কোনে খালে আঁচনিৰ টকা ? সুবিচাৰৰ দাবীত ৰাজপথলৈ আহিল শ শ ৰাইজ - Scam in Government schemes
Protest Against Panchayat Scam : দুৰ্নীতিৰ বোকাত লুতুৰি-পুতুৰি হোৱাৰ অভিযোগ তিনিচুকীয়াৰ কাকজান গাঁও পঞ্চায়তৰ বিৰুদ্ধে । চৰকাৰী আঁচনি ৰূপায়ন নকৰাকৈয়ে একাংশই আত্মসাৎ কৰিলে টকা ! এই অভিযোগ স্থানীয় ৰাইজৰ ৷ কিন্তু কোনে-কেনেকৈ কাকজান গাঁও পঞ্চায়তত সংঘটিত কৰিলে দুৰ্নীতি তথা অনিয়ম ?
Published : September 12, 2024 at 10:51 AM IST
তিনিচুকীয়া, ১২ ছেপ্টেম্বৰ : আকৌ দুৰ্নীতিৰ প্ৰসংগ ৷ এইবাৰৰ স্থান তিনিচুকীয়া ৷ অভিযোগ অনুসৰি, দুৰ্নীতিত পোত গৈছে তিনিচুকীয়া জিলাৰ কাকজান গাঁও পঞ্চায়তটো ৷ যাৰ বাবে বুধবাৰে স্থানীয় শ শ লোক কাকজান গাঁও পঞ্চায়তলৈ ওলাই আহি এক হুলস্থূলীয়া পৰিৱেশৰ সৃষ্টি কৰে ৷
ঘটনা অনুসৰি, তিনিচুকীয়া জিলাৰ কাকজান গাঁও পঞ্চায়তত ব্যাপক অনিয়ম হোৱাৰ অভিযোগ উত্থাপন কৰি কাকজান যুৱক সংঘই জিলা আয়ুক্তক এক স্মাৰক পত্ৰ প্ৰদান কৰিছিল । তাৰ পাচতে বুধবাৰে তিনিচুকীয়া জিলা পৰিষদৰ অতিৰিক্ত কাৰ্যবাহী সদস্য অসীম শৰ্মাই কাকপথাৰ আঞ্চলিক পঞ্চায়তে নিৰ্মাণ কৰা দুটাকৈ আঁচনি পৰিদৰ্শন কৰে ৷ আঁচনি পৰিদৰ্শন কৰি অতিৰিক্ত কাৰ্যবাহী সদস্য অসীম শৰ্মাই পঞ্চায়তত অনিয়ম হোৱাৰ কথা ৰাজহুৱাকৈ স্বীকাৰ কৰে ।
৬ লাখ টকাৰে নিৰ্মাণ কৰা উক্ত পথছোৱাত মাত্ৰ ৪ গাড়ী শিল (চেন গেভেল) পেলাই ধন উলিয়াই নিয়াৰ এক গুৰুতৰ অভিযোগ উত্থাপন কৰে ঠিকাদাৰৰ বিৰুদ্ধে । সমান্তৰালভাৱে কাকপথাৰ আঞ্চলিক পঞ্চায়তৰ পৰা প্ৰায় ৫ লাখ টকাৰে নিৰ্মাণ হ’বলগীয়া বজাৰ গৃহ কাকপথাৰ আঞ্চলিক পঞ্চায়তৰ সভানেত্ৰী ৰূপাঞ্জলী মৰাণে চৰকাৰী মাটিত নিৰ্মাণ নকৰি পদবীৰ শক্তি ব্যৱহাৰ কৰি নিজা মাটিত নিৰ্মাণ কৰাৰ অভিযোগ উত্থাপন কৰে স্থানীয় ৰাইজে ৷
লগতে পঢ়ক : উৎকোচ লৈ গ্ৰেপ্তাৰ হ'ল যোৰহাটৰ ঔষধ পৰিদৰ্শক - Drugs inspector arrested
এইক্ষেত্ৰত চৰকাৰী মাটি নোপোৱাৰ বাবেই নিজা মাটিত নিৰ্মাণ কৰা বুলি ৰূপাঞ্জলী মৰাণে সংবাদ মাধ্যমৰ আগত উল্লেখ কৰে ৷ ইফালে কাকজান গাঁও পঞ্চায়তৰ সভাপতি ঋতু তাঁতীয়ে এই সমগ্ৰ ঘটনাত তৃতীয় পক্ষ জড়িত হৈ সমগ্ৰ বিষয়টো ৰাজনীতিৰ মেৰপাকলৈ সুমুৱাই নিয়া বুলি অভিযোগ উত্থাপন কৰে ।
লগতে পঢ়ক : ডুমডুমাত লাট মণ্ডলক গ্ৰেপ্তাৰ : ৰাজহ চক্ৰ বিষয়াই ধন বিচৰাৰ অভিযোগ - Assam Anti Corruption Mission
আনহাতে, কেৱল কাকপথাৰ আঞ্চলিক পঞ্চায়ততেই নহয় কাকজান গাঁও পঞ্চায়ততো ব্যাপক দুৰ্নীতি হোৱা অভিযোগ উত্থাপন কৰে স্থানীয় যুৱক সংঘই । যুৱক সংঘৰ নেতৃত্বই সদৰী কৰা অনুসৰি দেওবৰীয়া বজাৰস্থলীত এটা শৌচালয় নিৰ্মাণ নকৰাকৈ টকা আত্মসাত কৰা, এটা সাংস্কৃতিক কেন্দ্ৰ নিৰ্মাণৰ নামত নিৰ্মাণ নকৰাকৈ টকা উলিয়াই নিয়াৰ দৰে ঘটনা সংঘটিত হৈছে ।
গতিকে যিসমূহ নিৰ্মাণ নকৰাকৈ টকা আত্মসাত কৰিছে সেইসমূহ যাতে সোনকালে নিৰ্মাণৰ ব্যাৱস্থা কৰে, তাৰ বাবে বিভাগীয় কৰ্তৃপক্ষক আহ্বান জনায় । সমান্তৰালভাৱে এইক্ষেত্ৰত জড়িত থকা সকলো লোককে উচিত তদন্ত কৰিবলৈ আহ্বান জনায় ।
লগতে পঢ়ক : উপঢৌকন লৈ দুৰ্নীতি নিবাৰক শাখাৰ জালত কাৰ্যবাহী অভিযন্তা
