গুৱাহাটী: পুনৰ মুকলি কৰা হ'ল দৰ্পণ প’ৰ্টেল । আজিৰে পৰা ২০ মে' পৰ্যন্ত মুকলি কৰি দিয়া হৈছে দৰ্পণ প’ৰ্টেল । এয়া উচ্চতৰ মাধ্যমিকৰ প্ৰথম বর্ষত নামভর্তি কৰিবলগীয়া প্ৰাৰ্থীসকলৰ বাবে এক গুৰুত্বপূৰ্ণ খবৰ ।
কেন্দ্ৰীয় মাধ্যমিক শিক্ষা পৰিষদে মঙলবাৰে দশম শ্ৰেণীৰ ফলাফল ঘোষণা কৰাৰ পৰিপ্ৰেক্ষিতত অসম ৰাজ্যিক বিদ্যালয় শিক্ষা পৰিষদে উচ্চতৰ মাধ্যমিক প্ৰথম বৰ্ষৰ নামভৰ্তিৰ বাবে অনলাইন নামভৰ্তি প’ৰ্টেল 'দৰ্পণ' মুকলি কৰি দিছে ।
ছাত্ৰ-ছাত্ৰীসকলে আজিৰে পৰা ২০ মে’ পৰ্যন্ত উচ্চতৰ মাধ্যমিকৰ প্ৰথম বৰ্ষত নামভৰ্তিৰ বাবে প’ৰ্টেলটোৰ জৰিয়তে আবেদন কৰিব পাৰিব ।
এই সন্দৰ্ভত পৰিষদৰ সচিবে জাৰি কৰা নিৰ্দেশনা অনুসৰি ছাত্ৰ-ছাত্ৰীসকলে নিৰ্ধাৰিত সময়সীমাৰ ভিতৰত নামভৰ্তিৰ বাবে আবেদন কৰিব লাগিব । একেদৰে সংশ্লিষ্ট সকলো শিক্ষানুষ্ঠানে ২৩ মে’ৰ ভিতৰত নামভৰ্তি প্ৰক্ৰিয়া সম্পূৰ্ণ কৰিব লাগিব ।
নামভৰ্তি সম্পৰ্কীয় তথ্যৰ বাবে ছাত্ৰ-ছাত্ৰীসকলক বিভাগীয় ৱেবছাইট www.ahsec.assam.gov.in বা darpan.ahseconline.in পৰীক্ষা কৰিবলৈ পৰিষদে আহ্বান জনাইছে ।
নিৰ্দেশনাত পৰিষদে স্পষ্ট কৰি দিয়ে যে কোনো পৰিস্থিতিতে নামভৰ্তি প্ৰক্ৰিয়াত অফলাইন আবেদন গ্ৰাহ্য কৰা নহ'ব ।
হাইস্কুল শিক্ষান্ত পৰীক্ষাৰ ফলাফল ঘোষণাৰ পিছতেই উচ্চতৰ মাধ্যমিকৰ প্ৰথম বর্ষত নামভৰ্তিৰ বাবে ১৭ এপ্ৰিলৰ পৰা ২৪ এপ্ৰিললৈ দৰ্পণ প’ৰ্টেল মুকলি কৰি দিয়া হৈছিল ।
উল্লেখ্য যে, চি বি এছ ইৰ দশম শ্ৰেণীৰ পৰীক্ষা ১৫ ফেব্ৰুৱাৰীৰ পৰা ১৮ মাৰ্চলৈ অনুষ্ঠিত হৈছিল ৷ ঘোষিত ফলাফল অনুসৰি মুঠ ৯৩.৬৬% ছাত্ৰই এইবাৰৰ দশম শ্ৰেণীৰ পৰীক্ষাত উত্তীর্ণ হয়, যিটো পূৰ্বৰ বছৰৰ তুলনাত ০.০৬% অধিক । আনহাতে, ছাত্ৰীৰ উত্তীৰ্ণৰ হাৰ হৈছে ৯৫% । এইবাৰৰ পৰীক্ষাত ছাত্ৰীৰ উত্তীৰ্ণৰ হাৰ ছাত্ৰতকৈ ২.৩৭% বেছি ।
