চি আই ডি কাৰ্যালয়ত হাজিৰ ৰূপকমল কলিতা, এতিয়াও খবৰ নাই বাকী ছিংগাপুৰীয়া অসমীয়াৰ
অৱশেষত চি আই ডিৰ কাৰ্যালয়ত ভাষ্য প্ৰদানৰ বাবে ছিংগাপুৰৰ পৰা আহিল এজন ।
By ETV Bharat Entertainment Team
Published : October 7, 2025 at 1:04 PM IST
গুৱাহাটী: ১৯ দিনৰ পিছত চি আই ডিত হাজিৰ হ'ল প্ৰবাসী অসমীয়া ৰূপকমল কলিতা । হার্টথ্রৱ জুবিন গাৰ্গৰ ৰহস্যজনক মৃত্যুৰ ঘটনাত নাম সাঙোৰ খাই পৰা ছিংগাপুৰৰ প্রবাসী অসমীয়া ৰূপকমল কলিতা মঙলবাৰে হাজিৰ হয় চি আই ডি কাৰ্যালয়ত । দুপৰীয়া ১২:১০ বজাত চি আই ডিৰ কাৰ্যালয়ত আহি উপস্থিত হয় ৰূপকমল কলিতা । চি আই ডিৰ কাৰ্যালয়ত উপস্থিত হ'বলৈ মুখ্যমন্ত্রীয়ে দিয়া ১০ দিনৰ সময়সীমা সোমবাৰে উকলি গৈছিল যদিও জুবিন গাৰ্গৰ মৃত্যুৰ লগত নাম সাঙোৰ খোৱা প্ৰথমজন প্ৰবাসী অসমীয়া আজি আহি এছ আই টিত হাজিৰ হয় ।
বৰ্তমান চি আই ডিৰ কাৰ্যালয়ত জেৰা অব্যাহত ৰখা হৈছে ৰূপকমল কলিতাক । জুবিন গাৰ্গৰ ৰহস্যজনক মৃত্যুৰ সময়ত চাক্ষুস প্ৰমাণ আছিল তেওঁ । গতিকে তেওঁৰ ভাষ্য অতি গুৰুত্বপূৰ্ণ হ'ব । জুবিন গাৰ্গৰ ৰহস্যজনক মৃত্যুৰ সময়ত য়ট পাৰ্টিত ছিংগাপুৰত থকা ১১ জনকৈ প্ৰবাসী অসমীয়া আছিল । তাৰ ভিতৰত য়টত আছিল গুৱাহাটী কাহিলীপাৰা নিবাসী প্রবাসী অসমীয়া ৰূপকমল কলিতাও ।
সাগৰত জুবিন গার্গে ভাগৰুৱা তথা ক্লান্ত হৈ মৃত্যুৰ যন্ত্ৰণাত চটফটাই থকা সময়ত হাতত বীয়েৰৰ বটল লৈ য়টত বহি জুবিনৰ মৃত্যু চাই আছিল ছিংগাপুৰৰ প্রবাসী অসমীয়া কেইজনে । জুবিন গাৰ্গৰ শেষ সময়ৰ সংগী য়াটত থকা ৰূপকমল কলিতাৰ বাহিৰে বাকী কোনো এজন প্ৰবাসী অসমীয়াই বৰ্তমানলৈ এছ আই টিৰ তদন্তত সহযোগ কৰিবলৈ ইচ্ছা প্রকাশ কৰা নাই । ছিংগাপুৰ পুলিচৰ বাধা, চাকৰি হেৰুওৱাৰ ভয় আদিৰ দোহাই দি জুবিন গাৰ্গৰ মৃত্যুৰ তদন্তত সহযোগ নকৰাৰহে ইংগিত দিছে তেওঁলোকে ।
সোমবাৰে মুখ্যমন্ত্ৰী ড৹ হিমন্ত বিশ্ব শৰ্মাই সংবাদমেলত ৰূপকমল কলিতা আজি এছ আই টিত হাজিৰ হ'ব বুলি মন্তব্য কৰিছিল । তেওঁ কৈছিল,"ছিংগাপুৰৰ পৰা এজন অসমীয়া এছ আই টিৰ ওচৰলৈ আহিব । চি আই ডিক ফোন কৰি ৰূপকমল কলিতাই অহাৰ সিদ্ধান্তৰ কথা জনাইছে । বাকীসকলে এতিয়ালৈকে আহিম বুলি কোৱা নাই । আমি হেঁচা অব্যাহত ৰাখিছোঁ । মই ভাবো আজি নহ'লে কাইলৈ হ'লেও আহিব লাগিব । যিমান সোনকালে আহে, সিমান সোনকালেই তদন্ত শেষ কৰিব পাৰিম ।"
