ধাদুম পথাৰলৈ আহক, চাই যাওকহি এবিধ বিৰল প্ৰজাতিৰ পক্ষী

তিনিচুকীয়া: বিগত কিছুদিন ধৰি তিনিচুকীয়া জিলাৰ ডাঙৰীৰ সমীপৰ ধাদুম পথাৰত ভিৰ কৰিছে প্ৰকৃতিপ্ৰেমীয়ে । এটি বিৰল প্ৰজাতিৰ অস্তিত্বৰ সংকটত পৰা পক্ষীক ওচৰৰ পৰা প্ৰত্য়ক্ষ কৰিবলৈকে প্ৰকৃতিপ্ৰেমীয়ে ভিৰ কৰিছেহি । কাৰণ এইবিধ পক্ষী অসমত মাত্ৰ ৪ বাৰহে প্ৰত্য়ক্ষ কৰা হৈছে । কি এইবিধ পক্ষী ?

আপুনি বাৰু পক্ষীপ্ৰেমী নেকি ? যদিহে পক্ষীপ্ৰেমী তেন্তে দেও কৰ্চন পক্ষীৰ বিষয়ে নিশ্চয় অৱগত । সেই দেও কৰ্চনকেই দেখা পোৱা গৈছে এইবাৰ তিনিচুকীয়া জিলাত । তিনিচুকীয়া জিলাৰ ডাঙৰীৰ সমীপৰ ধাদুম পথাৰত দেও কৰ্চন পক্ষীৰ আগমনে আশাৰ সঞ্চাৰ কৰিছে প্ৰকৃতিপ্ৰেমীৰ মাজত ।

অতি বিৰল তথা বিপন্ন প্ৰজাতিৰ এই দেও কৰ্চন পক্ষীবিধক ৰাইজে প্ৰত্যক্ষ কৰি সামাজিক মাধ্যমত ফটো আপলোড কৰাৰ পাছতে চৌদিশে এই স্থানৰ আকৰ্ষণ বৃদ্ধি পাইছে । সামাজিক মাধ্যমৰ জৰিয়তে দেও কৰ্চনৰ উপস্থিতি বিয়পি পৰাৰ পাছতে জিলাখনৰ লগতে ৰাজ্যৰ বিভিন্ন প্ৰান্তৰ পৰা বহুসংখ্যক প্ৰকৃতিপ্ৰেমী তথা পক্ষী নিৰীক্ষক ধাদুম পথাৰত উপস্থিত হৈ ভিৰ কৰা পৰিলক্ষিত হয় ।

২০২১ চনত ধাদুম পথাৰত আছিল দেও কৰ্চন পক্ষী :

উল্লেখ্য যে আকাৰত প্ৰায় সাধাৰণ কৰ্চন পক্ষীৰ সমানেই যদিও মূৰৰ ৰং ক’লা এই দেও কৰ্চন পক্ষীৰ । অসমত ইয়াৰ পূৰ্বে দেও কৰ্চন পক্ষী প্ৰথমে মানাহ ৰাষ্ট্ৰীয় উদ্যানত দুবাৰ প্ৰতক্ষ কৰা হৈছিল আৰু তৃতীয়বাৰ ২০২১ চনত এই ধাদুম পথাৰত দেখা পোৱা বুলি তথ্য পোৱা গৈছে । চতুৰ্থবাৰৰ বাবে এই ধাদুম পথাৰত পুনৰবাৰ দেও কৰ্চন পক্ষীৰ আগমনৰ খবৰত স্বাভাৱিকতে উৎফুল্লিত হৈ উঠিছে প্ৰকৃতিপ্ৰেমী ৰাইজ ।

প্ৰকৃততে এই পক্ষীবিধ‌‌‌ কোন দেশৰ স্থায়ী বাসিন্দা এই বিষয়ে কোনো সঠিক তথ্য নাই যদিও সাগৰপৃষ্ঠৰ পৰা ২৯৫০-৪৯০০ মিটাৰ উচ্চতাত ভাৰত, চীন আৰু ভূটানৰ বিশেষ কিছু এলেকাত ইয়াক দেখা পোৱা যায় । লগতে তিৰ্ব্বত আৰু ভূটানত বংশ বিস্তাৰ কৰে বুলি জানিব পৰা গৈছে ৷

এই সন্দৰ্ভত এগৰাকী স্থানীয় পক্ষীপ্ৰেমী ডিপুল সোণোৱালে কয়, "ধাদুম পথাৰত বিশেষকৈ দুটা প্ৰজাতিৰ পক্ষী চাবলৈ মানুহ আহিছে, বিশেষকৈ দেও কৰ্চন আৰু কৰ্চন ৷ মিজোৰাম, মেঘালয়ৰ লগতে প্ৰতিদিনে বিভিন্ন প্ৰান্তৰ পৰা পৰ্যটকৰ আগমন ঘটিছে ৷ দেও কৰ্চন অসমত এইবাৰলৈকে মাত্ৰ চাৰিবাৰ দেখা পোৱা গৈছে । প্ৰথম দুবাৰ মানাহ ৰাষ্ট্ৰীয় উদ্যানত আৰু ২০২১ চনৰ এই ধাদুম পথাৰতে দেখা গৈছিল আৰু এইবাৰ পুনৰ দেখা পোৱা গৈছে ধাদুম পথাৰত । অসমৰ কাৰণে এইবিধ পক্ষী অতি বিৰল । অৰুণাচলৰ শান্তিভেলীলৈ প্ৰতিবছৰে আহে বুলি ক’ব পাৰি, দেখা পাই থাকে । অসমত এইপৰ্যন্ত মাত্ৰ চাৰিবাৰহে দেখা গৈছে । সেয়ে পক্ষীপ্ৰেমীসকলে খুব ভাল পাইছে ।"

তেওঁ লগতে কয়, "ফেব্ৰুৱাৰীৰ পৰা মাৰ্চ মাহত পক্ষীবোৰে ঘূৰি যোৱাৰ সময়ত ধাদুম পথাৰত ৰৈ যায় খাদ্য গ্ৰহণ কৰিবলৈ ৷ তেতিয়া প্ৰায় সকলো পক্ষী দেখা পোৱা যায় । এতিয়া ইয়াত প্ৰায় ২০০ জনী কৰ্চন থকাৰ বিপৰীতে মাত্ৰ এজনীহে দেও কৰ্চন পক্ষী আছে ।" ইফালে ধাদুম পথাৰত দেও কৰ্চনৰ উপস্থিতি জানিব পাৰি ভিৰ কৰিছে পক্ষীপ্ৰেমীসকলে । ইয়াৰ মাজতেই একাংশ উপস্থিত লোকৰ হুলস্থূলীয়া পৰিবেশৰ বাবেই আলহী পক্ষীয়ে ভয় খাই কিছু দূৰত অৱস্থান কৰা বুলি জানিব দিছে স্থানীয় ৰাইজে ।

লগতে পঢ়ক: এপাক আপুনিও আহক মাগুৰমাৰী-ঘটাহোলা বিলৰ পাৰলৈ...