নিউজ ডেস্ক : বিগত কেইবাদিন ধৰি ৰাজ্য়ৰ বিভিন্ন প্ৰান্তত হৈ মুষলধাৰ বৰষুণৰ ফলত কেবাখনো জিলা বানৰ কবলত পৰিছে । এই বছৰৰ প্ৰথমটো বানত কেবাখনো নৈ-উপনৈৰ জলস্তৰ বৃদ্ধি পোৱাত বান পৰিস্থিতিয়ে ক্ৰমাৎ জটিল ৰূপ ধাৰণ কৰিছে । লখিমপুৰৰ লগতে ডিব্ৰুগড়, শিৱসাগৰ, যোৰহাটৰ বহুতো অঞ্চল বানৰ কবলত পৰিছে ।
জলবন্দী লখিমপুৰ :
ৰঙানদীৰ বলিয়া বানৰ কবলত পৰিছে লখিমপুৰ জিলা । নীপকোৱে ৰঙানদী জলবিদ্যুৎ প্ৰকল্পৰ পৰা এৰি দিয়া অতিৰিক্ত জলৰাশি যোগ হোৱাৰ পাছত ৰঙানদীয়ে বলিয়া ৰূপ ধাৰণ কৰি লখিমপুৰত ধন- জনৰ বিস্তৰ ক্ষতিসাধন কৰিছে । ৰঙানদীৰ সমানে সোৱণশিৰিৰ বানতো ত্রাহি মধুসূদন সুৱৰিছে লখিমপুৰৰ ৰাইজে ।
সোৱণশিৰিৰ বানে বিধ্বস্ত কৰিছে ঐতিহাসিক ঘুনাসুতিক । নীপকোৱে ৰঙানদীত ৰঙানদী প্ৰকল্পৰ জলাধাৰৰ পৰা অতিৰিক্ত জলৰাশি মোকলাই দিয়াৰ পৰিণতিত শুকুৰবাৰৰ নিশাৰে পৰাই লখিমপুৰৰ পাচনৈ পহুমৰা, পানীগাঁও, আমতলা আদি অঞ্চল বিধ্বস্ত হৈ পৰে । পথ, বান্ধ আদি ভাঙি-ছিঙি ৰঙানদীৰ বলিয়া বানে এই অঞ্চলসমূহত অবৰ্ণনীয় পৰিৱেশৰ সৃষ্টি কৰিছে । দুজনকৈ লোক মৃত্যুমুখত পৰাৰ উপৰি অজস্র পোহনীয়া জীৱ-জন্তুৰ হানি হয় ।
লেখ-জোখ নোহোৱাকৈ ঘৰ-বাৰী, সা-সম্পত্তিৰ ক্ষতি হয় । এনে বান পৰিস্থিতি আজিও অপৰিৱৰ্তিত হৈ আছে । জিলাখনত বিপদসীমাৰ ওপৰত আছে তিনিখনকৈ নদীৰ জলপৃষ্ঠ । জামুগুৰিত ব্ৰহ্মপুত্ৰ, শিলিখাগুৰিত সোৱণশিৰি আৰু চিচাপথাৰত ডিক্ৰং নদীৰ জলপৃষ্ঠ বিপদসীমাৰ ওপৰৰে বৈ আছে । নীপকোৱে পৰিমাণ কমালেও আজিও প্ৰকল্পৰ পানী এৰিয়েই আছে । জিলা প্ৰশাসনৰ তথ্য মতে, কালিৰ দিনটোত ৯৫ খন গাঁও বানৰ কবলত পৰিছে । ৰঙানদীৰ এনে বলিয়া বানৰ সমানে কালিৰ পৰা সোৱণশিৰি নদীয়েও ঘুনাসুতিত প্ৰৱল বানৰ সূচনা কৰে ।
ৰঙানদীৰ দৰে ঘূণাসুতিত অঞ্চলত বানৰ তাণ্ডব সৃষ্টি কৰে সোৱণশিৰিয়ে । দুদিন ধৰি বানপানীৰ কবলত আছে ঘূণাসুতি গাঁও পঞ্চায়তৰ অন্তৰ্গত নাহৰণী, বালিভেটা, ১নং নাহৰনী মিচিং গাঁও, বৰ্চাপৰি, উৰীয়ামতলা, শগুনেখোৱা আদি প্ৰায় ৬খন গাঁও । উল্লেখ্য় যে শনিবাৰে পুৱা প্ৰায় ৫ বজাত গাঁওবোৰত পানী সোমাই ।
বানপানীয়ে ছাগলী, কুকুৰা আদি উটুৱাই লৈ যায় বুলি ৰাইজে জানিবলৈ দিয়ে । ইপিনে, বিশুদ্ধ খোৱা পানীৰ পৰা বঞ্চিত হৈ আছে অঞ্চলবাসী । জিলা প্ৰশাসনৰ ফালৰ পৰা আজিলৈকে খবৰ নোলোৱাৰ অভিযোগক কৰিছে বানৰ কবলত থকা লোকেসকলে । অৰুণাচলত ধাৰাষাৰ বৰষুণ হোৱাৰ ফলত ধেমাজি জিলাৰ গোগামুখত নিৰ্মাণ কৰা নামনি সোৱণশিৰি জল বিদ্যুত প্ৰকল্পৰ (NHPC) পানী এৰি দিয়াৰ ফলত ঘুনাসুতিত প্ৰথমটো বানপানীৰ সৃষ্টি হয় বুলি ৰাইজে অভিযোগ তুলিছে ।
ডিব্ৰুগড়ৰ বগীবিলৰ আইথানত মন্ত্ৰী প্ৰশান্ত ফুকন :
ডিব্ৰুগড়ত এইবাৰ ব্ৰহ্মপুত্ৰ আৰু উপ-নদীসমূহে লৈছে ভয়াৱহ ৰূপ । বিগত কেইবাদিনো ধৰি নেৰেনেপেৰা বৰষুণ হোৱা পাছতে ভয়াবহভাৱে বৃদ্ধি হৈছে ব্ৰহ্মপুত্ৰৰ জলস্তৰ । ডিব্ৰুগড়ত বিপদসীমা অতিক্ৰম কৰি বৈ আছে মহাবাহু । ডিব্ৰুগড়ত বিপদ সীমাৰ পৰিমাণ ১০৫.৭০ মিটাৰ; কিন্তু দেওবাৰে বিয়লি ১০৫.৮৫ মিটাৰ অতিক্ৰম কৰিছে ব্ৰহ্মপুত্ৰৰ পানী ।
ব্ৰহ্মপুত্ৰৰ জলস্তৰ ভয়াবহভাৱে বৃদ্ধি পোৱাত চিন্তিত হৈ পৰিছে নৈপৰীয়া ৰাইজ । জিলা প্ৰশাসনে সম্ভাব্য বান পৰিস্থিতিৰ বাবে সকলো ধৰণে সাজু থকা বুলি জানিবলৈ দিছে । বিগত কেইবাদিনো ধৰি জিলা আয়ুক্তগৰাকীয়ে জিলাৰ প্ৰতিটো বিভাগৰ সৈতে বান পৰিস্থিতিক লৈ পৰ্যালোচনা বৈঠকত অংশ লৈছে ।
বগীবিলৰ ভিন্ন অঞ্চল বানৰ কবলত পৰাৰ পাছতে বান পৰিস্থিতি বুজ ল'লে শক্তিমন্ত্ৰী প্ৰশান্ত ফুকনে । মন্ত্ৰীগৰাকীয়ে পৰিদৰ্শন কৰে বানে প্লাৱিত কৰা অঞ্চলসমূহ । ডিব্ৰুগড় চহৰৰ পৰা বগীবিল আইথান সংযোগী মথাউৰিটোৰ বিভিন্ন অংশত পানীৰ পুং ওলাবলৈ আৰম্ভ কৰিছে । ফলত আতংকময় পৰিবেশৰ সৃষ্টি হৈছে নৈকাষৰীয়া অঞ্চলসমূহৰ প্ৰায় ৩০ খনকৈ গাঁৱৰ বাসিন্দা । ইয়াৰ বাবে মন্ত্ৰী প্ৰশান্ত ফুকনে তৎকালীনভাৱে ব্যৱস্থা ল'বলৈ জলসম্পদ বিভাগক নিৰ্দেশ দিয়ে ।
বান পৰিস্থিতিৰ বুজ লৈ মন্ত্ৰী প্ৰশান্ত ফুকনে কয়, "কালিৰ পৰা পানী বাঢ়িবলৈ ধৰিছে । ডিব্ৰুগড় চহৰৰ পৰা বগীবিল আইথান সংযোগী মথাউৰিটো কোনো কোনো ঠাইত পানী লিকেজ হৈছে । বিভিন্ন কাৰণত এনে ঘটনা হয় । মথাউৰিৰ পানী লিকেজ বন্ধ কৰিবলৈ বিভাগীয় বিষয়াসকলে কাম কৰি আছে । এতিয়া অঞ্চলটোৰ ৰাইজ সুৰক্ষিত । ডিব্ৰুগড় চহৰৰ পৰা বগীবিল আইথান সংযোগী মথাউৰিটো সুৰক্ষিত হৈ আছে আৰু থাকিব সেইটো ডিব্ৰুগড়ৰ ৰাইজক কথা দিছো ।"
টিংখাঙৰ কেইবাখনো গাঁও বাঢ়নী পানীৰ কবলত :
নেৰানেপেৰা বৰষুণৰ পাছতে উফন্দি উঠিছে ব্ৰহ্মপুত্ৰ আৰু বুঢ়ীদিহিং । আজি টিংখাঙৰ ২ নং শলগুৰি, শলগুৰি, কৈৱৰ্ত গাঁৱৰ, আঘুনীবাৰী আদি অঞ্চলত শ শ ৰাইজ বুঢ়ীদিহিং নদীৰ বাঢ়নী পানীৰ কবলত । গাঁওসমূহৰ মূল পথ পানীয়ে বুৰাই পেলোৱাত যাতায়াত বন্ধ । মূল পথটোৰ ঠায়ে ঠায়ে একাঁঠু একঁকাল পানী হোৱাত যাতায়ত বন্ধ হৈ পৰিছে ।
গাঁওসমূহত থকা প্ৰায়বোৰ ৰাজহুৱা অনুষ্ঠানৰ চৌহদ ইতিমধ্যে বুঢ়ীদিহিঙৰ পানীয়ে বুৰাই পেলাইছে । অঞ্চলটোৰ শ শ বিঘা কৃষি ভূমি পানীত বুৰ গৈছে । ইয়াৰ পৰিপ্ৰেক্ষিতত টিংখাঙৰ নদী কাষৰীয়া গাঁও সমূহৰ ৰাইজৰ মাজত হাহাঁকাৰ পৰিস্থিতি সৃষ্টি হৈছে।
হাফলং-শিলচৰ ঘাইপথত ভূমিস্খলন :
নেৰানেপেৰা বৰষুণৰ বাবে এতিয়া হাফলং-শিলচৰ ২৭ নম্বৰ ৰাষ্ট্ৰীয় ঘাইপথৰ অৱস্থা তথৈবচ হৈছে । ভূমিস্খলনৰ বাবে হাফলং-শিলচৰ ৰাষ্ট্ৰীয় ঘাইপথ সম্পূৰ্ণ ৰূপে বিধ্বস্ত হৈ পৰে । আজি দিনৰ ভাগত এখন বাহন পানীৰ সোঁতত উটি যায় । হাফলং-শিলচৰ ৰাষ্ট্রীয় ঘাইপথৰ ৰেটজল, বৰমূলকই, কাপোৰচৰা, দলাইচুঙা আদি এলেকাত বৈছে পানীৰ সোঁত । জিলা প্ৰশাসনে ৰাষ্ট্ৰীয় ঘাইপথত যানবাহন চলাচলত নিষেধাজ্ঞা জাৰি কৰিছে ।
শিৱসাগৰত ভাঙিল শ্লুইচ গেট :
মেৰামতিৰ নকৰাৰ ফলত ভাঙিল ৰৌমাৰীৰ শ্লুইচ গেট । বিগত কেইবাদিন ধৰি হৈ থকা বৰষুণৰ বাবে পানীৰ সোঁত বৃদ্ধি পোৱাত ৰৌমাৰি শ্লুইচ গেট ভাঙি যোৱাৰ ফলত বহত্তৰ অঞ্চলটোৰ প্ৰতি কঢ়িয়াই আনিছে ভাবুকি। অবিৰতভাৱে ব্ৰহ্মপুত্ৰৰ পানী সোমাইছে জনাকীৰ্ণ অঞ্চলত । ফলত হানি হৈছে পশুধনৰ । অনতিপলমে এই গেটটোৰ মেৰামতিৰ ব্যৱস্থা নকৰিলে শিৱসাগৰ নগৰৰ দাঁতিকাষৰীয়া অঞ্চলৰ প্ৰতি ভাবুকি কঢ়িয়াই আনিব বুলি স্থানীয় ৰাইজে আশংকা প্ৰকাশ কৰিছে ।
