হিমন্ত বিশ্ব শৰ্মাই ৰূপজ্যোতি কুৰ্মীৰ বুকুতে গোৰ মাৰি দিলে: অখিল গগৈ

যোৰহাট: বিধানসভাত মৰিয়নীৰ বিধায়ক ৰূপজ্যোতি কুৰ্মীৰ আচৰণক লৈ ৰাজনৈতিক মহলত ব্যাপক প্ৰতিক্ৰিয়া হৈ আছে । বিধানসভাৰ মজিয়াত সতীৰ্থক আক্ৰমণ কৰিবলৈ যোৱা কাৰ্যক সহজভাৱে ল'ব পৰা নাই সচেতন মহলে । তাৰ মাজতে ৰূপজ্যোতি কুৰ্মীক তীব্ৰ সমালোচনা কৰিলে শিৱসাগৰৰ বিধায়ক অখিল গগৈয়ে । অখিল গগৈৰ মতে এইবাৰ মৰিয়নীত জয়ী হ'ব নোৱাৰে ৰূপজ্যোতি কুৰ্মী । সমষ্টিবাসীয়ে ইতিমধ্যে তেওঁৰ সংগ এৰিছে বুলি দাবী কৰে অখিল গগৈয়ে । তেওঁ কয়, "ৰূপজ্যোতি কুৰ্মীয়ে ক্ষমা খোজাৰ কিবা অৰ্থ আছে নেকি ? এইমাত্ৰ ক্ষমা খুজিলে আৰু তাৰ পাছতে আকৌ ১০ টা বেয়া কথা ক'লে । গতিকে ৰূপজ্যোতি কুৰ্মীয়ে ক্ষমা খোজাৰ কোনো অৰ্থই নাই ।"

ৰূপজ্যোতি কুৰ্মীক প্ৰত্যাহ্বান অখিল গগৈৰ

মৰিয়নীৰ বিধায়কজনক প্ৰত্যাহ্বান জনাই অখিল গগৈয়ে কয়, "মই আৰু ৰূপজ্যোতিক পৰামৰ্শ দিবলৈ নাই । ই একদম মূৰত উঠিলে । ২০২৬ত আমি ৰূপজ্যোতিক হৰুৱাব লাগিব । উৎপাত বেছি হৈছে, ৪-৫ বাৰ জিকি লৈ উৎপাত হৈ গৈছে । মোক গোটেই মৰিয়নীৰ মানুহে ফোন কৰি আছে যে অখিলক যেনে তেনে হৰুৱাব লাগে, নহ'লে ই আমাৰ মৰিয়নীৰ মান সন্মান খাই দিছে ।" ধোদৰ আলিৰ দুৰৱস্থা সন্দৰ্ভতো তেওঁ মুখ্যমন্ত্ৰীক বিশেষ আহ্বান জনাই কয়, "মুখ্যমন্ত্ৰী ডাঙৰীয়া, মই মৰিয়নী সমষ্টিৰ বাসিন্দা । আমাৰ সমষ্টিৰ ১৩ কিঃমিঃ এৰিয়া মটৰ চাইকেল এখন চলাব নোৱাৰা পৰিস্থিতি হৈ আছে...এই পৰিস্থিতি চাবলৈ আপুনি এবাৰ আহক, আপুনি এনেই য'তে ত'তে বহি লৈ ফটা লেকচাৰ মাৰি নাথাকিব । অতি সোনকালে বাৰিষাৰ আগতে এই ধোদৰ আলিৰ মেৰামতিৰ ব্যৱস্থা কৰক ।"

অখিল গগৈৰ মাতৃৰ স্বাস্থ্যৰ বুজ ল'লে দেৱব্ৰত শইকীয়াই (ETV Bharat)

মৰিয়নীৰ পৰা কিয় জয়ী হ'ব নোৱাৰে ৰূপজ্যোতি কুৰ্মী ?

তেওঁ লগতে আগন্তুক বিধানসভাত মৰিয়নী সমষ্টিৰ নিৰ্বাচন সন্দৰ্ভত কয়, "মই মৰিয়নীৰ পৰা নেখেলো ৷ কিন্তু উমৈহতীয়াকৈ এনেকুৱা এজন প্ৰাৰ্থী দিম, যিজনে এইবাৰ অনায়াসে ৰূপজ্যোতি কুৰ্মীক হৰুৱাব । ৰূপজ্যোতি কুৰ্মীয়ে জনসংখ্যাৰ গাঁথনিৰ কাৰণেহে জিকি আছিল । কিন্তু হিমন্ত বিশ্ব শৰ্মাই ৰূপজ্যোতি কুৰ্মীৰ বুকুতে গোৰ মাৰি দিলে । সমষ্টি পুনৰ নিৰ্ধাৰণত মৰিয়নী সমষ্টিটো এনেকুৱা জনগাঁথনিৰে গঠন কৰি দিলে যে ৰূপজ্যোতি কুৰ্মী এই নিৰ্বাচনত জিকাটো অসম্ভৱ । হৰুৱাবৰ বাবে হিমন্ত বিশ্বই ব্যৱস্থা কৰিলে । সেই কাৰণে ৰূপজ্যোতি কুৰ্মীৰ ২৪ ঘণ্টাই মূৰটো গৰম হৈ থাকে । ৰূপজ্যোতি কুৰ্মীয়ে পাগলামি কৰিবলৈ কোনোপধ্যেই বিধানসভা নাপাব ।" মাতৃৰ স্বাস্থ্যৰ বুজ ল'বলৈ যোৰহাটত উপস্থিত হৈ এই মন্তব্য কৰে অখিল গগৈয়ে ।

হাস্পতালত মাতৃৰ স্বাস্থ্যৰ বুজ ল'লে অখিল গগৈয়ে (ETV Bharat)

উল্লেখ্য যে শিৱসাগৰ সমষ্টিৰ বিধায়ক অখিল গগৈৰ মাতৃ প্ৰিয়দা গগৈক দেওবাৰে নিশা স্বাস্থ্যজনিত সমস্যাৰ বাবে যোৰহাট চিকিৎসা মহাবিদ্যালয় হাস্পতালত ভৰ্তি কৰোৱা হয় । তাৰ পিছতে তেওঁ হাস্পতালত উপস্থিত হৈ কয়, "মাৰ স্বাস্থ্য বৰ্তমান সুস্থিৰ আৰু কিছুদিন ইয়াতে থাকিব লাগিব । মোৰ মা বহুত সাহসী আৰু পৃথিৱীৰ শ্ৰেষ্ঠ অভিভাৱক, বন্ধু ।" ইফালে মাতৃৰ অসুস্থতাৰ বাবে বিধানসভাত উপস্থিত থাকিব নোৱাৰিব বুলিও অখিল গগৈয়ে উদ্বেগ প্ৰকাশ কৰে । অখিল গগৈয়ে জনোৱা মতে কেইবাটাও বিষয়ত বিধানসভা স্থগিতৰ প্ৰস্তাৱৰ বাবে তেওঁ সাজু হৈছিল ।

লগতে পঢ়ক :ৰূপজ্যোতিকাণ্ডৰ বিৰোধিতাৰে জেওৰা-জপনা লৈ সদনলৈ আহিল বিৰোধী - OPPOSITION PROTEST AGAINST BJP MLA