বিধানসভাৰ উপাধ্যক্ষক অসাংবিধানিক আচৰণ: শ্বেৰমান-নুৰুললৈ কাৰণ দৰ্শোৱা জাননী

গুৱাহাটী: সদ্য সমাপ্ত বাজেট অধিৱেশনত বিধানসভাৰ মজিয়াত বিধানসভাৰ উপাধ্যক্ষক অসাংবিধানিক আচৰণ কৰাৰ অভিযোগ উত্থাপন হৈছিল বিধায়ক শ্বেৰমান আলী আহমেদ আৰু নুৰুল হুদাৰ বিৰুদ্ধে । লগতে তেওঁলোকে অসাংবিধানিক শব্দ ব্যৱহাৰ কৰাৰো গুৰুতৰ অভিযোগ উত্থাপন হৈছিল । যাৰ বিৰুদ্ধে আজি (মঙলবাৰ) বিধায়ক শ্বেৰমান আলী আহমেদ আৰু নুৰুল হুদাক বিশেষাধিকাৰ সমিতিয়ে কাৰণ দৰ্শোৱাৰ জাননী জাৰি কৰে ।

উল্লেখ্য যে, মঙলবাৰে বিধানসভাৰ বিশেষাধিকাৰ সমিতিৰ এক বৈঠক অনুষ্ঠিত হয় । এই বৈঠকৰ মূল উদ্দেশ্য আছিল - বিধানসভাত উপাধ্যক্ষক অসাংবিধানিক আচৰণ আৰু অসাংবিধানিক শব্দ ব্যৱহাৰ কৰাৰ বিৰুদ্ধে বিধায়ক শ্বেৰমান আলী আহমেদ আৰু নুৰুল হুদাৰ বিৰুদ্ধে বিচাৰ কৰা । এই বৈঠকত সভাপতিত্ব কৰে বিধায়ক সিদ্ধাৰ্থ ভট্টাচাৰ্যই ।

মনকৰিবলীয়া যে বিধানসভাৰ বিশেষাধিকাৰ সমিতিখন ১২ জনীয়া যদিও আজিৰ এই বৈঠকত ৭ জন‌ বিধায়কহে উপস্থিত আছিল । বিশেষাধিকাৰ সমিতিখনত থকা বিৰোধীৰ পাঁচগৰাকী বিধায়ক বৈঠকত উপস্থিত নাছিল ।

এই বৈঠকৰ অন্তত বিধানসভাৰ বিশেষাধিকাৰ সমিতিৰ বৈঠকত সভাপতিত্ব কৰা বিধায়ক সিদ্ধাৰ্থ ভট্টাচাৰ্যই সাংবাদিকক সম্বোধন কৰি কয়, ‘‘বিধানসভাৰ বিশেষাধিকাৰ সমিতিখন ১২ জনীয়া যদিও আজিৰ বৈঠকত ৭ জন‌ বিধায়কহে উপস্থিত আছিল । সংখ্যাগৰিষ্ঠতাৰ ভিত্তিত বৈঠকখন অনুষ্ঠিত কৰা হৈছে ।‌ বিশেষাধিকাৰ সমিতিখনৰ বৈঠকৰ বাবে সমিতিৰ সকলো সদস্য বিধায়কক খবৰ দিয়া হৈছিল ।’’

তেওঁ কয়, ‘‘বৈঠকৰ সিদ্ধান্ত অনুসৰি দুয়োগৰাকী বিধায়কলৈ বিশেষ জাননী দিয়া হৈছে । লগতে বিধায়কদ্বয়ক আত্মপক্ষ সমৰ্থনৰ সুযোগো দিয়া হৈছে । তেওঁলোকৰ উত্তৰৰ পাছতেই বিশেষাধিকাৰ সমিতিয়ে গ্ৰহণ কৰিব সিদ্ধান্ত । বিধায়ক দুয়োগৰাকীৰে জাননীৰ উত্তৰ পৰ্যালোচনা কৰি সমিতিৰ প্ৰতিবেদন বিধানসভাৰ অধ্যক্ষক অৰ্পণ কৰা হ'ব ।’’

তেওঁ আৰু কয়, ‘‘এই বৈঠকখন প্ৰাথমিক পৰ্যায়ত আছিল । সমিতিয়ে পৰৱৰ্তী সময়ত জাননীৰ উত্তৰ আদিৰ সন্দৰ্ভত পৰৱৰ্তী বৈঠক অনুষ্ঠিত কৰি সিদ্ধান্ত‌ গ্ৰহণ কৰিব ।’’