দুলাল আলীয়ে হাহাকাৰ লগাইছে নগাঁও কেন্দ্ৰীয় কাৰাগাৰত
নগাঁও কেন্দ্ৰীয় কাৰাগাৰৰ পৰা পলায়ন অভিযুক্তৰ । কাৰাগাৰ কৰ্তৃপক্ষৰ এজাহাৰৰ ভিত্তিত ৰুজু গোচৰ । কাৰাগাৰত হাহাকাৰ ।
Published : February 12, 2025 at 5:31 PM IST
নগাঁও: মৰিগাঁও কাৰাগাৰৰ পৰা একেলগে পাঁচজনকৈ অভিযুক্তই পলায়ন কৰা ঘটনাৰ পাছত এইবাৰ নগাঁও কেন্দ্ৰীয় কাৰাগাৰত লাগিল হাহাকাৰ । নগাঁও কেন্দ্ৰীয় কাৰাগাৰৰ পৰা এজন অভিযুক্তই পলায়ন কৰা ঘটনাই চাঞ্চল্যৰ সৃষ্টি কৰাৰ লগতে কাৰাগাৰ কৰ্তৃপক্ষৰ মাজত লগাইছে হাহাকাৰ । নগাঁও আৰক্ষীয়ে এটা চুৰি গোচৰত গ্ৰেপ্তাৰ কৰি ন্যায়িক জিম্মালৈ প্ৰেৰণ কৰা এটা অভিযুক্তই মঙলবাৰে বিয়লি কাৰাগাৰৰ পৰা পলায়ন কৰে । পলায়ন কৰা অভিযুক্তজনৰ নাম দুলাল আলী ।
নগাঁও জিলা আৰক্ষী অধীক্ষক স্বপ্ননীল ডেকাই জনোৱা মতে, বিগত ৯ ফেব্ৰুৱাৰীত নগাঁও চহৰৰ শিয়ালমাৰীৰ পৰা এটা চুৰি গোচৰত গ্ৰেপ্তাৰ কৰি ন্যায়িক জিম্মাত নগাঁও কেন্দ্ৰীয় কাৰাগাৰত প্ৰেৰণ কৰিছিল দুলাল আলীক । দুলাল আলীৰ বিৰুদ্ধে চুৰি গোচৰত ১০৮/২৫ নম্বৰত এক গোচৰ ৰুজু কৰি জেল হাজোতলৈ প্ৰেৰণ কৰা বুলি জানিবলৈ দিয়ে নগাঁও সদৰ আৰক্ষী থানাৰ ভাৰপ্ৰাপ্ত বিষয়া দেৱজিৎ দাসে । কিন্তু নগাঁও কেন্দ্ৰীয় কাৰাগাৰৰ কটকটীয়া নিৰাপত্তাৰ বেহু ফালি মঙলবাৰে সন্ধিয়া কাৰাগাৰৰ পৰা পলায়ন কৰিবলৈ সক্ষম হয় চুৰি গোচৰত অভিযুক্ত দুলাল আলী ।
মঙলবাৰে নগাঁও কেন্দ্ৰীয় কাৰাগাৰৰ পৰা অভিযুক্ত দুলাল আলীয়ে পলায়ন কৰা বুলি অৱগত হোৱাৰ পাছতেই হাহাকাৰ লাগে নগাঁও কেন্দ্ৰীয় কাৰাগাৰ কৰ্তৃপক্ষৰ মাজত । অভিযুক্ত দুলাল আলীয়ে পলায়ন কৰাৰ পাছতেই পলায়ন কৰা অভিযুক্তৰ সন্ধানত অভিযান আৰম্ভ কৰে নগাঁও কেন্দ্ৰীয় কাৰাগাৰ কৰ্তৃপক্ষই ।
ইপিনে, মঙলবাৰে নগাঁও কেন্দ্ৰীয় কাৰাগাৰৰ পৰা অভিযুক্ত দুলাল আলীয়ে পলায়ন কৰা সন্দৰ্ভত নগাঁও আৰক্ষীক কাৰাগাৰ কৰ্তৃপক্ষই এখনি এজাহাৰ দাখিল কৰা বুলিও নগাঁও আৰক্ষীৰ সূত্ৰে জানিব পৰা গৈছে । কাৰাগাৰ কৰ্তৃপক্ষই দাখিল কৰা এজাহাৰৰ ভিত্তিত নগাঁও সদৰ আৰক্ষী থানাত ভাৰতীয় ন্যায় সংহিতাৰ অধীনত ১১৬/২৫ নম্বৰত আন এক গোচৰ ৰুজু কৰি পলাতক অভিযুক্ত দুলাল আলীৰ সন্ধানত অভিযান আৰম্ভ কৰা বুলিও জানিবলৈ দিয়ে নগাঁও সদৰ আৰক্ষী থানাৰ ভাৰপ্ৰাপ্ত বিষয়া দেৱজিৎ দাসে ।
স্মৰ্তব্য যে, নগাঁও কেন্দ্ৰীয় কাৰাগাৰত পৰ্যাপ্ত নিৰাপত্তাৰক্ষী থকাৰ পাছতো এটা অভিযুক্তই পলায়ন কৰিবলৈ সক্ষম হোৱা ঘটনাৰ পাছতেই কাৰাগাৰৰ নিৰাপত্তাক লৈ প্ৰশ্ন উত্থাপন কৰিছে বিভিন্নজনে ।
লগতে পঢ়ক: আৰক্ষীৰ জিম্মাৰ পৰা পলায়ন কৰোতেই গুলীবিদ্ধ দুধৰ্ষ ডকাইত
