সমৰ্থ প’ৰ্টেলৰ জৰিয়তে নামভৰ্তিৰ ক্ষেত্রত এছ অ’ পি উচ্চ শিক্ষা বিভাগৰ

গুৱাহাটী: অসমৰ বিশ্ববিদ‍্যালয় আৰু মহাবিদ‍্যালয়সমূহত স্নাতক স্তৰত সমৰ্থ প'ৰ্টেলৰ জৰিয়তে নামভৰ্তিৰ বাবে এক মানক কাৰ্য পদ্ধতি তথা এছ অ’ পি জাৰি কৰা হৈছে । এই প্ৰক্ৰিয়া সূচল কৰাৰ বাবে গুৱাহাটী বিশ্ববিদ‍্যালয়ত এটা সহায়ক আৰু সমন্বয় কেন্দ্ৰ স্থাপন কৰা হৈছে ।

এই সন্দৰ্ভত ৰাজ্য চৰকাৰৰ উচ্চ শিক্ষা বিভাগৰ সঞ্চালকে এক বিবৃতি জাৰি কৰিছে । লক্ষণীয় বিষয় যে, অসমীয়াক ৰাজ‍্যভাষা হিচাপে প্ৰয়োগ কৰাৰ কেবিনেট সিদ্ধান্তৰ পাছতে উচ্চ শিক্ষা বিভাগে মঙলবাৰে অসমীয়া ভাষাত প্ৰথমখন বিজ্ঞপ্তি প্ৰকাশ কৰে ।

উচ্চ শিক্ষা বিভাগৰ এছ অ’ পি (ETV Bharat Assam)

বিজ্ঞপ্তিখনত কোৱা হয় যে অসম চৰকাৰৰ উচ্চ শিক্ষা বিভাগৰ সিদ্ধান্ত অনুসৰি স্নাতক স্তৰৰ নামভৰ্তিৰ প'ৰ্টেল ২০২৫ চনৰ ১১ এপ্ৰিলৰ পৰা পঞ্জীয়নৰ বাবে সক্ৰিয় কৰা হৈছে । এই সন্দৰ্ভত গুৱাহাটী বিশ্ববিদ্যালয়ত এক আঞ্চলিক সমৰ্থ সহায়ক আৰু সমন্বয় কেন্দ্র স্থাপন কৰা হৈছে । এই কেন্দ্ৰই অসমৰ উচ্চ শিক্ষা বিভাগৰ অধীনত সেৱা আগবঢ়োৱাৰ লগতে নামভৰ্তিৰ ক্ষেত্ৰত সমৰ্থ প্লেটফৰ্ম ব্যৱহাৰৰ চৰকাৰী নীতিসমূহ কাৰ্যকৰী কৰিব ।

তদুপৰি কেন্দ্ৰটোৱে ২০২৫-২৬ শিক্ষাবৰ্ষৰ FYUGP/FYIMP/FYUPGP নামভর্তি প্রক্রিয়াত অংশগ্ৰহণকাৰী বিশ্ববিদ্যালয়, মহাবিদ্যালয়, সমৰ্থৰ কাৰ্যবাহী আৰু উচ্চ শিক্ষা সঞ্চালকালয়ৰ সৈতে সমন্বয়ক কেন্দ্ৰ হিচাপে যোগাযোগ স্থাপন কৰিব ।

এই সন্দৰ্ভত উচ্চ শিক্ষা বিভাগৰ তৰফৰ পৰা দিয়া হৈছে এছ অ' পি অৰ্থাৎ মানক কার্য পদ্ধতি

1. যিহেতু নামভর্তি এক বিদ্যায়তনিক আৰু বিশ্ববিদ্যালয়/মহাবিদ্যালয়ৰ অধীনৰ বিষয়, সেয়ে শিক্ষা প্রতিষ্ঠানসমূহে ছাত্ৰ-ছাত্ৰীৰ সহায়ৰ বাবে ডিজিটেল নামভৰ্তি প্ৰক্ৰিয়াৰ সূচলতা নিশ্চিত কৰিব ৷ RSSCC, Assam-এ সমর্থ টীম, বিশ্ববিদ্যালয়, মহাবিদ্যালয় আৰু উচ্চ শিক্ষা বিভাগৰ সৈতে সক্রিয়তাৰে সমন্বয় ৰক্ষা কৰি নীতিসমূহ বলৱৎ কৰিব । এই কেন্দ্ৰটোৱে বিশ্ববিদ্যালয়, মহাবিদ্যালয় আৰু নতুন দিল্লীৰ সমৰ্থ টীমৰ সৈতে যোগাযোগৰ বাবে নিৰ্দিষ্ট rsscc.samarth@gauhati.ac.in ই-মেইল ব্যৱহাৰ কৰিব পাৰিব ।
2. অসমৰ সকলো বিষয় বিশ্ববিদ্যালয়, সমর্থ সম্পৰ্কীয় e-Gov মহাবিদ্যালয়সমূহে rsscc.samarth@gauhati.ac.in লৈ প্ৰেৰণ কৰি অৱগত কৰিব পাৰিব আৰু ইয়াৰ প্ৰতিলিপি
   dheofficial.documentation@gmail.com লৈ প্ৰেৰণ কৰিব লাগিব ।
3. নামভর্তি প্রক্রিয়া স্বচ্ছ, সূচল আৰু ত্বৰান্বিতকৰণৰ বাবে চৰকাৰে মূলতঃ নামভৰ্তিৰ ক্ষেত্ৰত সমনীতি প্রণয়ন, নামভর্তি প্ৰক্ৰিয়াৰ পৰ্যবেক্ষণ আৰু প্ৰয়োজন সাপেক্ষে নির্দেশনা প্রদান কৰিব ।
4. RSSCC, Assam-এ সকলো একক আৰু সহযোগী মহাবিদ্যালয় আৰু স্বায়ত্ত শাসিত মহাবিদ্যালয়ৰ সমৰ্থ কোষৰ সৈতে FYUGP/FYIMP/FYUPGP নামভর্তি সন্দৰ্ভত যোগাযোগ কৰিব আৰু এই সন্দৰ্ভত উচ্চ শিক্ষা বিভাগক অৱগত কৰিব ।
5. সংশ্লিষ্ট বিশ্ববিদ্যালয়ৰ সমৰ্থ কোষে নিজৰ অধীনৰ সহযোগী মহাবিদ্যালয়সমূহৰ সৈতে নামভৰ্তিৰ ক্ষেত্ৰত যোগাযোগ কৰিব আৰু প্ৰয়োজন অনুসৰি তথ্যৰ যোগান ধৰিব ।
6. সঞ্চালক, CDC/কলেজ পৰিদৰ্শকে বিদ্যায়তনিক আৰু পৰীক্ষা শাখাৰ সৈতে যোগাযোগ কৰি পাঠ্যক্ৰম, বিভাগ আৰু আসনৰ সংখ্যা নিশ্চিত কৰিব, যাতে নামভৰ্তিৰ পূৰ্বে সঠিক পাঠ্যক্ৰমৰ নাম, কোড আৰু বিভাগ সন্দৰ্ভত সকলো অৱগত হয় ৷
7. অংশগ্ৰহণকাৰী বিশ্ববিদ্যালয়, মহাবিদ্যালয়সমূহে অনুসৰণ কৰিবলগীয়া নামভৰ্তিৰ সম্পূৰ্ণ সময়সূচী উচ্চ শিক্ষা সঞ্চালকালয়ে প্ৰকাশ কৰিব । যিকোনো অভিযোগৰ ক্ষেত্ৰত বিশ্ববিদ্যালয়, মহাবিদ্যালয়, ছাত্র-ছাত্রীয়ে dheofficial.documentation@gmail.com ত যোগাযোগ কৰিব পাৰিব ।

লগতে পঢ়ক: অসমৰ বিলুপ্তপ্ৰায় ভাষা সংৰক্ষণৰ বাবে আছুৰ গুৰুত্বপূৰ্ণ পদক্ষেপ