বোমা সংস্থাপন: ভাৰতীয় সেনাৰ সৈতে বৈঠক মিলিত অসম আৰক্ষীৰ শীৰ্ষ বিষয়া - Bomb plan by ULFA I

মৰাণ, 18 আগষ্ট: ৰাজ্যৰ শেহতীয়া আইন-শৃংখলা পৰিস্থিতিক লৈ উদ্বিগ্ন অসম আৰক্ষী ৷ এই সন্দৰ্ভত দেওবাৰে ডিব্ৰুগড়ত অনুষ্ঠিত হয় অসম আৰক্ষীৰ শীৰ্ষ পৰ্যায়ৰ বৈঠক । ডিব্ৰুগড়ৰ দৌলত সিং নেগী গেষ্ট হাউছৰ সভাকক্ষত ডিব্ৰুগড়, তিনিচুকীয়াৰ লগতে উজনিৰ বিভিন্ন জিলাৰ আৰক্ষী অধীক্ষকৰ লগত বৈঠক অনুষ্ঠিত হয় ।

আলফা স্বাধীনে বোমা সংস্থাপিত কৰা বুলি বিবৃত্তিযোগে জনোৱাৰ পাছতে‌ দেওবাৰে ডিব্ৰুগড়ত উপস্থিত‌ হয় অসম আৰক্ষীৰ বিশেষ শাখাৰ সঞ্চালক প্ৰধান হৰমিৎ সিং, আই জি পি পার্থ সাৰথি মহন্ত । ডিব্ৰুগড়ৰ দৌলত সিং নেগী গেষ্ট হাউছৰ সভাকক্ষত অনুষ্ঠিত হোৱা আৰক্ষীৰ শীৰ্ষ পৰ্যায়ৰ বৈঠকত সেনা বাহিনীৰ শীৰ্ষ পৰ্যায়ৰ বিষয়াই অংশগ্ৰহণ কৰিছে ।

78 সংখ্যক স্বাধীনতা আন্দোলনৰ সময়ত আলফা স্বাধীনে ৰাজ্যৰ বিভিন্ন ঠাইত 25 টাকৈ বোমা সংস্থাপনৰ বিষয়টোক প্ৰাধান্য প্ৰদান কৰিয়েই এই আলোচনা অনুষ্ঠিত হৈছে বুলি জানিব পৰা গৈছে ।

উল্লেখ কৰা প্ৰয়োজন যে স্বাধীনতা দিৱসৰ দিনটোত ৰাজ্যৰ 25 টা স্থানত বোমা স্থাপন কৰি নিজৰ অস্তিত্ব জাহিৰ কৰিলে আলফা (স্বা) এ । আলফা স্বাধীনে স্বাধীনতা দিৱস বৰ্জনৰ আহ্বান জনাই স্বাধীনতা দিৱসৰ দিনটোত পুৱা 6-12 বজালৈকে সামৰিক অভিযানৰ চলোৱাৰ ভাবুকি প্ৰদান কৰিছিল । অৱশ্যে আলফাৰ এই ভাবুকিক অসম আৰক্ষীয়ে গুৰুত্ব দিয়া নাছিল যদিও আলফা (স্বা) এ ই-মেইলযোগে প্ৰেছ বিজ্ঞপ্তি প্ৰদান কৰি কয় যে সংগঠনটোৰ সামৰিক অভিযানৰ অংশ হিচাপে ৰাজ্যৰ 25 টা স্থানত বোমা সংস্থাপন কৰা আছে । কাৰিকৰী বিজুতিৰ ফলত তেওঁলোকৰ এই অভিযান সফল নহ’ল । ইয়াৰ পাছতে ৰাজ্যত হাহাকাৰ পৰিৱেশৰ সৃষ্টি হোৱাৰ লগতে আজিও ডিব্ৰুগড়ৰ লগতে বহু কেইজন জিলাত বোমা বিচাৰি আৰক্ষী আৰু সেনাই অভিযান অব্যাহত ৰাখিছে ।

উল্লেখ্য যে আজি ডিব্ৰুগড়ত সম্পন্ন হৈ যোৱা বৈঠক সন্দৰ্ভত আৰক্ষীয়ে কোনো তথ্য ৰাজহুৱা কৰা নাই ।