মাজুলী জিলাত অন্তৰ্ভূক্ত হ'ল লখিমপুৰ জিলাৰ পূব তেলাহী গাঁও পঞ্চায়ত

মাজুলী: অৱশেষত ভাল খবৰটো আহিল লখিমপুৰ জিলাৰ পূৱ তেলাহী গাঁও পঞ্চায়তবাসীৰ বাবে । লখিমপুৰ জিলাৰ পূৱ তেলাহী গাঁও পঞ্চায়তৰ অন্তৰ্গত লখিমপুৰ জিলাৰ এইসকল লোকে লখিমপুৰ জিলাৰ বিপৰীতে মাজুলী জিলাৰ লগত অন্তৰ্ভুক্ত হ’বলৈ বহু বছৰে দাবী কৰি আহিছিল । যাৰ বাবে বছৰ বছৰ ধৰি তেওঁলোকে এখন সংগ্ৰাম কৰি আহিছিল ।

বছৰ বছৰ ধৰি এই পঞ্চায়তৰ লোকসকলে কৰি অহা সংগ্ৰামৰ অংশ হিচাপে লখিমপুৰ জিলাৰ পূৱ তেলাহী গাঁও পঞ্চায়তখন মাজুলী জিলাত অন্তৰ্ভূক্ত হ'ল । এই সন্দৰ্ভত ৰাজ্য চৰকাৰৰ সাধাৰণ প্ৰশাসনিক বিভাগৰ আয়ুক্ত সঞ্চালক বিৰেন্দ্ৰ মিট্টালৰ স্বাক্ষৰিত মেম' নম্বৰ . ১৮০৩৮৬/১৩১- এ ১৯/২/২০২৫ তাৰিখৰ নথিফিকেশ্যন অনুসৰি লখিমপুৰ জিলাৰ তেলাহী মৌজাৰ অন্তৰ্গত পূৱ তেলাহী গাঁও পঞ্চায়তখন এতিয়াৰে পৰা মাজুলী জিলা প্ৰশাসনৰ অধীনত অন্তৰ্ভূক্ত হ'ব ।

এই জাননী মাজুলী জিলা প্ৰশাসনে লাভ কৰাৰ পিছত নং চি এছ/৫১/২০২৩-চি এ-এম জে এল তাৰিখ ২১ ফেব্ৰুৱাৰী/২০২৫ মতে মাজুলী আয়ুক্ত ৰাতুল চন্দ্ৰ পাঠকে সকলো বিভাগলৈ এক নিৰ্দেশনা জাৰি কৰি ইয়াক লখিমপুৰ জিলাৰ পৰা মাজুলী জিলালৈ বদলিকৰণৰ প্ৰক্ৰিয়া হাতত লোৱাৰ বাবে উল্লেখ কৰে ।

উল্লেখ্য যে, লখিমপুৰ জিলা গঠনৰ ৫৪ বছৰৰ পিছতো লখিমপুৰ জিলা প্ৰশাসনে পূৱ তেলাহী গাঁও পঞ্চায়ত উন্নয়নৰ বাবে কোনো পদক্ষেপ গ্ৰহণ নকৰিলে । ফলত চৌদিশে কেৱল বিভিন্ন জলন্ত সমস্যাৰে জৰ্জৰিত হৈ থকাৰ পৰিপ্ৰেক্ষিতত সমন্বয়ৰক্ষী সমিতি, পূৱ তেলাহীয়ে ২০১৬ চনৰ পৰা ধাৰাবাহিকভাৱে সংগ্ৰাম অব্যাহত ৰাখি আহিছিল ।

সুদীৰ্ঘ ৮ টা বছৰৰ পিছত ৰাজ্য চৰকাৰে লোৱা পদক্ষেপক উষ্ম আদৰণি জনাইছে স্থানীয় ৰাইজে । পূৱ তেলাহী গাঁও পঞ্চায়তৰ এইসকল লোকৰ মাজত এই ভাল খবৰটো প্ৰকাশ হোৱাৰ লগে লগে ফটকা ফুটাই আনন্দ কৰা দেখা গ’ল অঞ্চলবাসীয়ে । অসমৰ মুখ্যমন্ত্ৰীগৰাকীৰ লগতে সাংসদ প্ৰদান বৰুৱাক ধন্যবাদ জনাই এইসকল লোকে ।