বৰপেটাৰ অতি জনপ্ৰিয় ৰাঙা ডিমা, আলু ভাজা আচলতে কি ?

বৰপেটা : আপুনি বাৰু কেতিয়াবা 'ৰাঙা ডিমা, আলু ভাজা' এই দুই ব্যঞ্জনৰ কথা শুনিছে নে ? আপোনাৰ ঘৰ যদি বৰপেটাত বা বৰপেটাৰ সৈতে আপোনাৰ সম্পৰ্ক আছে তেনেহ'লে ইয়াৰ কথা আপোনাক কোৱাৰ প্ৰয়োজন নাই । দৌল মহোৎসৱৰ সময়ত আপুনি যদি বৰপেটা সত্ৰলৈ গৈছে তেতিয়াও 'ৰাঙা ডিমা, আলু ভাজা'ৰ সৈতে চিনাকি হৈছে । কিন্তু বহুতৰ বাবে এই নাম দুটা কিছু ব্যতিক্ৰম ।

ৰাঙা ডিমা,আলু ভাজা কি ?

'ৰাঙা ডিমা,আলু ভাজা' হৈছে বৰপেটাৰ বিখ্যাত । 'ৰাঙা ডিমা' মানে হৈছে ৰঙা কণী আৰু 'আলু ভাজা' মানে আলু ভজা । বৰপেটীয়া ভাষাত ইয়াক 'ৰাঙা ডিমা, আলু ভাজা' বুলি কোৱা হয় । বৰপেটাৰ দৌল মহোৎসৱলৈ আহিলে আপুনি ইয়াৰ সোৱাদ ল'বলৈ নাপাহৰিব । কিয়নো ইয়াৰ সোৱাদ সুকীয়া । বৰপেটাৰ দৌল চাবলৈ আহিলে যিকোনো মানুহৰ মন যায় ৰাঙা ডিমা আৰু আলু ভাজা খাবলৈ । গতিকে বৰপেটাৰ দৌল উৎসৱৰ লগত এই দুবিধ খাদ্য সামগ্ৰীৰ এক নিবিড় সম্পৰ্ক আছে । অথচ কোনে কেতিয়াৰ পৰা ইয়াৰ আৰম্ভণি কৰিছিল তাৰ কোনো তথ্য নাই । কিন্তু বহুজনে কোৱা মতে এয়া কোনোবা ব্যৱসায়ীৰ উদ্ভাৱনী চিন্তাৰ ফচল ।

এইখিনিতে হয়তো আপোনাৰ মনলৈ এটা প্ৰশ্ন আহিছে কণীৰ ৰঙ কিয় ইমান ৰঙা হয় যাৰ বাবে ইয়াক বৰপেটীয়া ভাষাত ৰাঙা ডিমা বুলি কোৱা হয় ? আচলতে কণীত কোনো ধৰণৰ ৰাসায়নিক দ্ৰব্য বা ৰং ব্যৱহাৰ কৰা নহয় । ৰাঙা ডিমা প্ৰস্তুত কৰিবলৈ কণীটো প্ৰথমতে সিজাই হালধি আৰু চূণৰ পানীত তিয়াই থোৱা হয় । তাৰ পাছত কণীটো ভাজিলে টিকটিকিয়া ৰঙা হৈ পৰে । যাৰ বাব ই স্বাস্থ্যৰ প্ৰতি হানিকাৰক নহয় ৷ একেদৰে আলু ভাজাও একেবাৰে সাধাৰণভাৱে প্ৰস্তুত কৰা হয় । অথচ সোৱাদ হয় অপূৰ্ব । ৰাঙা ডিমা আৰু আলু ভাজাৰ সোৱাদ নল'লে যেন আধৰুৱা হৈ ৰয় দৌলোৎসৱ চোৱাৰ মজা ।

বৰপেটাৰ সুস্বাদু আলু ভাজা (ETV Bharat)

আলু ভাজা বৰপেটাৰ বাবে এক পৰিচিত নাম

আলু ভাজি বৰপেটাবাসীৰ প্ৰিয় খাদ্যও ৷ অকল দৌলতে নহয় মাঘ বিহুৰ উৰুকাৰ নিশাও বৰপেটাবাসীয়ে আলু ভাজি খায় ৷ যাক বৰপেটীয়া ভাষাত গাতাৰ আলু বুলি কোৱা হয় ৷ ৰাঙা ডিমা আৰু আলু ভাজা সম্পৰ্কে ব্যৱসায়ী খনীন্দ্ৰ দাসে কয়,"বৰপেটা সত্ৰৰ দৌল মহোৎসৱত সকলোৱে ৰাঙা ডিমা আৰু আলু ভাজাৰ জুতি লয় ৷ ৰাঙা ডিমা বৰপেটাত ফেমাচ ৷" দাসে প্ৰতিবছৰে দৌল মহোৎসৱত ৰাঙা ডিমা আৰু আলু ভাজাৰ দোকান দিয়ে । এদিনত ১০ পৰা ১৫ কাৰ্টুন কণী বিক্ৰী হয় বুলি তেওঁ উল্লেখ কৰে ৷

বৰপেটাৰ অতি জনপ্ৰিয় ৰাঙা ডিমা (ETV Bharat)

তেওঁ লগতে কয়,"ব্যৱসায় ভালে হয় ৷ সৰু কালৰে পৰা দৌল মহোৎসৱত ৰাঙা ডিমা আৰু আলু ভাজাৰ দোকান দেখি আহিছো ৷ সৰু কালত আমি নিজেও খাইছিলো আৰু বহু মানুহে ৰাঙা ডিমা আৰু আলু ভাজা খায় ভাল পায় ৷ দৌল মহোৎসৱৰ সময়ত প্ৰতিখন দোকানতে ৰাঙা ডিমা আৰু আলু ভাজা পোৱা যায় ৷" বৰপেটাত আলু ভাজা মেইন বুলিও উল্লেখ কৰে খনীন্দ্ৰ দাসে ৷ লগতে তেওঁ কয়,"অকল বৰপেটাৰ মানুহেয়ে বনাব পাৰে ৰাঙা ডিমা আৰু সোৱাদযুক্ত আলু ভাজি ৷"

আন এগৰাকী ব্যৱসায়ী প্ৰাঞ্জল দাসে কয়,"বৰপেটাৰ মানুহে আলু ভাজি খায় ভাল পায় । অকল দৌল মহোৎসৱতে নহয় মাঘ বিহুৰ উৰুকাৰ নিশাও বৰপেটাবাসীয়ে আলু ভাজি খায় ৷ যাক বৰপেটীয়া ভাষাত গাতাৰ আলু বুলি কয় ৷ বৰপেটাৰ দৌলত আহি যদি বৰপেটাৰ ৰাঙা ডিমা আৰু আলু ভাজা নাখায় তেনেহ'লে দৌল চোৱাহেনে নাপায় ৷ বৰপেটা দৌলৰ বিশেষ আকৰ্ষণ ৰাঙা ডিমা আৰু আলু ভাজা ৷"

বৰপেটাৰ জনপ্ৰিয় আলু ভাজা (ETV Bharat)

আনহাতে বৰপেটাৰ দৌল মহোৎসৱত হাউলীৰ পৰা অহা এগৰাকী দৰ্শনাৰ্থীয়ে কয়, "বৰপেটাৰ দৌলৰ মেইন হ'ল ৰাঙা ডিমা আৰু আলু ভাজা ৷ দৌলত আহিলে ৰাঙা ডিমা আৰু আলু ভাজা খাবই লাগিব ৷ এই খাদ্য সুস্বাদু হয় ৷ ৰাঙা ডিমা আলু ভাজা নোহোৱাকৈ বৰপেটাৰ দৌল নহয় ৷" হাউলীৰ পৰা অহা এগৰাকী মহিলা দৰ্শনাৰ্থীয়ে কয়,"বৰপেটাৰ ৰাঙা ডিমা আলু ভাজা খায় ভাল লাগে ৷ বৰপেটাৰ এইটো ফেমাচ ৷ হাউলীৰ ৰাস মহোৎসৱত ৰাঙা ডিমা আলু ভাজা ফেমাচ হয় । বৰপেটীয়া দোকানীয়ে ৰাঙা ডিমা আলু ভাজাৰ দোকান দিয়ে ৷"

লগতে পঢ়ক :হোলীগীতৰ লহৰ-সত্ৰীয়া পৰম্পৰাৰে উখল-মাখল বৰপেটা সত্ৰ - BARPETA HOLI FESTIVAL