ৰাজ্যত বৰষুণৰ নাই উম-ঘাম; ২৪ ঘন্টাত সর্বোচ্চ তাপমান বৃদ্ধিৰ সতৰ্কবাণী বতৰ বিজ্ঞান কেন্দ্ৰৰ - Weather Forecast Of Assam
Heat wave in Assam : অগ্নিকুণ্ডলৈ পৰিণত হৈছে ৰাজ্য ৷ বৰষুণটো দূৰৰ কথা, সামান্য মৃদু বতাহো নাই ৷ ইতমধ্যে বতৰ বিজ্ঞান কেন্দ্ৰই জাৰি কৰিছে সতৰ্কতা ৷ সম্ভৱতঃ বৃদ্ধি হ’ব পাৰে ৰাজ্যৰ তাপমাত্ৰা ৷ কোন কোন জিলাত কিমান বৃদ্ধি হৈছে তাপমান, এই বাতৰিত উল্লেখ কৰা হ’ল-
Published : September 21, 2024 at 2:06 PM IST
|Updated : September 21, 2024 at 4:23 PM IST
গুৱাহাটী, ২১ ছেপ্টেম্বৰ : আহিনৰ শৰতৰ আগমনৰ সময়তে উৎকট গৰমে দহিছে ৰাজ্যবাসীক । দিনৰ ভাগত সূৰ্যটো অগ্নিকুণ্ডলৈ ৰূপান্তৰিত হৈছে । আহিন মাহত উৎকট গৰমৰ বাবে বিদ্যালয়ৰ পাঠদানৰ সময় পৰ্যন্ত সলনি কৰিবলৈ চৰকাৰৰে বাধ্য হৈছে । মৃদু শীতৰ দূৰৰে কথা, বৰং উৎকট গৰমে জনজীৱন দুৰ্বিষহ কৰি তুলিছে ।
আহিন মাহতো দিনৰ উৎকট গৰমত ঘৰৰ পৰা ওলাব নোৱাৰা অৱস্থা । পাৰাস্তম্ভ জুলাই মাহৰ দৰেই ছেপ্টেম্বৰতো ৩৮ ডিগ্ৰী চেলছিয়াছ পর্যন্ত বৃদ্ধি পাইছে । সৰ্বোচ্চ তাপমান ৩৮ ডিগ্ৰী চেলছিয়াছ যদিও আদ্ৰতাৰ বাবে ৪৫-৪৬ ডিগ্ৰী চেলছিয়াছ যেন অনুভূত হৈছে ।
আঞ্চলিক বতৰ বিজ্ঞান কেন্দ্ৰৰ মতে, অহা দুই-তিনিদিনলৈ অব্যাহত থাকিব গ্ৰীষ্ম প্ৰৱাহৰ এই ধাৰা । ৰাজ্যত ২৪ ঘন্টাত সৰ্বোচ্চ তাপমান বৃদ্ধিৰ সতৰ্কবাণী জাৰি কৰিছে বতৰ বিজ্ঞান কেন্দ্ৰই । ৰাজ্যৰ প্ৰতিখন চহৰতে সৰ্বোচ্চ তাপমান স্বাভাৱিক অৱস্থাতকৈ প্ৰায় ৫-৭ ডিগ্ৰী চেলছিয়াছ অধিক হৈছে ।
বতৰৰ অস্বাভাৱিক পৰিৱৰ্তনৰ বাবে বৰষুণৰ পৰিমাণ হ্ৰাস পাইছে । গুৱাহাটীৰ আঞ্চলিক বতৰ বিজ্ঞান কেন্দ্ৰই জনোৱা মতে, শনিবাৰে গুৱাহাটীত সৰ্বোচ্চ তাপমান আছিল ৩৮ ডিগ্ৰী চেলছিয়াছ, যিটো স্বাভাৱিক তাপমানতকৈ ৫.৬ ডিগ্ৰী চেলছিয়াছ বেছি । কাইলৈও গুৱাহাটীত সৰ্বোচ্চ তাপমান ৩৮ ডিগ্ৰী চেলছিয়াছ থাকিব ।
ডিব্ৰুগড়তো কালি সৰ্বোচ্চ তাপমান স্বাভাৱিকতকৈ ৬.৭ ডিগ্ৰী চেলছিয়াছ অধিক আছিল । চহৰখনত আজি সৰ্বোচ্চ তাপমান আছিল ৩৮ ডিগ্ৰী চেলছিয়াছ । ৰাজ্যৰ আনকেইখনমান চহৰত আজিৰ দিনটোত সৰ্বোচ্চ তাপমান হ'ল-
- তেজপুৰ ৩৬.৭ (৪.৮) ডিগ্ৰী চেলছিয়াছ,
- শিলচৰ ৩৮.২ (৫.১) ডিগ্ৰী চেলছিয়াছ,
- ধুবুৰী ৩৬.৩ (৫.৫) ডিগ্ৰী চেলছিয়াছ,
- যোৰহাট ৩৭ (8.5) ডিগ্ৰী চেলছিয়াছ আৰু
- উত্তৰ লখিমপুৰ ৩৮.২ (৬.২) ডিগ্ৰী চেলছিয়াছ
উল্লেখ্য যে, গুৱাহাটীত চলিত বছৰৰ মে’ মাহত ৪০ ডিগ্ৰী চেলছিয়াছেৰে ছয় দশকৰ ভিতৰত দ্বিতীয়টো সৰ্বাধিক গৰমৰ দিন হিচাপে পৰিগণিত হৈছিল । আনহাতে, মৌচুমী ঋতুৰ সময়ছোৱাত ৩৮.১ ডিগ্ৰী চেলছিয়াছেৰে এতিয়ালৈকে যোৱা ২৭ জুলাইৰ দিনটো আছিল সৰ্বাধিক গৰমৰ দিন ।
ছেপ্টেম্বৰ মাহতো গুৱাহাটীৰ সৰ্বোচ্চ তাপমান ৩৮ ডিগ্ৰী চেলছিয়াছ হোৱাটোৱে বতৰৰ অস্বাভাৱিক পৰিৱৰ্তনৰ অশনি সংকেত কঢ়িয়াই আনিছে । অহা দুইতিনিদিনলৈ গুৱাহাটীকে ধৰি ৰাজ্যৰ আন আন চহৰত দিনৰ সৰ্বোচ্চ তাপমান স্বাভাৱিকতকৈ ৪-৫ ডিগ্ৰী চেলছিয়াছ অধিক থকাৰ সম্ভাৱনা আছে ।
ইপিনে, উৎকট গৰমৰ বাবে গুৱাহাটী মহানগৰ জিলাৰ সকলো চৰকাৰী-বেচৰকাৰী আৰু কেন্দ্ৰীয় চৰকাৰৰ বিদ্যালয়সমূহৰ পাঠদানৰ সময় আজিৰ পৰা পুৱা ৭:৩০ বজালৈ আগুৱাই দি দিনৰ ১২:৩০ বজাৰ ভিতৰত সমাপ্ত কৰিবলৈ দিয়া হৈছে ।
