অপাৰেশ্যন সেন্দূৰক সেন্দূৰ চাহৰে সন্মান
ভাৰতীয় সেনালৈ সন্মান জনাই অসমৰ চাহ উদ্যোগীয়ে মুকলি কৰিলে বিশেষ চাহপাত । নাম দিলে সেন্দূৰ ।
Published : May 11, 2025 at 6:03 PM IST
গুৱাহাটী: পহলগামত সন্ত্ৰাসবাদীয়ে নিৰীহ পৰ্যটকক হত্যা কৰাৰ প্ৰতিশোধস্বৰূপে ভাৰতে পাকিস্তানত চলোৱা অপাৰেশ্যন সেন্দূৰক লৈ দেশবাসীয়ে ভাৰতীয় সেনাক লৈ গৌৰৱ কৰিছে । ইয়াৰ বাবে বিভিন্নজনে বিভিন্ন ধৰণে ভাৰতীয় সেনাক অভিবাদন জনাইছে ।
অসমৰ এজন উদ্যোমীয়ে ভাৰতীয় সেনাক অসম গৌৰৱ চাহেৰে অভিবাদন জনাইছে । চাহক সেন্দূৰ নামেৰে নামাকৰণ কৰি কৰি ভাৰতীয় সেনাক অভিবাদন জনাইছে গুৱাহাটী মহানগৰীৰ উদ্যমী তথা চাহ ব্যৱসায়ী এৰ’মিকা টীৰ সঞ্চালক ৰঞ্জিত বৰুৱাই । এই চাহ তেওঁ ভাৰতীয় সেনাৰ লগতে বিভিন্নজনক উপহাৰ হিচাপে প্ৰদান কৰিব ।
কিয় সেন্দূৰ দ্যা প্ৰাইড নামেৰে নামাকৰণ কৰা হ'ল চাহৰ পেকেট:
চাহ ব্যৱসায়ী ৰঞ্জিত বৰুৱাই এই বিষয় সন্দৰ্ভত কয়, "সেন্দূৰ ভাৰতীয় সমাজৰ এক গৌৰৱ । ২২ এপ্ৰিলত পহলগামত সংঘটিত সন্ত্ৰাসবাদী আক্ৰমণৰ প্ৰতিশোধস্বৰূপে ৭ মে'ত ভাৰতে পাকিস্তানত অপাৰেশ্যন সেন্দূৰ অভিযান চলালে তাক লৈ আমি গৌৰৱ অনুভৱ কৰিছো । সেয়েহে মই চাহ উদ্যমী হিচাপে ভাৰতীয় সেনাক সন্মান তথা অভিবাদন জনাই সেন্দূৰ নামেৰে এবিধ চাহৰ পেকেট মুকলি কৰিছো । এই চাহবিধক ভাৰতীয় সেনাক চেল্যুট, ধন্যবাদ জনাই ভাৰতীয় সেনাৰ বাবে উৎসৰ্গিত কৰিছো । কেইটামান এই চাহৰ পেকেট বনাইছো আৰু এই চাহ ভাৰতীয় সেনাক উপহাৰ হিচাপে আগবঢ়াম ।"
তেওঁ লগতে কয়, "যি কোনো আনন্দৰ মুহূৰ্তত আমি চাহ একাপৰ সৈতে উদযাপন কৰো । সেয়েহে অসমৰ উৎকৃষ্টমানৰ চাহ হালমাৰী গোল্ডেন অৰ্থডক্স চাহ আৰু চি টি চি মিহলাই এই বিশেষ চাহ পেকেট প্ৰস্তুত কৰা হৈছে । এই চাহ বিধৰ ৰংটো সেন্দূৰৰ নিচিনা হয় আৰু খাবলৈ সোৱাদযুক্ত হয় । এই চাহবিধ আমি ব্যৱসায়ী ভিত্তিত মুকলি কৰা নাই । ৭ মে'ৰ অপাৰেশ্যন সেন্দূৰ অভিযানক স্মৰণীয় কৰাৰ বাবে এই চাহ পেকেট মুকলি কৰা হৈছে । এই সময়খিনি একাপ ভাল চাহেৰে উদযাপন কৰাৰ বাবে । আশা কৰিছোঁ অহা সপ্তাহত ভাৰতীয় সেনাৰ মাজত বিতৰণ কৰা হ'ব । তেওঁলোকক এই চাহৰ জৰিয়তে ধন্যবাদ জনাম ।"
কেনেকৈ মনলৈ আহিল সেন্দূৰ চাহৰ কথা:
তেওঁ কয়, "৭ মে'ত যেতিয়া পুৱাই অপাৰেশ্যন সেন্দূৰৰ কথা গম পালো আৰু ভাৰতীয় হিচাপে গৌৰৱ অনুভৱ কৰিলো । সেই উৎসাহতে ভাৰতীয় সেনাক ধন্যবাদ জনায় অসমৰ চাহ এবিধ বনাই ভাৰতীয় সেনাৰ নামত উৎসৰ্গিত কৰিছোঁ । ৭ মে'ৰ দিনটো চিন্তা চৰ্চা কৰি আবেলিলৈ প্ৰস্তুত কৰা হয় ।"
