গোৱালপাৰা: বুধবাৰে অনুষ্ঠিত হ'ব ৰাভা হাছং স্বায়ত্তশাসিত পৰিষদৰ নিৰ্বাচন । স্বায়ত্ত পৰিষদখনৰ ২০টা পৰিষদীয় সমষ্টিৰ বাবে নিৰ্বাচনৰ ভোটগ্ৰহণ অনুষ্ঠিত হ'ব ৩৬২টা ভোট কেন্দ্ৰত । তাৰ বাবে মঙলবাৰে প্ৰিজাইডিং বিষয়াসহ অন্যান্য় নিৰ্বাচনী বিষয়াসকল নিজা নিজা ভোটকেন্দ্ৰলৈ ৰাওনা হৈছে ।
উল্লেখ্য যে এই নিৰ্বাচনৰ ভোটগ্ৰহণ ই ভি এমৰ পৰিৱৰ্তে বেলট কাকতত অনুষ্ঠিত হব । গোৱালপাৰা জিলাৰ অন্তৰ্গত ৰাভা হাছং স্বায়ত্তশাসিত পৰিষদৰ মুঠ ২০ টা পৰিষদীয় সমষ্টিত অনুষ্ঠিত হ'বলগা ভোটগ্ৰণৰ বাবে সম্পূৰ্ণৰূপে সাজু হৈ উঠিছে গোৱালপাৰা জিলা প্ৰশাসন ।
আনহাতে, বুধবাৰে অনুষ্ঠিত হ'বলগীয়া ৰাভা হাছং পৰিষদীয় নিৰ্বাচনৰ বাবে মঙলবাৰে গোৱালপাৰা জিলা আয়ুক্ত কাৰ্যালয়ৰ চৌহদত থকা বহুমুখী ভৱনৰ পৰা ভোটকেন্দ্ৰলৈ ৰাওনা হৈছে নিৰ্বাচনী বিষয়াসকল । গোৱালপাৰা জিলাৰ মুঠ ২০টা ৰাভা হাছং পৰিষদীয় সমষ্টিৰ ৩৬২ টা ভোটকেন্দ্ৰলৈ নিৰ্বাচনী বিষয়াসকল ৰাওনা হৈছে ।
ইতিমধ্যে গোৱালপাৰা জিলা আয়ুক্ত কাৰ্যালয় চৌহদত থকা বহুমুখী ভৱনৰ পৰা জিলা প্ৰশাসনে ব্যৱস্থা কৰা বাছেৰে ৩৬২ গৰাকী প্ৰিজাইডিং বিষয়া ৰাওনা হৈছে নিজা নিজা ভোটকেন্দ্ৰসমূহলৈ ।
উল্লেখ্য যে গোৱালপাৰা আৰু কামৰূপ জিলাৰ মুঠ ৩৬ টা পৰিষদীয় সমষ্টিত অনুষ্ঠিত হ'ব ৰাভা হাছং স্বায়ত্তশাসিত পৰিষদৰ নিৰ্বাচন । ইয়াৰে ভিতৰত গোৱালপাৰা জিলাত নিৰ্বাচন অনুষ্ঠিত হ'বলগীয়া ২০ টা পৰিষদীয় সমষ্টি হৈছে ধূপধৰা, কোঠাকুঠী, ধনুভঙা, ৰংজুলি, কুশধোৱা-দৰংগিৰি, উত্তৰ দুধনৈ, দক্ষিণ দুধনৈ, বান্দৰ্শী, মাজ জাখেলি, শালপাৰা, হাবৰাঘট, ডিৰ্মা জাখলি, পূব অজগৰ, জিনাৰী, আগিয়া, দ্বাৰকা, বৰদামাল-কল্যাণপুৰ, দাৰিদুৰি, দ'দান আৰু জয়ৰামকুছি ।
বুধবাৰে অনুষ্ঠিত হ'বলগীয়া এই ২০ টা পৰিষদীয় সমষ্টিৰ নিৰ্বাচনত মুঠ ২,৫৪,৬,৪৪ গৰাকী ভোটাৰে নিৰ্ণয় কৰিব ২০ গৰাকী প্ৰাৰ্থীৰ ভাগ্য । ইয়াৰে ভিতৰত পুৰুষ ভোটাৰৰ সংখ্যা হৈছে ১,২৩,২৫৯ গৰাকী । আনহাতে, মহিলা ভোটাৰৰ সংখ্যা হৈছে ১,৩১,৩৭৪ গৰাকী আৰু তৃতীয় লিংগ ভোটাৰৰ সংখ্যা হৈছে ১১ গৰাকী । সৰ্বমুঠ ২,৫৪,৬৪৪ গৰাকী ভোটাৰে ৰাভা হাচং নির্বাচনত গোৱালপাৰা জিলাত ভোটদান কৰিব ।
উল্লেখ্য যে এই ২০ টা পৰিষদীয় সমষ্টিৰ ভাতৰত জয়ৰামকুছি পৰিষদীয় সমষ্টিৰ পৰা ৰাভা হাছং সংগ্ৰাম সমিতিৰ সমৰ্থিত ভাৰতীয় জনতা পাৰ্টীৰ প্ৰাৰ্থী প্ৰেমাজুলি ৰাভাই ইতিমধ্যে বিনা প্ৰতিদ্বন্দ্বিতাৰে বিজয় সাব্যস্ত কৰিছে ।
