কাৰ্বি যুৱতী হত্যাৰ ন্যায় বিচাৰি ৰাজপথ উত্তাল দল-সংগঠনৰ

নগাঁও: কাৰ্বি যুৱতীৰ হত্যাক কেন্দ্ৰ কৰি উত্তাল নগাঁও । জিলাখনৰ এজন গাড়ীচালক এই ঘটনাত জড়িত থকাৰ কথা পোহৰলৈ অহাৰ পিছৰে পৰা কাৰ্বি আংলঙত উমি উমি জ্বলা জুইকুৰা বিয়পি পৰিছে নগাঁৱৰ মাজমজিয়ালৈ ৷

অভিযোগ অনুসৰি, জিলাখনৰ ছাদ্দাম হুছেইন নামৰ এজন গাড়ীচালক এই ঘটনাত জড়িত আছে ৷

কি হৈছিল সমগ্ৰ ঘটনা

বিগত ১৬ জুনৰ নিশা নগাঁও চহৰৰ সমীপৰ ডিফলুত উদ্ধাৰ হোৱা এটা মৃতদেহৰ পৰিচয় লাভ কৰাৰ পিছৰে পৰা জাঙুৰ খাই উঠিছে কাৰ্বি সংগঠনসমূহ । ১৬ জুনত নিৰুদ্দেশ হোৱা কাৰ্বি আংলঙৰ এগৰাকী যুৱতীৰ মৃতদেহ একেদিনাই নগাঁৱৰ ডিফলুত পোৱা গৈছিল ৷ উক্ত মৃতদেহটো ৰহাৰ এটা পৰিয়ালে তেওঁলোকৰ আত্মীয়ৰ বুলি দাবী কৰি লৈ গৈ কৰিছিল সৎকাৰ ।

কিন্তু আশ্বৰ্যজনকভাৱে সৎকাৰৰ এটা সপ্তাহৰ পাছতেই পৰিয়ালটোৰ নিৰুদ্দিষ্ট কিশোৰীগৰাকীক নগাঁও আৰক্ষীয়ে গুৱাহাটী মহানগৰীৰ পৰা জীৱন্তে উদ্ধাৰ কৰে । যাৰ বাবে এক ৰহস্য সৃষ্টিৰ সমান্তৰালকৈ আৰক্ষী বিপাঙত পৰাও দেখা যায় ।

সমগ্ৰ কাণ্ডৰ এটা মাহৰ ভিতৰতেই প্ৰকৃত ঘটনা ফাদিল কৰিবলৈ সক্ষম হৈছিল নগাঁও আৰক্ষী । আৰক্ষীয়ে ১৬ জুনত ডিফলুত উদ্ধাৰ হোৱা মৃতদেহটো কাৰ্বি আংলং জিলাৰ এগৰাকী যুৱতীৰ বুলি পোহৰলৈ আহে ৷ বিগত ১৮ জুলাইত আৰক্ষীয়ে নিশ্চিত তথ্য লাভ কৰাৰ পিছত এই হত্যাত জড়িত থকাৰ সন্দেহত ছাদ্দাম হুছেইন নামৰ এজন গাড়ীচালকক আটক কৰে ৷ হত্যাকাণ্ডত ব্যৱহৃত ছাদ্দামৰ বাহনখনো জব্দ কৰে আৰক্ষীয়ে ।

কাৰ্বি দল-সংগঠনৰ প্ৰতিবাদ

পৰৱৰ্তী সময়ত এই ঘটনাৰ ন্যায় বিচাৰি ৰাজপথ কঁপাই তোলে কাৰ্বি দল-সংগঠনসমূহে ৷ বুধবাৰে নগাঁৱত যুৱতীগৰাকীৰ মৃত্যুৰ ন্যায় বিচাৰি সাব্য়স্ত কৰা এই প্ৰতিবাদত কাৰ্বি দল-সংগঠন, যুৱতীগৰাকীৰ পৰিয়ালৰ উপৰিও শতাধিক কাৰ্বি লোকে অংশগ্ৰহণ কৰা দেখা যায় ৷ প্ৰতিবাদকাৰীসকলে ছাদ্দাম হুছেইনক ফাঁচিৰ দৰে শাস্তি বিহাৰ দাবী উত্থাপন কৰে ৷ এই ঘটনাত ছাদ্দামৰ সৈতে আন বহু ব্যক্তিও জড়িত থাকিব পাৰে বুলি তেওঁলোকে সন্দেহ প্ৰকাশ কৰে ৷

আৰক্ষীয়ে কি কয়

অৱশ্যে কাৰ্বি যুৱতীগৰাকীৰ মৃত্যুৰ তদন্তৰ খাতিৰত এতিয়ালৈকে কোনো কথা স্পষ্ট কৰা নাই নগাঁও আৰক্ষীয়ে ৷ প্ৰকৃত সত্য মৰণোত্তৰ পৰীক্ষাৰ প্ৰতিবেদনৰ ভিত্তিতহে পোহৰলৈ অহাৰ সম্ভাৱনা আছে ৷

লগতে পঢ়ক: অৰুণাচলত পুনৰ এজন অসমীয়া ডেকাক গুলীয়াই হত্যা, উত্তাল প্ৰতিবাদ - ASSAMESE YOUTH MURDER