মৰাণ: অপৰাধ নিয়ন্ত্ৰণ কৰিবলৈ তৎপৰ হৈ থকা আৰক্ষীৰ বেহু ফালি এইবাৰ গভাইত চোৰৰ চকু পৰিল দণ্ডাধীশৰ ঘৰৰ সোণত । স্মাৰ্ট আৰক্ষীক বিমোৰত পেলাই এইবাৰ দণ্ডাধীশৰ ঘৰত চোৰে চলালে চাফাই অভিযান ৷ চোৰে লুটি নিলে নাহৰকটীয়াৰ এগৰাকী দণ্ডাধীশৰ সোণৰ গহণা ৷
ইয়াৰ পিচতেই আৰম্ভ হ'ল অভিযান । চুৰি সোণৰ সন্ধানত মৰাণ নগৰত নাহৰকটীয়া আৰু মৰাণ আৰক্ষীৰ যুটীয়া অভিযান চলায় ৷ মৰাণ নগৰস্থিত দিপালী জুৱেলাৰ্ছৰ পৰা উদ্ধাৰ পাঁচ লক্ষাধিক টকা মূল্যৰ চুৰি গহণা ৷
উল্লেখ্য যে বৃহস্পতিবাৰে নাহৰকটীয়াৰ কল্যাণ নগৰত ভাড়াতীয়া হিচাপে থকা এগৰাকী প্ৰথম শ্ৰেণীৰ ন্যায়িক দণ্ডাধীশৰ বাসগৃহৰ পৰা চোৰে লুটি নিছিল প্ৰায় ২০ লাখ টকা মূল্যৰ সোণৰ গহণা ৷ চিচিটিভি ফুটেজৰ ভিত্তিত আৰক্ষীয়ে তদন্ত কৰি নিশাৰ ভিতৰতে শিৱসাগৰৰ পৰা গ্ৰেপ্তাৰ কৰে অংকুৰ দাস নামৰ এটা চোৰক ।
এই চোৰটোৰ স্বীকাৰোক্তিৰ ভিত্তিত শুকুৰবাৰে নাহৰকটীয়া আৰক্ষীয়ে মৰাণ আৰক্ষীৰ সহযোগত অভিযান চলাই মৰাণ কুশল নগৰস্থিত দিপালী জুৱেলাৰ্ছৰ পৰা উদ্ধাৰ কৰে চুৰি হোৱা সোণৰ প্ৰায় ৫ লাখ টকা মূল্যৰ অলংকাৰ ৷
আৰক্ষীয়ে দিপালী জুৱেলাৰ্ছৰ গৰাকীকো আটক কৰি সোধ-পোছ অব্যাহত ৰাখিছে ৷ এগৰাকী দণ্ডাধীশৰ ঘৰৰ পৰাই চোৰে সোণৰ অলংকাৰ লুট কৰি নিয়া ঘটনাই নাহৰকটীয়াত চাঞ্চল্য সৃষ্টি কৰিছে ৷
মৰাণত দণ্ডাধীশৰ ঘৰৰ পৰাই চুৰি হোৱা সোণৰ অলংকাৰ বিচাৰি অভিযান চলাই নামৰূপৰ উপ-আৰক্ষী অধীক্ষকগৰাকীয়ে কয়, "নাহৰকটীয়াত এটা চুৰিৰ ঘটনা হৈছিল । তাৰ চিচিটিভি ফুটেজ লাভ কৰিছিলো । এজনক কালি শিৱসাগৰৰ পৰা আটক কৰিছো । তেওঁৰ স্বীকাৰোক্তিৰ ভিত্তিত আমি অভিযান চলাই কিছু উদ্ধাৰ কৰিছো । অভিযোগকাৰীয়ে জনোৱা মতে, প্ৰায় ২০ লাখ টকা মূল্যৰ সোণ চুৰি হৈছে; কিন্তু আমি কম পাইছো, তাৰবাবে অভিযান চলিব ।"
