মাৰ্ঘেৰিটাৰ কয়লা ছিণ্ডিকেটে ধনী কৰিছে কাক কাক ? ক'লে বৰদলৈয়ে
দ্বিতীয়বাৰ সাংসদ হোৱাৰ পিছত প্ৰথমবাৰৰ বাবে গৃহজিলাত উপস্থিত প্ৰদ্যুৎ বৰদলৈ ৷
Published : October 30, 2024 at 9:33 PM IST
তিনিচুকীয়া: “তিনিচুকীয়া জিলাৰ মাৰ্ঘেৰিটাত চোৰাং কয়লাৰ সৰবৰাহত স্থানীয় বিধায়ক বা আৰক্ষীয়েই নহয়, একাংশ সাংবাদিককো ছিণ্ডিকেট চক্ৰই মুখ বন্ধ কৰিবলৈ কিনি ৰাখিছে ৷” এই মন্তব্য নগাঁৱৰ সাংসদ তথা মাৰ্ঘেৰিটা সমষ্টিৰ প্ৰাক্তন বিধায়ক প্ৰদ্যুৎ বৰদলৈৰ ৷ দ্বিতীয়বাৰৰ বাবে নগাঁও লোকসভা সমষ্টিৰ পৰা সাংসদ হিচাপে জয়যুক্ত হোৱাৰ পাছত বুধবাৰে প্ৰথমবাৰৰ বাবে গৃহজিলা তিনিচুকীয়াত উপস্থিত হয় বৰদলৈ ৷ ইয়াৰ পাছতেই তেওঁ এই মন্তব্য কৰে ৷
সাংসদ তথা মাৰ্ঘেৰিটা সমষ্টিৰ প্ৰাক্তন বিধায়ক বৰদলৈক সম্বৰ্ধনা জনাবলৈ তিনিচুকীয়াৰ হোটেল এৰ’মাত তিনিচুকীয়া জিলা কংগ্ৰেছে এক সম্বৰ্ধনা জ্ঞাপন অনুষ্ঠানৰ আয়োজন কৰে । সংবাদ মাধ্যমক সম্বোধন কৰি বৰদলৈয়ে মাৰ্ঘেৰিটা আৰু তিনিচুকীয়াৰ সৈতে থকা সম্পৰ্কৰ কথা উল্লেখ কৰি মাৰ্ঘেৰিটাৰ জন্মস্থান আৰু তিনিচুকীয়া গৃহজিলা আৰু কৰ্মক্ষেত্ৰ বুলি অভিহিত কৰে ।
মাৰ্ঘেৰিটাৰ পৰা চাৰিবাৰৰ নিৰ্বাচিত বিধায়ক তথা কেবিনেট মন্ত্ৰী হিচাপে নিজৰ যাত্ৰাৰ কথা মনত পেলাই তেওঁ আন্তৰিক কৃতজ্ঞতা প্ৰকাশ কৰে । জিলাখনৰ জনসাধাৰণৰ পৰা যি মৰম আৰু সন্মান পাইছে সেয়া তেওঁৰ বাবে অসীম বুলি মন্তব্য কৰে । ইফালে মাৰ্ঘেৰিটাৰ চোৰাং কয়লাৰ সন্দৰ্ভত মন্তব্য কৰি ৫০-৬০ চকীয়া কয়লাভৰ্তি ট্ৰাক সৰবৰাহ হয় যদিও আৰক্ষীয়ে সেয়া নেদেখে বুলি উল্লেখ কৰি অবৈধ কয়লা সৰবৰাহৰ সন্দৰ্ভত বনোৱা কমিটীও এক ভেকোভাওনা বুলি উল্লেখ কৰে ।
সমান্তৰালভাৱে, আগন্তুক উপ-নিৰ্বাচনৰ বাবে বিহালী, চামগুৰি, বঙাইগাঁও, ধলাই, চিদলী আটাইকেইটা সমষ্টিতে কংগ্ৰেছৰ তৰফৰ পৰা প্ৰাৰ্থিত্ব দিয়া হৈছে বুলি উল্লেখ কৰি নিৰ্বাচনত কংগ্ৰেছে ভাল ফলাফল দেখুৱাবলৈ সক্ষম হ’ব বুলি মন্তব্য কৰে বৰদলৈয়ে ।
