ঢোল-পেঁপাৰ মাতত কঁপিছে তিনিচুকীয়া, গাভৰু ব্যস্ত তাঁতশালত
ঢোলৰ গুমগুমনিত কঁপিছে তিনিচুকীয়া । চেনেহৰ বাণীৰে মৰমৰ দীঘেৰে গাভৰুৱে চেনাইলৈ বৈছে বিহুৱান । বিহু বিহু লাগিছে গাত ।
Published : March 30, 2025 at 1:11 PM IST
তিনিচুকীয়া: ব'হাগৰ আগমন, চাওঁতে চাওঁতে নঙলা মুখত পালেহি হেঁপাহৰ ৰঙালী বিহু ৷ চৌদিশে চলিছে ব'হাগক আদৰাৰ ব্যাপক প্ৰস্তুতি ৷ গছে পাত সলাইছে ৷ ন-কুঁহিপাত ওলাইছে ৷ কঁঠালেও পেলাইছে মুঁচী ৷ ডালত কপৌ ফুলে জাতিষ্কাৰ হৈছে ৷ শুনা গৈছে কুলি চৰাইৰ মাত ৷ কুলি চৰাইৰ মাত শুনি ৰ'বকে নোৱাৰি ঢুলীয়াই দিছে ঢোলত চাপ ৷ ঠায়ে ঠায়ে চলিছে বিহুৰ আখৰা । হেঁপাহৰ ৰঙালী বিহুক আদৰিবলৈ বিহুৰ আখৰাত ব্যস্ত হৈ পৰিছে কণমানিৰ পৰা গাভৰুলৈ নাচনীসকল ।
ঢুলীয়াৰ ঢোলৰ চেৱে চেৱে নাচি বাগি আনন্দত মতলীয়া হৈ পৰিছে নাচনীসকল । তিনিচুকীয়াৰ পানীতোলা নগাঁৱতো এইদৰে চলিছে বিহুৰ আখৰা । নগাঁৱত নাৰী জাগৰণ মঞ্চৰ উদ্যোগত আয়োজন কৰা হৈছে ১০ দিনীয়া বিহু নাচৰ আখৰা ।
প্ৰশিক্ষকগৰাকীয়ে আখৰাৰ সন্দৰ্ভত কয়, “আপোনালোকৰ চেনেলৰ জৰিয়তে অসমবাসীলৈ আগতীয়াকৈ ব’হাগ বিহুৰ ওলগ জনালোঁ । পানীতোলাৰ নগাঁৱত নাৰী জাগৰণ মঞ্চৰ উদ্যোগত আয়োজন কৰা আখৰাত মই প্ৰশিক্ষক হিচাপে থাকিবলৈ পায় নথৈ আনন্দিত হৈছোঁ । যিহেতেু এই অঞ্চলৰ শতাধিক কণমানি ওলাই আহিছে । সকলোৱে বিহুৰ প্ৰতি আকৰ্ষিত হৈছে, ধৰি ৰাখিবলৈ চেষ্টা কৰিছে ।”
ইফালে, বিহুৰ বতৰত চেনাইলৈ বুলি বিহুৱান বোৱাত ব্যস্ত তিনিচুকীয়াৰ বৰলাইপুলী গাঁৱৰ গাভৰুসকল । কোনোবাই যদি যঁতৰত মহুৰা বতাত ব্যস্ত, আন কোনোবাই ফুল বচাত । মুঠতে এতিয়া আজৰি নাই গাভৰুসকলৰ । তাঁতশালত বহি চেনাইলৈ বিহুৱানত সপোনৰ বুটা বাচিছে । সাজু কৰিছে চেনাইলৈ বুলি বিহুৱান । চেনাইৰ লগতে বয়োজ্যেষ্ঠসকললৈও যাচিব ব’হাগৰ ওলগ । মুখত বিহুনাম জুৰি আনন্দত মতলীয়া হৈছে গাভৰুসকল ।
তাঁতশালত ব্যস্ত থকা বৰলাইপুলীৰ গাভৰু খৰিস্মা বুঢ়াগোঁহাই কয়, “চেনাইলৈ বিহুৱান বোৱাৰ লগতে বয়োজ্যেষ্ঠ দাদা, ভাইটিলৈও গামোচা বৈছোঁ । তাৰ সমান্তৰালভাৱে এতিয়া যিহেতু ৰ’দ দিছে ধান শুকুৱাইছোঁ বিহুত জলপান, পিঠা বনাবলৈ ।”
তাৰ সমান্তৰালভাৱে তিনিচুকীয়াৰ গেলাপুখুৰীত জোনবাই বিহু দলেও আখৰাত ব্যস্ত হোৱা পৰিলক্ষিত হৈছে । মৰাণ, মটক, বড়ো, তিৱাকে আদি কৰি বিভিন্ন জাতি-জনগোষ্ঠীৰ কলা-সংস্কৃতিক সাঙুৰি ১৯ গৰাকীকৈ জোনবাই বিহু দলৰ ডেকা-গাভৰুৱে বিহুৰ মঞ্চৰ বাবে সাজু হৈছে । বিগত ১০ বছৰে জোনবাই বিহু দলে ৰাজ্যৰ প্ৰতিটো প্ৰান্তৰ লগতে বহিঃৰাজ্যতো নিজৰ সাংস্কৃতিক অনুষ্ঠান পৰিৱেশন কৰি বিপুল সমাদৰ লাভ কৰিবলৈ সক্ষম হৈছে ।
