গুৱাহাটী: "অসমত এতিয়া অঘোষিত জৰুৰীকালীন অৱস্থা চলিছে । মুখ্যমন্ত্ৰী ড৹ হিমন্ত বিশ্ব শৰ্মাই সাংবিধানিক অধিকাৰ ভৰিৰে মোহাৰি সাংবাদিক-সাংসদকে ধৰি সকলোকে আৰক্ষীৰ দ্বাৰা নিৰ্যাতন চলাইছে । এই নিৰ্যাতন বন্ধ কৰিবৰ বাবে কংগ্ৰেছ দলে জনতাৰ ওচৰলৈ সংগ্ৰাম কঢ়িয়াই লৈ যাব"- এই মন্তব্য নিখিল ভাৰত কংগ্ৰেছৰ অসমৰ দায়িত্বত থকা সম্পাদক মনোজ চৌহানৰ ।
বুধবাৰে গুৱাহাটীৰ ৰাজীৱ ভৱনত এখন সংবাদমেল সম্বোধন কৰি কংগ্ৰেছ নেতা চৌহানে কয়, "হিমন্ত বিশ্ব শৰ্মাই সকলো পক্ষৰ ওপৰত এতিয়া হেঁচা প্ৰয়োগ কৰা আৰম্ভ কৰিছে । ক্ষমতাৰ ৰাগীত মুখ্যমন্ত্ৰীজনে মানুহৰ মৌলিক অধিকাৰ খৰ্ব কৰিছে । তেওঁ যিমানে হেঁচা প্ৰয়োগ কৰিব তাৰ ওলোটা প্ৰতিক্ৰিয়া হ’বই আৰু ২০২৬ চনত অসমৰ ৰাইজে হিমন্ত বিশ্ব শৰ্মাৰ নেতৃত্বৰ চৰকাৰ ওফৰাই দিব" ৷
চৌহানে লগতে কয়, "এক্স হেণ্ডলত গ্ৰোক নামৰ এপছটোত ভাৰতৰ আটাইকেইতকৈ দুৰ্নীতিগ্ৰস্ত মুখ্যমন্ত্ৰী কোন বুলি প্ৰশ্ন কৰিলে অসমৰ মুখ্যমন্ত্ৰী হিমন্ত বিশ্ব শৰ্মাৰ নাম আহে । হিমন্ত বিশ্ব শৰ্মাৰ যদি দম আছে ভাৰতত গ্ৰোক এক্স হেণ্ডল বন্ধ কৰক আৰু এলন মাস্কৰ বিৰুদ্ধে গোচৰ ৰুজু কৰাৰ সাহস দেখুৱাওক । দুৰ্নীতি আৰু ভ্ৰষ্টাচাৰত নিমজ্জিত হিমন্ত বিশ্ব শৰ্মাই গণতান্ত্ৰিক প্ৰক্ৰিয়াবোৰক ভয় কৰে" ৷
ইয়াৰোপৰি চৌহানে কয়, "অসম বিধানসভাত বিজেপিৰ এজন বিধায়কে বিৰোধীৰ বিধায়কক আক্ৰমণ কৰিবলৈ খেদি যোৱাৰ পিছতো বিজেপিৰ বিধায়কৰ বিৰুদ্ধে কোনো ব্যৱস্থা গ্ৰহণ কৰা নাছিল । অসমৰ সাংসদ তথা লোকসভাৰ উপ-দলপতি গৌৰৱ গগৈৰ ভাৱমূৰ্তি ম্লান কৰিবৰ বাবে তেওঁ আৰু তেওঁৰ পত্নীৰ বিৰুদ্ধে ভুৱা অপপ্ৰচাৰ চলালে । নগাঁৱত সাংসদ ৰকিবুল হুছেইনৰ ওপৰত দিন-দুপৰতে আক্ৰমণ চলিল । গোগামুখত কংগ্ৰেছ কৰ্মীৰ ওপৰত নিৰ্যাতন চলিল" ৷
সাংবাদিকক গ্ৰেপ্তাৰ প্ৰসংগত কয়, "এতিয়া সাংবাদিক দিলোৱাৰ হুছেইনক ষড়যন্ত্ৰমূলকভাৱে গ্ৰেপ্তাৰ কৰা হৈছে । আইন হাতত তুলি লোৱাটো হিমন্ত বিশ্ব শৰ্মাৰ নীতি হৈ পৰিছে" ৷ চৌহানে কয়, "কংগ্ৰেছ নেতা ৰাহুল গান্ধীয়ে দেশৰ সকলো মুখ্যমন্ত্ৰীৰ ভিতৰত আটাইতকৈ ভ্ৰষ্টাচাৰী মুখ্যমন্ত্ৰী হিমন্ত বিশ্ব শৰ্মা বুলি বহুদিন পূৰ্বেই আখ্যা দি থৈছিল আৰু আজি সেই কথা প্ৰমাণিত হৈছে । দেশৰ সংবিধান সলনি কৰিবলৈ বিজেপিয়ে ষড়যন্ত্ৰ কৰি লোকসভাত ৪০০ খন আসন লাভ কৰাৰ যি পৰিকল্পনা কৰিছিল, সেয়া নেতা ৰাহুল গান্ধীৰ ভাৰত জোড়ো ন্যায় যাত্ৰাৰ পিছত সম্ভৱ হৈ নুঠিল আৰু প্ৰধানমন্ত্ৰীৰ দায়িত্ব লৈ নৰেন্দ্ৰ মোদীয়ে সংবিধান শিৰত ল’বলগীয়া হ’ল" ৷
কংগ্ৰেছ নেতাজনে মুখ্যমন্ত্ৰী হিমন্ত বিশ্ব শৰ্মাৰ কেলেংকাৰীৰ সকলো তথ্য লৈ ৰাইজৰ ওচৰলৈ লৈ যাব বুলি উল্লেখ কৰি কয়, "অপৰাধৰ তথ্য লুকুৱাবৰ বাবে এইখন চৰকাৰে থানাসমূহত গোচৰ ৰুজু কৰাৰ ক্ষেত্ৰতো বাধ্যবাধকতা সৃষ্টি কৰিছে । বহু আৰক্ষী থানাই গোচৰ ৰুজু নকৰাৰ অভিযোগ আছে ৷ তৎস্বত্বেও এন চি আৰ বিৰ তথ্যত অসমত মহিলাৰ ওপৰত চলা নিৰ্যাতন দেশৰ ভিতৰত অন্যতম বুলি উল্লেখ কৰিছে" ৷
দেশৰ আইন শৃংখলাৰ পৰিস্থিতি বেয়া হোৱাৰ বাবে আমেৰিকা-অষ্ট্ৰেলিয়া, কানাডাকে ধৰি ছয়খন বিদেশী ৰাষ্ট্ৰই অসম ভ্ৰমণ সুৰক্ষিত নহয় বুলি হিমন্ত বিশ্ব শৰ্মাৰ মন্ত্ৰীয়ে সদনত তথ্য দাখিল কৰা বুলিও চৌহানে উল্লেখ কৰে । সংবাদমেলত প্ৰদেশ কংগ্ৰেছৰ মিডিয়া বিভাগৰ অধ্যক্ষ বেদব্ৰত বৰা আৰু মহানগৰ জিলা কংগ্ৰেছৰ সভাপতি গোপাল শৰ্মা উপস্থিত থাকে ।
