হাফলং: নেৰানেপেৰা বৰষুণৰ ফলত ঠায়ে ঠায়ে ভয়ংকৰ ৰূপ ধাৰণ কৰিছে ভূমিস্খলনে । ওফন্দি উঠিছে নৈ-উপনৈসমূহ । ভাবুকি আহিছে লামডিং-বদৰপুৰ পাহাৰ লাইনৰ ৰে'ল সেৱালৈ । যিকোনো মুহূৰ্ততে বন্ধ হৈ পৰিব পাৰে লামডিং-বদৰপুৰ পাহাৰ লাইনত ৰে'ল চলাচল ।
ডিমা হাছাও জিলাত হৈ থকা নেৰানেপেৰা বৰষুণৰ বাবে লামডিং-বদৰপুৰ পাহাৰ লাইনৰ জাতিংগা লামপুৰ আৰু নিউহাৰেংগাজাও ষ্টেচনৰ মাজত ৰে'ল লাইনৰ ওপৰত পানী ভৰ্তি হৈ পৰিছে । পাহাৰৰ পৰা দ্ৰুত গতিত নামি আহিছে বোকা পানী । যাৰ বাবে ৰে'ল চলাচল বিঘ্নিত হৈ পৰিছে ।
ইপিনে লামডিং, হাফলং, শিলচৰৰ ২৭ নম্বৰ ৰাষ্ট্ৰীয় ঘাইপথৰ জাতিংগাৰ ওচৰতে এখন দলঙত ফাট মেলা পৰিলক্ষিত হৈছে । আন ঘাইপথৰ এটা অংশতো ফাট মেলা দেখা গৈছে । ইপিনে ধাৰাসাৰ বৰষুণৰ বাবে ডিমা হাছাও জিলাৰ জনজীৱন সম্পূৰ্ণৰূপে বিপৰ্যস্ত হৈ পৰিছে ।
হাফলং চহৰত বিভিন্ন ঠাইত গছ বাগৰি পৰাৰ বাবে শুকুৰবাৰৰ পৰা হাফলং চহৰত বিদ্যুৎ সেৱাও ব্যাহত হৈ পৰিছে ।
পাহাৰীয়া জিলাখনত বতৰে ভয়ংকৰ ৰূপ ধাৰণ কৰিছে । ধাৰাসাৰ বৰষুণৰ ফলত জিলাখনৰ বিভিন্ন ঠাইত গছ বাগৰি পৰাৰ উপৰি ভূমিস্খলনৰ বাবে বন্ধ হৈ পৰিছে বাট-পথ । ইফালে ডিমা হাছাও জিলাৰ আয়ুক্ত তথা জিলা দুৰ্যোগ প্ৰশমন বিভাগৰ অধ্যক্ষ সীমান্ত কুমাৰ দাসে স্থানীয় ৰাইজক বিনা কামত ঘৰৰ পৰা ওলাই নাহিবলৈ পৰামৰ্শ দিছে ।
আনহাতে ভূমিস্খলনৰ বাবে ২৭ নম্বৰ ৰাষ্ট্ৰীয় ঘাইপথৰ জাতিংগা আৰু হাৰেংগাজাওৰ মাজত ২ মে'লৈকে গধুৰ যানবাহনৰ চলাচল বন্ধ থাকিব । অন্যহাতে উমৰাংছ' কপিলী জলবিদ্যুৎ প্ৰকল্পৰ খানডং ডেমত ভয়ংকৰভাৱে জলপৃষ্ঠ বৃদ্ধি পোৱাৰ ফলত নিপকোৱে খুলি দিয়ে সাতখনকৈ গেট । যাৰ বাবে কপিলীৰ নৈপৰীয়া অঞ্চলসমূহত বানৰ সম্ভাৱনা প্ৰবল হৈ পৰিছে ।
