ।
আনহাতে নৱেম্বৰ মাহত ১,০৪৭ টা পথ দুৰ্ঘটনাত ২৫৩ জনৰ মৃত্যু হৈছিল । ২০২৩ বৰ্ষৰ তুলনাত এই বছৰ এঘাৰ মাহত পথ দুর্ঘটনাৰ লগতে আহতৰ সংখ্যা বৃদ্ধি পালেও কিন্তু মৃত্যুৰ সংখ্যা ১৪.২৮ শতাংশ হ্রাস পায় ।
খ) ২০২৪ বৰ্ষত গুৱাহাটী মহানগৰীত সংঘটিত হোৱা দুৰ্ঘটনা, মৃত আৰু আহত লোকৰ সংখ্যাক তালিকা তলত উল্লেখ কৰা হ'ল -
| মাহ | দুৰ্ঘটনাৰ সংখ্যা | মৃত লোকৰ সংখ্যা | আহত লোকৰ সংখ্যা |
| জানুৱাৰী | ৮১৯টা | ২২৬ জন | ৯৯৭ জন |
| ফেব্ৰুৱাৰী | ৮২২টা | ২২০ জন | ১,০৪১ জন |
| মাৰ্চ | ৯১৪টা | ২১৬ জন | ১,২১৭ জন |
| এপ্ৰিল | ৮৪০টা | ২০৫ জন | ১,১৪৩ জন |
| মে' | ৮০১টা | ১৮৯ জন | ১,২৫৮ জন |
| জুন | ১,২৩৪ টা | ১৯২ জন | ১,৭০৪ জন |
| জুলাই | ১,৩১৪ টা | ২১৫ জন | ১,৭০৭ জন |
| আগষ্ট | ১,২৭৩ টা | ২৩৯ জন | ১,৭১৮ জন |
| ছেপ্টেম্বৰ | ১,২৪৯ টা | ২৪৪ জন | ১,৭৩১জন |
| অক্টোবৰ | ১,২১৫ টাৰু | ৩২২ জন | ১,৭২৫ জন |
| নৱেম্বৰ | ১,০৪৭ টা | ২৫৩ জন | --- |
২০২৩ বৰ্ষত ১১ মাহত পথ দুৰ্ঘটনাত ২,৯৪১ জন লোকৰ মৃত্যু হৈছিল যদিও ২০২৪ চনত ১১ মাহত ২,৫২১ জন লোকৰ মৃত্যু হয় । অৱশ্যে পথৰ দুৰৱস্থাৰ উপৰি বহুকেইটা কাৰণ জড়িত হৈ আছে পথ দুৰ্ঘটনাৰ আঁৰত ।
