কলগাছিয়াত শৌচালয়ৰ নামত ধন সংগ্ৰহ কৰা প্ৰাক্তন পঞ্চায়ত সদস্যাৰ বিৰুদ্ধে ৰাইজৰ প্ৰতিবাদ

জনীয়া ,৬ মাৰ্চ: বৰপেটা জিলাৰ কলগাছিয়াৰ ৰূপসী উন্নয়ণ খণ্ডৰ অন্তৰ্গত চিকনী গাঁও পঞ্চায়তৰ ৯ নং খণ্ডৰ প্ৰাক্তন সদস্যা আছিয়া খাতুনৰ বিৰদ্ধে মঙলবাৰে শ শ ৰাইজে সাব্যস্ত কৰিলে প্ৰতিবাদ । চৰকাৰী শৌচালয় নিৰ্মাণ কৰি দিব বুলি ৬৫০ জন দৰিদ্ৰ লোকৰ পৰা অবৈধভাৱে সংগ্ৰহ কৰিছিল ধন । চিকনী গাঁও পঞ্চায়তৰ সদস্যা আছিয়া খাতুন আৰু তেওঁৰ স্বামী হুছেইন মিয়াই ৰাইজৰ পৰা ধন সংগ্ৰহৰ অভিযোগ উত্থাপিত হৈছে ।

চিকনী গাঁও পঞ্চায়তৰ সদস্যা আছিয়া খাতুন আৰু তেওঁৰ স্বামী হুছেইন মিয়াই ৰাইজৰ পৰা ৩০০-৫০০ টকাকৈ প্ৰায় তিনি লক্ষাধিক টকা সংগ্ৰহ কৰিছিল চৰকাৰী শৌচালয়ৰ তালিকাত নাম অন্তৰ্ভুক্ত কৰি দিব বুলি । কিন্তু তালিকাত ৬৫০ জন লোকৰ এজনৰো নাম অন্তৰ্ভুক্ত নোহোৱাত ভুক্তভোগী ৰাইজে ক্ষুদ্ধ হৈ পৰিছে জনপ্ৰতিনিধি গৰাকীৰ বিৰুদ্ধে । সেয়ে সোমবাৰে নিশাৰ ভাগত সাওঁৰাচৰা বজাৰত শ শ ভূক্তভোগী ৰাইজ একত্ৰিত হৈ গাঁও পঞ্চায়তৰ এইগৰাকী সদস্যা আছিয়া খাতুন আৰু তাইৰ স্বামী এইজন হুছেইন মিয়াৰ বিৰুদ্ধে তীব্ৰ প্ৰতিবাদ সাব্যস্ত কৰি চৰকাৰৰ দৃষ্টি আকৰ্ষণ কৰে । লগতে প্ৰাপ্য় ধন ঘূৰাই পোৱাৰ বাবে দাবী জনায় ।

চৰ চাপৰি অঞ্চলৰ হোজা ৰাইজক প্ৰলোভন দেখুৱাই এনেদৰে ধন লুট কৰা কাৰ্যৰ বিৰুদ্ধে তদন্ত কৰি শাস্তিমূলক ব্যৱস্থা কৰিবলৈ ভুক্তভোগী ৰাইজে দাবী জনাইছে । লগতে ভুক্তভোগী ৰাইজে আইনৰ কাষ চাপিব বুলিও সকীয়াই দিয়ে । উপযুক্ত তথ্য থকাৰ পিছতো বিভাগীয় কৰ্তৃপক্ষই এইগৰাকী দুৰ্নীতিগ্ৰস্ত পঞ্চায়ত সদস্যা আছিয়া খাতুন আৰু তেওঁৰ স্বামী হুছেইন মিয়াৰ বিৰুদ্ধে ব্যৱস্থা ল'বনে সেয়া সময়ত হ'ব লক্ষণীয় বিষয় ।

লগতে পঢ়ক:প্ৰধানমন্ত্ৰীক আদৰিবলৈ কেনেদৰে সাজু হৈছে কাজিৰঙা ?